“Ti Espiritu ken ti Nobia Agtultuloy a Kunaenda: ‘Umayka!’”
“Ti Espiritu ken ti Nobia Agtultuloy a Kunaenda: ‘Umayka!’”
“Ti espiritu ken ti nobia agtultuloy a kunaenda: ‘Umayka!’ . . . Ti asinoman a mawaw umay koma; ti asinoman a mayat awatenna koma ti danum ti biag nga awan bayadna.”—APOC. 22:17.
1, 2. Kasano kapateg iti biagtayo dagiti interes ti Pagarian, ken apay?
KASANO kapateg iti biagtayo dagiti interes ti Pagarian? Indagadag ni Jesus kadagiti pasurotna nga ‘itultuloyda a sapulen nga umuna ti pagarian,’ ket impasiguradona nga ipaay ti Dios dagiti kasapulanda no aramidenda dayta. (Mat. 6:25-33) Inyarigna ti Pagarian ti Dios iti maysa a nagpateg a perlas nga idi nasarakan ti maysa nga agdaldaliasat a komersiante, “inlakona amin a bambanag nga adda kenkuana ket ginatangna dayta.” (Mat. 13:45, 46) Saan kadi a rumbeng a pagbalinentayo a kapatgan iti biagtayo ti panangikasaba iti Pagarian ken panagaramid kadagiti adalan?
2 Kas nakitatayon iti immuna a dua nga artikulo, ti natured a panagsaotayo ken ti nasigo a panangusartayo iti Sao ti Dios iti ministerio ket pammaneknek nga iturturongnatayo ti espiritu ti Dios. Dakkel met ti akem dayta nga espiritu iti regular a pannakiramantayo iti panangikasaba iti Pagarian. Kitaentayo no kasano.
Awis Agpaay iti Amin!
3. Ania a kita ti danum ti mayaw-awis iti amin a tattao?
3 Adda mayaw-awis iti amin a tattao babaen ti nasantuan nga espiritu. (Basaen ti Apocalipsis 22:17.) Ti awis ket “umayka” ken penken ti maysa ti wawna babaen ti naisangsangayan a kita ti danum. Ngem saan nga ordinario a danum dayta. Nupay napateg ti literal a danum a mangsustiner iti biag ditoy daga, adda sabali a kita ti danum a pampanunoten ni Jesus idi kinunana iti Samaritana iti abay ti bubon: “Siasinoman nga uminum manipud iti danum nga itedkonto kenkuana saanton a pulos mawaw, ngem ti danum nga itedkonto kenkuana agbalinto kenkuana nga ubbog ti danum nga agburburayok a mangipaay iti agnanayon a biag.” (Juan 4:14) Ti naisangsangayan a danum a mayaw-awis nga inumen dagiti tattao ket mangted iti agnanayon a biag.
4. Kasano a timmaud ti panagkasapulan iti danum ti biag, ken ania ti irepresentar dayta a danum?
4 Timmaud ti panagkasapulan iti kasta a danum ti biag idi a ti umuna a tao a ni Adan kimmappon iti asawana a ni Eva nga agsukir iti mismo a nangparsua kadakuada—ni Jehova a Dios. (Gen. 2:16, 17; 3:1-6) Napagtalaw dagiti umuna a pagassawaan manipud iti minuyongan a pagtaenganda “tapno [ni Adan] saanna a mayunnat ti imana ket pudno a mangala met iti bunga manipud iti kayo ti biag ket mangan ket agbiag agingga iti tiempo a di nakedngan.” (Gen. 3:22) Kas kapuonan dagiti tattao, inyeg ni Adan ti ipapatay iti intero a sangatauan. (Roma 5:12) Ti danum ti biag irepresentarna ti amin a probision ti Dios tapno mawayawayaan dagiti natulnog a tattao manipud iti basol ken ipapatay ken maipaayanda iti agnanayon a perpekto a biag iti Paraiso a daga. Nagbalin laeng a posible dagita a probision babaen ti pangsubbot a daton ni Jesu-Kristo.—Mat. 20:28; Juan 3:16; 1 Juan 4:9, 10.
