ITI daya a takdang ti Motoyasu River iti Hiroshima City, Japan, adda pasdek a nagtalinaed a dadael ti dadduma a pasetna sipud idi 1945. Nupay dandani 70 a tawenen ti napalabas, saan latta a natarimaan dayta. Apay?

Ti dati a tallo ti kadsaaranna a pasdek a naaramid iti ladrilio ken argamasa ket nairingpas a naibangon idi 1915. Nausar dayta idi kas exhibition hall tapno mapapigsa ti komersio. Ngem nagbalbaliw dayta idi Agosto 6, 1945, iti alas 8:15 ti bigat. Iti dayta a kanito, ti bomba atomika a damo a nausar iti gubat ket napabettak iti agarup 550 a metro iti ngatuen ti siudad ken dandani iti batog a mismo ti exhibition hall. Insigida a natay ti amin nga adda iti uneg. Nupay kasta, ti makintengnga a paset ti pasdek ket saan a narba.

Gapu ta napagtalinaed a kasta, dayta ti “nalawag ken nabileg a simbolo ti makadadael unay a puersa a pinataud ti tao,” kuna ti maysa nga artikulo ti UNESCO. * Idi 1996, dayta a pasdek ket nainayon iti UNESCO World Heritage List kas ti Hiroshima Peace Memorial.

Ngem nakalkaldaang ta dagiti kasta a makapaladingit a pakalaglagipan ket saan a nakapasardeng iti gubat a masansan a maigapu iti kinaagum, nasionalismo, ken guranggura maigapu iti puli, relihion, ken tribu. Addanto kadi ngarud aldaw nga agpatingga dagiti gubat?

Ti sungbat ti Biblia ket wen! Ti Dios “pagsardengenna dagiti gubat iti sangalubongan,” kuna ti Salmo 46:9 (Ti Baro a Naimbag a Damag Biblia). “Dadaelenna dagiti pana, tukkolenna dagiti gayang, ken puoranna dagiti lugan a pakigubat.” Maigiddato iti dayta, dagiti gobierno ti tao ket sukatanto ti Dios iti mismo a sangalubongan a gobiernona—ti Pagarian ti Dios nga iturayan ni Jesu-Kristo, a nadutokan nga “Ari ti ar-ari.”—Apocalipsis 11:15; 19:16.

Kalpasan dayta, ditayton kasapulan dagiti pakalaglagipan ti kinamaag ti panaggugubat. “Dagiti immun-una a banag”—rigrigat ken panagleddaang ita—“saandanto a maipalagip, saandanto met a tumpuar iti puso,” kuna ti Isaias 65:17.