Makapagballigika!
“Maragsakanak unay no ti dua a babbalasitangko ket bigla nga arakupendak sada ibaga ti, ‘Ay-ayatendaka, Mommy.’”—ANNA, AGSOLSOLO NGA INA IDIAY POLAND.
“Masansan a maay-ayatanak no makitak nga ap-apresiaren ti annakko dagiti ar-aramidek para kadakuada. No dadduma, ikkandak kadagiti simple a regalo, kas iti ladawan nga indrowingda. Umanayen dayta a subad ti aniaman a bannogko.”—MASSIMO, AGSOLSOLO NGA AMA IDIAY ITALY.
“No nalidayak, adda tiempo nga arakupennak ti maysa kadagiti annakko a lallaki, bisongennak sa ibagana nga ay-ayatennak unay.”—YASMIN, AGSOLSOLO NGA INA IDIAY SOUTH AFRICA.
SUMAGMAMANO la dagita iti adu a naawat ti Agriingkayo! a komento dagiti agsolsolo a nagannak a karaman kadagiti nasurbey iti intero a lubong. Sigun iti adu nga agsolsolo a nagannak, a kaaduanna ket inna, kayatda ti tulong a ti laeng naayat nga asawa ti makaipaay. * Nupay kasta, ipasimudaag met dayta nga imbagada a nairuamdan iti kasasaadda.
Ania ti tumultulong kadagita nga agsolsolo a nagannak a mairuam ken agballigi iti narigat a responsabilidad? Kadagiti sumaganad nga artikulo, usigentayo ti adu a praktikal ken napudno a komentoda, agraman dagiti napateg a prinsipio a nakatulong kadakuada. No maysaka nga agsolsolo a nagannak, sapay koma ta makatulong kenka dagitoy nga artikulo tapno agballigika a mangibaklay iti responsabilidadmo buyogen ti kinaragsak ken pannakapnek. Talaga a dakkel a karit dayta iti daytoy napartak nga agbalbaliw ken di natalged a lubong. *
Naipamaysa dagiti artikulo iti innem nga aspeto. No kasano a dagiti agsolsolo a nagannak ket
- Makagun-od iti ad-adu a tulong
- Mas epektibo a makisarita kadagiti annakda
- Makaaramid kadagiti umiso a prioridad
- Makaaramid kadagiti nalawag a limitasion
- Makaikeddeng kadagiti nasayaat a moral a pagalagadan
- Masiguradoda nga adda lugar ti Dios iti pamiliada