5. Asino ti nagtaudan ti awis nga umayka ken ‘awatem ti danum ti biag nga awan bayadna’? Ilawlawagyo.
5 Asino ti nagtaudan ti awis nga umayka ken ‘awatem ti danum ti biag nga awan bayadna’? Inton amin a probision ti biag babaen ken Jesus ket naan-anay a magun-odan ti sangatauan bayat ti Milenio a Panagturay ni Kristo, mailadawanda a kas “maysa a karayan ti danum ti biag, nalitnaw a kas kristal.” Nakita dayta a karayan nga “agay-ayus manipud iti trono ti Dios ken iti Kordero.” (Apoc. 22:1) No kasta, ni Jehova a Gubuayan ti Biag isu ti Ubbog ti danum a mangyeg iti biag. (Sal. 36:9) Isu ti mamagbalin iti dayta a danum a posible a magun-odan babaen “ti Kordero,” ni Jesu-Kristo. (Juan 1:29) Dayta a simboliko a karayan ti usaren ni Jehova a mangikkat iti amin a pakarigatan a napasaran ti sangatauan gapu iti panagsukir ni Adan. Wen, ni Jehova a Dios ti Nagtaudan ti awis nga “umayka.”
6. Kaano a nangrugi nga agayus ti “karayan ti danum ti biag”?
6 Nupay ti “karayan ti danum ti biag” ket agayusto a naan-anay bayat ti Sangaribu a Tawen ti Panagturay ni Kristo, nangrugi dayta nga agayus bayat ti “aldaw ti Apo,” a nangrugi idi naitrono “ti Kordero” idiay langit idi 1914. (Apoc. 1:10) Kalpasan dayta, magun-odanen ti dadduma a probision a mainaig iti Sao ti Dios, ti Biblia, yantangay ti mensahena ket natukoy a kas “danum.” (Efe. 5:26) Mayaw-awis iti amin a tattao nga ‘awatenda ti danum ti biag’ babaen ti panagimdeng ken panagtignayda iti naimbag a damag ti Pagarian. Ngem siasino ti aktual a mangyaw-awis iti dayta bayat ti aldaw ti Apo?
“Ti Nobia” Kunana, “Umayka!”
7. Bayat ti “aldaw ti Apo,” siasino ti immuna a nangitukon iti awis nga “umayka,” ken naitukon dayta kadagiti siasino?
7 Dagiti kameng ti klase nobia—dagiti Kristiano a napulotan iti espiritu—ti immuna a nangitukon iti awis nga “umayka.” Kadagiti siasino? Saan la ketdi nga ibagbaga ti nobia iti bagina nga “Umayka!” Naiturong ti awisna kadagidiay addaan iti namnama a biag nga agnanayon ditoy daga kalpasan ti “gubat ti naindaklan nga aldaw ti Dios a Mannakabalin-amin.”—Basaen ti Apocalipsis 16:14, 16.
8. Ania ti mangipakita a dagiti napulotan a Kristiano ituktukonda ti awis ni Jehova sipud pay idi 1918?
8 Dagiti napulotan a pasurot ni Kristo ituktukonda dayta nga awis sipud idi 1918. Iti dayta a tawen, ti palawag publiko a napauluan iti “Minilion a Sibibiag Ita ti Mabalin a Saanto a Pulos a Matay” inlawlawagna nga adu ti makagun-od iti biag nga agnanayon iti paraiso a daga kalpasan ti gubat ti Armagedon. Idi 1922, iti maysa a palawag iti kombension dagiti Estudiante ti Biblia iti Cedar Point, Ohio, E.U.A., naidagadag kadagiti agdengdengngeg nga ‘iwaragawagda ti Ari ken ti pagarianna.’ Dayta a kiddaw ti timmulong kadagiti natda ti klase nobia a mangitukon iti dayta nga awis iti ad-adu pay a tattao. Idi 1929, ti Marso 15 a ruar Ti Pagwanawanan ket naglaon iti artikulo a napauluan iti “Ti Naayat nga Awis,” a ti Apocalipsis 22:17 ti pannakatema a tekstona. Kuna ti artikulo: “Ti matalek a klase natda nakikadua [iti Kangatuan] iti panangitukon iti makaay-ayo nga awis ket kinunana, ‘Umayka.’ Maipakaammo daytoy a mensahe kadagidiay agtarigagay iti kinalinteg ken kinapudno. Masapul a maaramid dayta itan.” Agingga ita, itultuloy ti klase nobia nga itukon dayta nga awis.
