Kasla nagadu ti pagpadaanyo iti asawam sakbay a nagkasarkayo. Ngem ita, umad-adayon ti riknam kenkuana isu a nalidayka imbes a naragsakkayo koma a dua.

Kabaelam a pasayaaten ti relasionyo. Ngem usigem nga umuna no apay a dismayadoka.

Maipaspasangokan iti realidad. Ti inaldaw a trabaho, panangpadakkel iti annak, ken pannakilangen kadagiti katugangan ti in-inut a mangapektar iti kinaragsak ti panagasawa. Maysa pay, dagiti di ninamnama a problema—nalabit gapu iti problema iti kuarta wenno panangaywan iti kapamilia nga agsakit iti nakaro—ti mangyeg iti tension iti panagasawa.

Kasla dikay agkatunosan. No agnobio pay ti baro ken balasang, kadawyanna a dida ikankano dagiti nagdumaanda. Ngem no agassawadan, maduktalanda a nagdumada gayam kadagiti banag a kas iti estilo ti pannakisarita, panagiggem iti kuarta, ken panangsolbar iti problema. Dagiti nagdumaan a makapasuron laeng idi ket kasla saanen a maanusan.

Umad-adayon ti riknam. Iti panaglabas ti tiempo, gapu kadagiti masansan a makapasakit a sasao wenno tigtignay ken di narisut a di panagkinnaawatan, mabalin a saanen nga iyebkas ti asawa a lalaki wenno babai ti riknana wenno nakarkaro pay, mangrugin a matnag ti riknana iti sabali.

Saan a realistiko dagiti ninamnamam. Dadduma ti makiasawa ta mamatida a nasarakandan daydiay nairanta nga agbalin a katakunaynayda. Nupay kasla romantiko dayta a kapanunotan, mabalin nga agbanagto ti pannakaupay. No tumauden dagiti problema, mapukawen ti kapanunotan nga “agbagayda unay” ket marikna ti agassawa a nagkamalida.

Kanayon a panunotem dagiti nasayaat a kababalin ti asawam. Padasem daytoy: Mangisuratka iti tallo a positibo a kababalin ti asawam, nalabit iti likudan ti bassit a retratoyo idi nagkasarkayo wenno iti gadyetmo ken kanayonmo nga itugot dayta. Masansan a kitaem dayta kas pammalagip no apay a nakikallaysaka kenkuana. No kanayonmo a panunoten dagiti nasayaat a kababalin ti asawam, agtalinaed a natalna ti relasionyo ken maanusam dagiti nagdumaanyo.—Prinsipio ti Biblia: Roma 14:19.

Mangiplanoka iti espesial a panawen nga agkaduakayo. Sakbay a nagkasarkayo, posible a nangilatangkayo iti panawen nga agkaduakayo a mangaramid kadagiti bambanag. Idi, kasla kanayon a damoyo ti agdeyt ken makapagagar dayta isu a sagsaganaanyo a naimbag. Apay a diyo manen uliten? Mangiplanoka kadagiti espesial a gundaway a makapagkaduakayo nga agassawa a kas man la agdedeytkayo. No aramidenyo dayta, agbalinkayo a nasingsinged ken nasaysayaat ti panangsolbaryo kadagiti di ninamnama a problema iti biag.—Prinsipio ti Biblia: Proverbio 5:18.

Iyebkasmo ti riknam. No nasaktanka iti imbaga wenno inaramid ti asawam, mabalin kadi a palabsem lattan? No saan, dika agibales babaen ti di panangpagpaguni. Sikakalma a pagsaritaanyo a dagus dagiti bambanag, iti dayta met laeng nga aldaw no posible.—Prinsipio ti Biblia: Efeso 4:26.

Tarusam ti nagdumaan ti rikriknam ken dagiti intension ti asawam. Sigurado la ketdi a diyo kayat ti agpinnasakit. Ipasiguradom dayta iti asawam babaen ti naimpusuan a panagpadispensar iti aniaman a naaramidmo a mabalin a nangpasakit kenkuana. Kalpasanna, pagsaritaanyo no ania dagiti espesipiko nga aramidenyo tapno maliklikanyo ti di inggagara a panangsair. Surotenyo ti balakad ti Biblia: “Agbalinkayo a manangngaasi iti maysa ken maysa, nadungngo a mannakipagrikna, a sibubulos a pakawanenyo ti maysa ken maysa.”—Efeso 4:32.

Realistiko koma dagiti namnamaem. Kuna ti Biblia a dagidiay makiasawa “addaandanto ti rigat iti lasagda.” (1 Corinto 7:28) No maipasangoka iti kasta a rigat, saanmo a dagus nga ipapan a nagkamalika iti pannakiasawam. Ikagumaanyo ketdi nga agassawa a solbaren dagiti diyo pagkinnaawatan ken “itultuloyyo nga anusan ti maysa ken maysa ken sibubulos a pakawanen ti maysa ken maysa.”—Colosas 3:13.