NABAYAG a naipapan a ti tao ti immuna a nakaaramid kadagiti gear wenno engranahe. Ngem napaneknekan a kamali dayta! Dagiti agkikinnaem ti ngipenna a gear ket nadiskobre iti maysa nga insekto—ti ubing nga Issus leafhopper a masarakan kadagiti hardin iti intero a Europa. *

Nakapaspaspas la unay ti panaglagto ti ubing a leafhopper ta nagkiremka laeng, awanen. Kayana a maabut ti kapartak a 3.9 a metro kada segundo iti uneg laeng ti 0.002 a segundo, ket kontraenna ti puersa ti grabidad iti dandani 200 a daras! Tapno makalagto iti kasta, masapul nga eksakto nga agpada ti puersa ti dua a makinlikud a sakana ken masapul nga eksakto ti panaggiddan dagita. Ania ti sekreto dayta a kinaeksakto?

Usigem: Nadiskobre dagiti sientista nga iti puon ti dua a makinlikud a saka ti leafhopper, adda dua a gear nga agkikinnaem dagiti ngipenna. No lumagto ti insekto, siguraduen dagita a gear a siento porsiento nga aggiddan nga agkuti ti dua a makinlikud a sakana. Ta no saan, agtayyek a maipuruak ti insekto!

No aglagto ti tao wenno ti daddadakkel nga animal, agdependeda iti nervous system-da tapno aggiddan nga agkuti dagiti sakada. Ngem no agdepende ti ubing a leafhopper iti nervous system-na, nakabumbuntog no kua ti panaglagtona, isu a ti usarenna ket ti dua a gear-na nga agkikinnaem dagiti ngipenna. “Ti gagangay nga ammotayo ket makita laeng dagiti gear kadagiti makina a dinisenio ti tao,” kuna ti autor ken researcher a ni Gregory Sutton. Ngamin, “kurang ti panagporsegitayo nga agpaliiw” iti aglawlaw, innayonna.

Ania ti makunam? Resulta kadi ti ebolusion ti panagandar dagiti gear ti Issus leafhopper? Wenno adda nangdisenio iti dayta?