“Ti Asinoman a Dumdumngeg Kunaenna Koma: ‘Umayka!’”
9, 10. Ania ti inaramid dagidiay nangipangag iti awis nga “Umayka!”?
9 Komusta met dagidiay makangngeg iti awis nga “umayka”? Kas panangipangag, itukonda met ti awis nga “Umayka!” Kas pagarigan, ti Agosto 1, 1932 a ruar Ti Pagwanawanan iti panid 232 kunana: “Dagiti napulotan paregtaenda koma ti amin a makiraman iti panangipakaammo iti naimbag a damag ti pagarian. Saan a masapul a maysada kadagiti pinulotan ti Apo tapno maideklarada ti mensahe ti Apo. Nagdakkel a liwliwa kadagiti saksi ni Jehova ita ti pannakaammo a naitalek met kadakuada ti panangidanon iti danum ti biag kadagiti tattao a mabalin a makalasatto iti Armagedon ken maikkan iti agnanayon a biag ditoy daga.”
10 No maipapan iti responsabilidad dagiti makangngeg iti awis nga “Umayka!” kuna Ti Pagwanawanan nga Agosto 15, 1934, panid 249: “Dagiti klase Jonadab masapul a makikaduada kadagiti napulotan a nailadawan kas klase Jehu, ken ipakaammoda ti mensahe ti pagarian uray saanda a napulotan a saksi ni Jehova.” Idi 1935, nagminar no asino ti “dakkel a bunggoy” a nadakamat iti Apocalipsis 7:9-17. Dayta ti ad-adda a nangtignay kadakuada a mangitukon iti awis ti Dios. Sipud idin, dayta nga awis ket impangag ti umad-adu a bilang ti dakkel a bunggoy dagiti pudno nga agdaydayaw—a nasurok a pito a milion itan. Gapu ta impategda dayta a mensahe, indedikarda ti biagda iti Dios, nagpabautisarda, ken nakikaduada iti klase nobia tapno sireregta nga awisenda ti sabsabali nga ‘umay ken uminum iti danum ti biag nga awan bayadna.’
“Ti Espiritu” Kunana, “Umayka!”
11. Idi umuna a siglo K.P., ania ti akem ti nasantuan nga espiritu iti trabaho a panangasaba?
11 Idi nangasaba ni Jesus iti sinagoga idiay Nazaret, inukradna ti lukot ni propeta Isaias sa binasana: “Ti espiritu ni Jehova adda kaniak, agsipud ta pinulotannak a mangideklara ti naimbag a damag kadagiti napanglaw, imbaonnak tapno ikasaba ti pannakaluk-at kadagiti kautibo ken ti pannakaisubli ti panagkita kadagiti bulsek, tapno dagidiay nailupitlupit papanenna buyogen ti panangluk-at, tapno ikasaba ti naparaburan a tawen ni Jehova.” Kalpasanna, inyaplikar ni Jesus dagita a sasao iti bagina, a kunkunana: “Ita nga aldaw daytoy a kasuratan a kangkangngegyo natungpalen.” (Luc. 4:17-21) Sakbay a nagpalangit, kinuna ni Jesus kadagiti adalanna: “Umawatkayto iti pannakabalin inton dumteng kadakayo ti nasantuan nga espiritu, ket dakayto dagiti saksik . . . agingga iti kaadaywan a paset ti daga.” (Ara. 1:8) Idi umuna a siglo, dakkel ti akem ti nasantuan nga espiritu iti trabaho a panangasaba.
