PANUNOTEM a magmagnaka iti nasipnget a dalan. Nupay nabayagen a limnek ti init, saanka a madanagan a mayaw-awan ta adda napigsa a plaslaytmo. No iturongmo iti baba, makitam ti adda iti mismo a sanguanam. No iturongmo iti sango, lawaganna ti dalanmo ket makitam ti adda iti adayo.

Adda dagiti pagpadaan ti Biblia ken plaslayt. Kas naammuantayo kadagiti napalabas nga artikulo, makatulong ti Biblia tapno masolbartayo dagiti sangsanguentayo a problema iti inaldaw iti daytoy lubong nga awan ti sigurado. Ngem saan la a dayta ti maaramid ti Biblia. Arigna silawanna pay ti masakbayan, iti kasta, mailasin ken masurottayo ti dalan nga agturong iti awan inggana a ragsak ken kinakontento. (Salmo 119:105) Kasano?

Kitaentayo ti dua a pamay-an no kasano a mangipaay ti Biblia iti pudpudno a namnama iti masanguanan: 1 Tulongannatayo a maaddaan iti direksion iti biag, ken 2 suruannatayo no kasano nga agbalintayo a gayyem ti Namarsua iti agnanayon.

Adayo a dakdakkel ti maitulong dagiti mapagtalkan a balakad ti Biblia kadagiti problematayo ngem kadagiti libro nga insurat ti tao. Imbes nga ibaga ti Biblia nga agpokustayo iti problema, isurona a palawaentayo ti panagkitatayo iti bambanag. Iti kasta, mabirokantayo ti pudno a panggep ti biag.

Alaentayo a pagarigan daytoy a prinsipio ti Biblia: “Ad-adu ti kinaragsak iti panangted ngem iti panangawat.” (Aramid 20:35) Malagipmo kadi idi adda tinulongam? Wenno nalabit idi inwayaam ti dimngeg iti maysa a gayyem bayat nga ibukbukbokna ti riknana? Saan kadi a naragsakanka gapu ta ammom a limmag-an ti riknana?

Mariknatayo ti awan kapadana a ragsak no mangtedtayo a saan a mangnamnama iti kasukat. Inyunay-unay ti maysa nga autor: “Kaaduanna a no tumulongka, dakdakkel ti agsubli kenka—no la  ket ta mangtedka a saan a mangnamnama iti kasukat.” No timmulongtayo—nangruna kadagiti saan a talaga a makasubad—talaga a makaawattayo iti kasukat. Lumawa ti panagkitatayo iti bambanag. Makitatayo a katrabahuantayo ti Namarsua, ket ibilangna ti kinaimbagtayo kas pautang kenkuana. (Proverbio 19:17) Apresiarenna ti maaramidantayo para kadagiti nanumo, ken ikarkarina a subadannatayo iti biag nga agnanayon iti paraiso a daga. Anian a makaparagsak a namnama!—Salmo 37:29; Lucas 14:12-14. *

Kangrunaan iti amin, isuro ti Biblia a posible a maaddaantayo iti direksion iti biag no agdayawtayo iti pudno a Dios a ni Jehova. Kuna ti Saona a ti Dios ket maikari a maidaydayaw ken pagtulnogan. (Eclesiastes 12:13; Apocalipsis 4:11) No aramidentayo dayta, adda nakaskasdaaw a maitungpaltayo: Maparagsaktayo ti Namarsua kadatayo. Isu nga iyunay-unayna: “Agmasiribka . . . ket pagrag-oem ti pusok.” (Proverbio 27:11) Panunotem—no naibasar dagiti desisiontayo kadagiti prinsipio ti Biblia, maparagsaktayo ti puso ti naayat a nailangitan nga Amatayo. Apay? Gapu ta ay-ayatennatayo ken kayatna a mabenepisiarantayo iti panangidalanna. (Isaias 48:17, 18) Awanen ti nasaysayaat a pangusarantayo iti biagtayo no di ti agdayaw iti Soberano ti uniberso ken agbiag iti pamay-an a mangparagsak iti pusona!

Isursuro met ti Biblia a makigayyemtayo iti Namarsua kadatayo. Kuna ti Biblia: “Umadanikayo iti Dios, ket isu umadaninto kadakayo.” (Santiago 4:8) Mabalin a no dadduma, agduaduatayo no posible ti makigayyem iti mannakabalin-amin a Namarsua. Ngem kuna ti Biblia a no ‘sapulentayo ti Dios,’ isu ket ‘pudno a masarakantayo,’ gapu ta “saan nga adayo iti tunggal maysa kadatayo.” (Aramid 17:27) Talaga a para iti masakbayantayo ti balakad ti Biblia a makigayyemtayo iti Dios. Kasano?

Panunotem: Uray ania ti ar-aramidentayo, awan kadatayo ti makalibas iti maudi a kabusortayo—ti ipapatay. (1 Corinto 15:26) Nupay kasta, awan pagpatinggaan ti Dios. Saan a pulos a matay, ken kayatna met nga agbiag nga agnanayon dagiti gayyemna. Iti simple ngem nagpintas a sasao, inyebkas ti Biblia ti kayat ni Jehova para kadagiti agsapsapul kenkuana: “Agbiag[kayo] koma iti agnanayon.”—Salmo 22:26.

Kasano a maaddaanka iti agnanayon a pannakigayyem iti Dios? Itultuloymo ti agsursuro maipapan kenkuana kadagiti panid ti Saona, ti Biblia. (Juan 17:3; 2 Timoteo 3:16) Agpatulongka kenkuana tapno maawatam ti Kasuratan. Ipasigurado ti Biblia a no naimpusuan nga ‘itultuloytayo ti agdawat iti Dios’ iti sirib, ipaayna dayta. * (Santiago 1:5) Kamaudiananna, ikagumaam nga iyaplikar dagiti masursurom, ken usarem ti Sao ti Dios kas ‘pagsilawan ti sakam, ken silaw iti danam’—ita ken iti agnanayon.—Salmo 119:105.