Umad-adu a pasiente iti nadumaduma a paset ti lubong ti mapmapan iti sabali a pagilian tapno gumun-od iti de kalidad a panangagas. Masansan a nagbassit laeng ti magastoda no idilig iti bukodda a pagilian. Impadamag ti Business World a mainanama a maysa a milion a “medikal a turista” ti tinawen a mapan iti Pilipinas mangrugi inton 2015. Kasta met la a bilang ti mainanama idiay South Korea inton 2020. Adu met ti mapmapan idiay India, Malaysia, Singapore, ken Thailand. Saan la a dagiti taga-Laud ti mayat nga agpaagas kadagiti sakit a kas iti problema ti tultulang ken puso. Adu a kabbaro a babaknang a Tsino ti mapmapan metten agparetoke kadagiti plastic surgeon nga awitda dagiti retrato “ti nalatak a tattao a kayatda nga agbalin a kalanglangada,” kuna ti report.

Gapu iti teknolohia, masansan a maobligar dagiti empleado a mamaggigiddan a mangaramid iti nasursurok ngem dua a trabaho ken mangsungbat a dagus kadagiti saludsod. Ngem “saan a de kalidad ti magapuanan dagiti empleado a mamaggigiddan iti adu a trabaho,” kuna ni Clifford Nass, direktor ti Communication Between Humans and Interactive Media Laboratory, iti Stanford University, U.S.A. Sigun iti damag, dagidiay adu ti aggigiddan nga aramidenda ket masansan a ma-stress, al-alisto a masinga kadagiti di napateg a banag, ken saan a makapagpanunot a naimbag isu a malibtawanda dagiti napateg a detalye. Insingasing ni Nass: “No irugim ti maysa a banag, dayta laeng ti aramidem iti 20 a minuto. Iti kasta, mairuamka a mangisentro iti panunotmo iti ar-aramidem ken makapagpanunotka a naimbag.”