12. Ania ti akem ti espiritu ti Dios iti panangitukon iti awis iti kaaldawantayo?
12 Ania ti akem ti nasantuan nga espiritu ti Dios no iti panangitukon iti awis kadagiti tattao iti kaaldawantayo? Ni Jehova ti Gubuayan ti nasantuan nga espiritu. Us-usarenna dayta nga espiritu a manglukat iti isip ken puso ti klase nobia tapno ad-adda a maawatanda ti Saona, ti Biblia. Dayta nga espiritu ti mangtignay kadakuada a mangitukon iti awis ken mangilawlawag kadagiti Nainkasuratan a kinapudno kadagidiay addaan iti namnama nga agbiag nga agnanayon iti Paraiso a daga. Dagidiay ngay mangawat iti awis nga agbalin nga adalan ni Jesu-Kristo, ken mangitukon met iti awis kadagiti sabsabali? Tumulong met kadakuada dayta nga espiritu. Gapu ta nabautisaranda ‘iti nagan ti nasantuan nga espiritu,’ agpaidalanda iti espiritu ken agpannurayda iti tulongna. (Mat. 28:19) Panunotenyo met ti mensahe nga ikaskasaba dagiti napulotan ken ti umad-adu a bilang ti dakkel a bunggoy. Naggapu dayta iti Biblia—ti libro a naisurat babaen ti direkta a panangiwanwan ti espiritu ti Dios. No kasta, maituktukon ti awis babaen ti nasantuan nga espiritu. Kinapudnona, idaldalannatayo ti nasantuan nga espiritu. Kasano nga apektaran dayta ti kadakkel ti pannakiramantayo iti trabaho a panangawis?
“Agtultuloy a Kunaenda: ‘Umayka!’”
13. Ania ti ipasimudaag ti sasao a “ti espiritu ken ti nobia agtultuloy a kunaenda: ‘Umayka!’”?
13 “Ti espiritu ken ti nobia” saanda laeng a namnaminsan nga imbaga ti “Umayka!” Ti orihinal a sao a nausar ditoy ipasimudaagna ti agtultuloy a tignay. Gapuna, kastoy ti mabasa iti Baro a Lubong a Patarus: “Ti espiritu ken ti nobia agtultuloy a kunaenda: ‘Umayka!’” Dayta ti mangipamatmat nga agtultuloy ti panangitukon iti awis ti Dios. Komusta met dagidiay nakangngeg ken nangawat iti awis? Kunaenda met, “Umayka!” Ti dakkel a bunggoy dagiti pudno nga agdaydayaw ket nailadawan a ‘mangipapaay iti sagrado a panagserbi iti aldaw ken rabii iti templo ni Jehova.’ (Apoc. 7:9, 15) Iti ania nga anag nga ‘agserserbida iti aldaw ken rabii’? (Basaen ti Lucas 2:36, 37; Aramid 20:31; 2 Tesalonica 3:8.) Ti kapadasan ni apostol Pablo ken ti baket a propetisa a ni Ana ipakitada a ti ‘panagserbi iti aldaw ken rabii’ ket mangipasimudaag iti agtultuloy ken napasnek a panagregget iti ministerio.
14, 15. Kasano nga impakita ni Daniel ti kinapateg ti regular a panagdayaw?
14 Impakita met ni propeta Daniel ti kinapateg ti regular a panagdayaw. (Basaen ti Daniel 6:4-10, 16.) Uray makabulan laeng koma, saanna a binalbaliwan dagiti regular a naespirituan nga aktibidadna—kas iti panagkararagna iti Dios ‘mamitlo iti maysa nga aldaw kas regular nga ar-aramidenna’—agbanag man dayta iti pannakaipisokna iti abut dagiti leon. Dagiti tignayna ket nalawag a pammaneknek kadagiti agpalpaliiw nga awanen ti napatpateg pay ngem iti regular a panagdayaw ken Jehova!—Mat. 5:16.
15 Kalpasan ti agpatnag a kaadda ni Daniel iti abut dagiti leon, napan sadiay ti ari ket impukkawna: “O Daniel, adipen ti sibibiag a Dios, ti Diosmo a pagserserbiam a patinayon nabalinannaka kadi nga inalaw manipud kadagiti leon?” Dagus a simmungbat ni Daniel: “O ari, agbiagka uray agingga kadagiti tiempo a di nakedngan. Ti bukodko a Dios imbaonna ti anghelna ket kinaemna ti ngiwat dagiti leon, ket saandak a dinadael, yantangay iti sanguananna nasarakan kaniak ti mismo a kinaawan basol; ken kasta met iti sanguanam, O ari, awan inaramidko a makapasakit a tignay.” Ni Jehova binendisionanna ni Daniel gapu iti “patinayon” a panagserbina.—Dan. 6:19-22.
