“Dagiti Immun-una a Banag Saandanto a . . . Tumpuar iti Puso”

Impakaammo ti Namarsua kadatayo ti dandaninan aramiden. Kinunana:

“Adtoy mangparsuaak iti baro a langlangit ken baro a daga; ket dagiti immun-una a banag saandanto a maipalagip, saandanto met a tumpuar iti puso.”—ISAIAS 65:17.

Ania ‘dagiti immun-una a banag a saanton a tumpuar iti puso’? Sigun iti konteksto, dagita ket kinaawan hustisia, sakit, panagsagaba, ken adu pay a problema a mangparparigat iti sangatauan. Kasanonto nga agsardeng dagita? Ti sungbat ket adda pakainaiganna iti naipakpakauna a “baro a langlangit” ken “baro a daga.”

Ti kayulogan dagita a makapainteres a sasao ket maipakaammo iti palawag publiko a napauluan “Dagiti Immun-una a Banag Saandanto a . . . Tumpuar iti Puso.” Mangngegan dayta iti “Saluadam ta Pusom!” a Kombension Distrito dagiti Saksi ni Jehova, a nangrugi idi Mayo iti Estados Unidos ken agtultuloy iti intero a lubong.

Naimpusuan nga awisendaka a tumabuno iti kombension a kaasitgan iti pagnanaedam. Tapno maammuam ti ad-adu pay a detalye, kontakem dagiti Saksi ni Jehova iti lugaryo wenno agsuratka kadagiti nangipablaak iti daytoy a magasin. Makita iti Web site a www.mr1310.com/ilo dagiti pakaangayan ti kombension iti Pilipinas.