TI KUNA TI DADDUMA

Patien ti dadduma a kultura a saan a dakes ti makiseks iti saanmo nga asawa, aglalo iti biang ti asawa a lalaki. Ibilang met ti sabsabali a temporario laeng a relasion ti panagasawa.

TI KUNA TI BIBLIA

Iti Biblia, ti pannakikamalala ket tumukoy iti sipapakinakem a pannakiseks ti maysa a naasawaan—lalaki man wenno babai—iti saanna nga asawa. (Job 24:15; Proverbio 30:20) Kagura ti Dios ti pannakikamalala. Iti nagkauna nga Israel, ipapatay ti dusa dayta a basol. (Levitico 18:20, 22, 29) Insuro ni Jesus kadagiti adalanna a masapul nga adaywanda ti pannakikamalala.—Mateo 5:27, 28; Lucas 18:18-20.

NO APAY A PAKASEKNAM

No makikamalala ti maysa, saanna a tungtungpalen ti sagrado a karina iti asawana idi nagkasarda. Maysa met dayta a ‘basol a maikaniwas iti Dios.’ (Genesis 39:7-9) Makapaladingit ta gapu iti pannakikamalala, maisina dagiti annak iti tatang wenno nanangda. Kasta met, namakdaar ti Biblia a “ti Dios ukomennanto . . . dagiti mannakikamalala.”—Hebreo 13:4.

“Ti panagasawa nadayaw koma iti tengnga dagiti isuamin, ket ti pagiddaan ti agassawa awan koma ti tulawna.”—Hebreo 13:4.

TI KUNA TI BIBLIA

Ipalubos ti Biblia a mawaswas ti panagasawa no makaaramid iti seksual nga immoralidad ti maysa kadakuada. (Mateo 19:9) Kaipapanan dayta a ti asawa a saan a nakikamalala ket addaan iti kalintegan nga agdesision no agtalinaed iti nakabasol nga asawana, wenno idiborsio wenno isinana ti asawana. Personal a desision dayta.—Galacia 6:5.

Iti sabali a bangir, ibilang ti Dios ti panagasawa kas sagrado ken tungpal-biag a singgalut. (1 Corinto 7:39) Kagura ti Dios no makisina wenno makidiborsio ti maysa gapu laeng kadagiti nalag-an a rason, kas koma no saanen a kontento iti asawana. Saan koma ngarud a tagtagilag-anen ti desision a makisina wenno makidiborsio.—Malakias 2:16; Mateo 19:3-6.

“Kunak kadakayo a ti tunggal maysa a mangidiborsio iti asawana a babai, malaksid no maigapu iti pannakiabig, isarangna [ti asawana] iti pannakikamalala.”—Mateo 5:32.

TI KUNA TI BIBLIA

Wen. Kuna ti Biblia a kaasian ti Dios dagidiay agbabbabawi ken desidido a saanen a mangulit pay kadagiti basolda—agraman ti pannakikamalala. (Aramid 3:19; Galacia 5:19-21) Adda pay ketdi dagiti nairekord iti Biblia a lallaki ken babbai a nangisardeng iti pannakikamalala ket nagbalinda a gayyem ti Dios.—1 Corinto 6:9-11.

Naipakita ti asi ti Dios idi nagbasol ni Ari David ti nagkauna nga Israel. Nakikamalala ni David iti asawa ti maysa kadagiti soldadona. (2 Samuel 11:2-4) Nalawag nga ibaga ti Biblia a “ti banag nga inaramid ni David nagparang a dakes kadagiti mata” ti Dios. (2 Samuel 11:27) Kalpasan a nadisiplina, nagbabawi ni David ket pinakawan ti Dios. Ngem masapul latta nga apiten ni David dagiti dakes nga epekto ti inaramidna. (2 Samuel 12:13-14) Idi agangay, imbaga met ti masirib nga Ari Solomon a “ti asinoman a makikamalala . . . awanan iti puso.”—Proverbio 6:32.

TI MABALINMO NGA ARAMIDEN

No nakikamalalaka, masapul a dumawatka iti pammakawan iti Dios ken iti asawam. (Salmo 51:1-5) Kas iti Dios, sursuruem a guraen ti pannakikamalala. (Salmo 97:10) Masapul a determinadoka a mangliklik iti pornograpia, panagpantasia, panagalembong (flirting), wenno aniaman pay a mangriing iti seksual nga interes iti saanmo nga asawa.—Mateo 5:27, 28; Santiago 1:14, 15.

No nakikamalala ti asawam, tandaanam a maawatan ti Dios ti marikriknam. (Malakias 2:13, 14) Ikararagmo a liwliwaen ken idalannaka, ket “saranayennakanto.” (Salmo 55:22) No ti desisionmo ket pakawanem ti asawam ken itultuloymo ti makitipon kenkuana, masapul nga ikarigatanyo a dua a palagdaen manen ti relasionyo kas agassawa.—Efeso 4:32.

“Ni Jehova, kalpasanna, palabasenna ti basolmo,” kinuna ni propeta Natan iti agbabbabawi a ni David kalpasan a nakikamalala. —2 Samuel 12:13.