16. Mainaig iti ulidan ni Daniel, ania dagiti masapul a tingitingentayo no iti pannakiramantayo iti ministerio?
16 Regular a sinalimetmetan ni Daniel dagiti naespirituan nga aktibidadna uray nagpeggad ti biagna. Datayo met ngay? Ania dagiti panagsakripisio nga ar-aramiden wenno sidadaan nga aramidentayo tapno regular a maiwaragawagtayo ti naimbag a damag ti Pagarian ti Dios? Ditay la ketdi kayat a maliwayantayo nga isarita ti maipapan ken Jehova uray iti maysa laeng a bulan! No mabalin, saan kadi a nasaysayaat no ikagumaantayo ti makiraman iti ministerio iti kada lawas? Uray no addaantayo kadagiti pisikal a limitasion ken 15 a minuto laeng ti kabaelantayo a busbosen a mangasaba iti makabulan, masapul nga ireporttayo dayta a nagapuanantayo. Apay? Gapu ta kas iti espiritu ken iti nobia, kayattayo nga itultuloy a kunaen, “Umayka!” Wen, kayattayo nga aramiden ti amin a kabaelantayo nga agtalinaed kas regular nga agibumbunannag iti Pagarian.
17. Ania ti dadduma pay a gundaway a masapul nga itukontayo ti awis ni Jehova?
17 Masapul nga ikagumaantayo nga itukon ti awis ni Jehova iti tunggal gundaway, saan laeng nga iti tiempo nga inyeskediultayo a mapan mangasaba. Anian a pribilehio nga awisentayo dagiti mawaw nga ‘umayda ken awatenda ti danum ti biag nga awan bayadna’ iti dadduma pay a gundaway, kas iti panawen ti panaggatang, panagbiahe, panagbakasion, panagtrabaho, wenno panageskuela! Uray no iparit dagiti autoridad ti trabahotayo a panangasaba, itultuloytayo ti mangasaba a siaannad—nalabit babaen ti panangasaba iti sumagmamano laeng a balay sa umakar manen iti sabali a teritoria wenno babaen ti ad-adu a pannakiraman iti di pormal a panangasaba.
Itultuloytayo a Kunaen, “Umayka!”
18, 19. Kasanoyo a maipakita nga ipatpategyo ti pribilehioyo kas katrabahuan ti Dios?
18 Iti nasuroken a siam a dekada, ti espiritu ken ti nobia itultuloyda a kunaen, “Umayka!” iti asinoman a mawaw iti danum ti biag. Nangngegyo kadin ti makapagagar nga awisda? No kasta, maidagadag nga itukonyo daytoy nga awis kadagiti sabsabali.
19 Saantayo nga ammo no agingga iti kaano a maitukon ti naayat nga awis ni Jehova, ngem ti panagtignaytayo iti dayta babaen ti panangikunatayo, “Umayka!” pagbalinennatayo a katrabahuan ti Dios. (1 Cor. 3:6, 9) Anian a pribilehio dayta! Ipakitatayo koma nga ipatpategtayo dayta a pribilehio ken “kankanayon koma nga idatontayo iti Dios ti sakripisio ti panagdaydayaw” babaen ti regular a panangasabatayo. (Heb. 13:15) Datayo nga addaan iti naindagaan a namnama, agraman ti klase nobia, itultuloytayo a kunaen, “Umayka!” Ken sapay koma ta ad-adu pay ti ‘umawat iti danum ti biag nga awan bayadna’!
Ania ti Naadalyo?
• Kadagiti siasino a maituktukon ti awis nga “umayka”?
• Apay a maikunatayo a nagtaud ken Jehova ti awis nga “umayka”?
• Ania ti akem ti nasantuan nga espiritu iti panangitukon iti awis nga “umayka”?
• Apay a masapul nga ikagumaantayo ti agbalin a regular iti ministerio?
[Salsaludsod]
[Tsart/Dagiti Ladawan iti panid 16]
(Para iti aktual a pannakaurnosna, kitaem ti publikasion)
Itultuloytayo a Kunaen, “Umayka!”
1914
5,100 nga agibumbunannag
1918
Adu ti makagun-od iti biag iti Paraiso a daga
1922
“Iwaragawagyo, iwaragawagyo, iwaragawagyo, ti Ari ken ti pagarianna”
1929
Kuna ti matalek a natda, “Umayka!”
1932
Saan laeng a kadagiti napulotan a maituktukon ti awis nga “Umayka!”
1934
Naawis a mangasaba ti klase Jonadab
1935
Nagminar no asino ti “dakkel a bunggoy”
2009
7,313,173 nga agibumbunannag