Ipakita ti Biblia nga adda dagiti gundaway a prinotektaran dagiti anghel dagiti pudno nga agdaydayaw tapno maibanag ti pagayatan ti Dios. (Salmo 34:7) Kas pagarigan:

• Idi dinadael ni Jehova dagiti dakes a siudad ti Sodoma ken Gomorra, tinulongan dagiti anghel a makalibas ti nalinteg a ni Lot ken ti pamiliana.—Genesis 19:1, 15-26.

• Iti nagkauna a Babilonia, ‘nangibaon ti Dios iti anghelna a nangalaw’ iti tallo nga adipenna nga agtutubo a Hebreo a naitapuak iti umap-apuy nga urno.—Daniel 3:19-28.

• Kalpasan ti agpatnag a kaadda ti nalinteg a ni Daniel iti abut dagiti mabisbisin a leon, imbagana a nakalasat isuna gapu ta ti “Dios imbaonna ti anghelna ket kinaemna ti ngiwat dagiti leon.”—Daniel 6:16, 22.

Adda dagiti gundaway a timmulong dagiti anghel a mensahero ti Dios kadagiti aktibidad ti nagkauna a kongregasion Kristiano no kasapulan dayta tapno matungpal ti panggep ti Dios. Kas pagarigan:

• Linuktan ti maysa nga anghel ti ruangan ti nakaibaludan dagiti apostol sa binilinna ida nga ituloyda ti mangasaba idiay templo.—Aramid 5:17-21.

• Binilin ti maysa nga anghel ti ebanghelisador a ni Felipe a mapan iti dalan iti desierto a mangikonektar iti Jerusalem iti Gaza tapno kasabaanna ti maysa nga Etiope a napan nagdayaw idiay Jerusalem.—Aramid 8:26-33.

• Idi impalubosen ti Dios nga agbalin a Kristiano dagiti saan a Judio, nagparang ti maysa nga anghel iti Romano a soldado a ni Cornelio babaen iti sirmata ket binilinna a paayabanna ni apostol Pedro iti balayna.—Aramid 10:3-5.

• Idi naibalud ni apostol Pedro, nagparang ti maysa nga anghel ket tinulonganna a makaruar iti pagbaludan.—Aramid 12:1-11.

Awan ti ebidensia nga us-usaren ita ti Dios dagiti anghel a tumulong kadagiti tattao babaen iti milagro a kas kadagiti naisalaysay iti Biblia. Ngem kuna ni Jesus maipapan iti panawentayo: “Daytoy  naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:14) Ammom kadi nga ar-aramiden dagiti adalan ni Kristo daytoy a trabaho bayat nga iturturong ida dagiti anghel?

Mabasa iti Apocalipsis a nagaget dagiti anghel a tumultulong kadagiti tattao iti intero a daga tapno masursuroda ti maipapan ken Jehova a Dios ken iti panggepna kadagiti tattao. Insurat ni apostol Juan: “Nakakitaak iti sabali pay nga anghel nga agtaytayab iti nagtangatangan, ket addaan iti agnanayon a naimbag a damag nga ideklarana kas naragsak a damag kadagidiay agnanaed iti daga, ken iti tunggal nasion ken tribu ken pagsasao ken ili, a kunkunana iti natbag a timek: ‘Agbutengkayo iti Dios ket idayawyo, agsipud ta dimtengen ti oras ti panangukomna, ket ngarud agdaydayawkayo iti Daydiay nangaramid iti langit ken iti daga ken baybay ken kadagiti ubbog ti dandanum.’” (Apocalipsis 14:6, 7) Adu a kapadasan ti mangpaneknek a supsuportaran dagiti anghel ti pannakaikasaba ti Pagarian iti intero a lubong. Sigurado a no adda uray maysa a managbasol nga agbabawi ken agserbi ken Jehova, “adda panagrag-o kadagiti anghel ti Dios.”—Lucas 15:10.

Ania ti mapasamak inton malpasen ti trabaho a panangasaba? Dagiti ‘buyot dagiti anghel nga adda iti langit’ suportaranda ni Jesu-Kristo, ti Ari dagiti ari, iti labanna “iti gubat ti naindaklan nga aldaw ti Dios a Mannakabalin-amin” inton Armagedon. (Apocalipsis 16:14-16; 19:14-16) Dagiti mannakabalin nga anghel ti mangitungpalto iti panangukom ti Dios bayat a ni Apo Jesus “iyegna ti pammales kadagidiay . . . saan nga agtulnog iti naimbag a damag maipapan ken Apotayo a Jesus.”—2 Tesalonica 1:7, 8.

Agtalekka ngarud nga interesado kenka dagiti anghel. Talaga a sipapanunotda iti pagimbagan dagidiay mayat nga agserbi iti Dios. Maulit-ulit nga inusar ida ni Jehova tapno patibkeren ken protektaran dagiti matalek nga adipenna ditoy daga.—Hebreo 1:14.

Adda ngarud napateg a desision nga aramiden ti tunggal maysa kadatayo. Dumngegtayo kadi ken agbiag maitunos iti naimbag a damag a maipakpakaammo iti intero a lubong? Maragsakan dagiti Saksi ni Jehova iti lugaryo a tumulong kenka no kasano a mapadasam ti naayat a tulong dagiti mannakabalin nga anghel ti Dios.