Talaga kadi a masiguradotayo a pumayso ti amin a kari ti Dios? Kombinsido ni Jesus iti dayta, ket naaddaan iti pammati dagiti dimngeg iti pannursurona. Kitaem ti ilustrasion iti Sermonna iti Bantay iti Mateo 5:18: “Pudno kunak kadakayo nga umun-una pay nga aglabas ti langit ken ti daga ngem ti maysa a kabassitan a letra wenno maysa a sangkabassit a paset ti letra nga aglabas manipud iti Linteg iti aniaman a pamay-an ket saan a maaramid amin a bambanag.”

Ti kabassitan a letra ti Hebreo nga alpabeto ket yod (י). Dayta ti umuna a letra ti Tetragrammaton, ti sagrado a nagan ti Dios a Jehova. * Para kadagiti eskriba ken Fariseo, saan laeng a dagiti aktual a sasao ken letra ti Linteg ti Dios ti nakapatpateg no di ket uray ti tunggal “paset ti letra.”

Imbaga ni Jesus a dakdakkel ti posibilidad a mapukaw ti langit ken daga ngem ti saan a pannakatungpal ti kabassitan a detalye ti Linteg. Ngem ipasigurado ti Biblia nga agtalinaed nga agnanayon ti literal a langit ken daga. (Salmo 78:69) Ipakita ngarud daytoy makapainteres a sasao a sigurado a matungpal uray ti kabassitan a detalye ti Linteg.

Napateg kadi ken Jehova a Dios dagiti babassit a detalye? Sigurado a wen. Panunotem: Naibilin kadagiti nagkauna nga Israelita a dida pulos tukkolen ti aniaman a tulang ti kordero ti Paskua. (Exodo 12:46) Mabalin a bassit la a detalye dayta. Ngem naawatanda ngata ti rason? Nalabit saan. Ngem ammo ni Jehova a Dios a daytoy a detalye ket padto maipapan iti Mesias, nga awan ti aniaman a tulangna ti matukkol inton matay iti kayo a pagtutuokan.—Salmo 34:20; Juan 19:31-33, 36.

Ania ti masursurotayo iti sasao ni Jesus? Masiguradotayo met a matungpal dagiti kari ni Jehova a Dios agingga iti kabassitan a detalye. Anian a nakabilbileg a pammasiguro manipud iti kabassitan a letra ti Hebreo!