ADU ti agduadua no agpayso ti aniaman nga adda koneksionna iti datdatlag a bambanag ken espiritismo. Panangluko laeng kano dagita wenno imbento laeng dagiti nalaing nga scriptwriter dagiti pelikula. Ngem naiduma ti ibagbaga ti Biblia. Nalawag nga ibagana nga agannadtayo iti espiritismo. Kuna ti Deuteronomio 18:10-13: ‘Awan koma ti masarakan kenka nga agipadpadles, managsalamangka wenno asinoman nga agsapul iti partaan wenno mangkukulam, wenno maysa a mangkayaw iti sabsabali babaen ti pagilabeg wenno asinoman nga umuman iti mannakiuman iti espiritu wenno propesional a managipadles kadagiti pasamak wenno agimtuod iti natay.’ Apay? Intuloyna: ‘Isuamin nga agar-aramid kadagitoy ket nakarimrimon ken Jehova. Rebbeng a paneknekam nga awan pagkurangam ken Jehova a Diosmo.’

Apay a nagkaro ti panangkritikar ti Biblia iti amin a klase ti espiritismo?

Ibagbaga ti Biblia a nabayag pay sakbay nga inaramid ti Dios ti daga, pinarsuana ti minilion nga espiritu a parsua, wenno anghel. (Job 38:4, 7; Apocalipsis 5:11) Naikkan ti kada anghel iti wayawaya nga agdesision—ti abilidad a mangpili iti naimbag wenno dakes. Pinili ti dadduma ti agrebelde iti Dios, ket pinanawanda ti posisionda idiay langit tapno riribukenda ti daga. Kas resultana, “napno [ti daga] iti kinaranggas.”—Genesis 6:2-5, 11; Judas 6.

Ibagbaga ti Biblia nga us-usaren dagitoy a dakes nga anghel ti dakkel nga impluensiada a mangyaw-awan iti minilion a tattao. (Apocalipsis 12:9) Gunggundawayanda pay ketdi ti natural  a tarigagay ti tao a mangammo iti masakbayan.—1 Samuel 28:5, 7; 1 Timoteo 4:1.

Adda dagiti ekstraordinario a pannakabalin (supernatural power) a kasla makatulong met. (2 Corinto 11:14) Ngem ti agpayso, padpadasen dagiti dakes nga anghel a bulseken ti panunot dagiti tattao tapno dida maammuan ti kinapudno maipapan iti Dios.—2 Corinto 4:4.

Isu a sigun iti Biblia, ti pannakikomunikar kadagiti dakes nga espiritu ket saan a maysa a pagraragsakan nga awan pagdaksanna. Dayta ti makagapu nga idi naisuro kadagiti agbalin nga adalan ni Jesus ti kinapudno maipapan kadagiti kasta nga aramid, “dagidiay nangar-aramid kadagiti datdatlag inurnongda dagiti libroda sada pinuoran,” uray no dakkel ti pukawda a kuarta.—Aramid 19:19, Byington.

Adu met ita ti nagdesision a saanen a makiraman kadagiti aktibidad ken pagpalpaliwaan nga adda koneksionna iti espiritismo. Kas pagarigan, idi agtawen iti 12 ni Maria, * agparang a kabaelanna nga ibaga ti dadduma a peligro wenno pasamak iti masanguanan. Basaenna dagiti tarot card wenno baraha para kadagiti kaeskuelaanna, ket gapu ta pimmayso dagiti prediksionna, naengganio iti mahika.

Impagarup ni Maria nga adda pannakabalinna nga inted ti Dios tapno matulonganna dagiti tattao. Ngem inaminna: “Adda pakaburiborak idi. Mabasak ti baraha para iti sabsabali ngem diak mabasa para iti bagik uray kayatko koma a maammuan ti masakbayak.”

Gapu ta magulguluan ni Maria iti adu a saludsodna a di masungsungbatan,  nagkararag iti Dios. Idi agangay, nakisarita kenkuana dagiti Saksi ni Jehova ket nakipagadal iti Biblia kadakuada. Naammuanna manipud iti Biblia a saan a naggapu iti Dios ti abilidadna a mangibaga iti mapasamak iti masanguanan. Naadalna pay a dagidiay mayat a makigayyem iti Dios masapul nga ibelleng wenno dadaelenda ti aniaman a banag nga adda koneksionna iti espiritismo. (1 Corinto 10:21) Ti resultana? Imbelleng ni Maria dagiti libro ken dadduma pay nga us-usarenna nga adda koneksionna iti mahika. Ipakpakaammona itan iti sabsabali dagiti kinapudno a naadalna iti Biblia.

Idi tin-edyer ni Michael, mahilig nga agbasa kadagiti nobela maipapan kadagiti ekstraordinario a karakter. Kinunana: “Magusgustuak idi nga imagine-n a maysaak a superhero nga agpaspasiar iti nadumaduma a lubong ti pantasia.” Bayat a dumakdakkel ni Michael, in-inut a nairuamna ti agbasa iti libro maipapan iti mahika ken sinasatanas nga ar-aramid. Inaminna: “Gapu iti kinausiosok, naengganioak nga agbasa kadagiti libro ken agbuya kadagiti pelikula maipapan kadagita.”

Ngem gapu iti panagadal ni Michael iti Biblia, naawatanna a masapul nga agbalin a naannad iti pilpilienna a basaen. Kinunana: “Inlistak ti amin nga adda koneksionna iti espiritismo ket imbellengko dagita.” Intuloyna: “Adda importante a naadalko. Kuna ti Biblia iti 1 Corinto 10:31: ‘Aramidenyo ti amin a bambanag a maipaay iti dayag ti Dios.’ Isalsaludsodko itan iti bagik, ‘Adda kadi linaon daytoy a pagbasaan a saan a pakaidayawan ti Dios.’ No adda, diak basaenen.”

Nailadawan ti Biblia kas pagsilawan ket apag-isu la unay dayta. Nagpaiduma daytoy a paggapuan iti lawag a mangipakita no ania a talaga ti espiritismo. (Salmo 119:105) Ngem saan la a dayta. Naglaon pay ti Biblia iti nagsayaat a kari maipapan iti lubong nga awanton ti impluensia dagiti dakes nga espiritu. Dakkelto ti epektona dayta iti sangatauan. Kas pagarigan, kuna ti Salmo 37:10, 11: “Iti apagbiit laengen a kanito, ket daydiay nadangkes awanton; ket pudno unay nga imutektekamto ti lugarna, ket isu awanton. Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”