NABAKNANG iti naespirituan a tawid ti ili ni Jehova. Malaksid iti panangbasa kadagiti publikasiontayo, adda pay maammuantayo maipapan kadagita kadagiti ladawan, surat, personal a kapadasan, ken kadaanan nga alikamen mainaig iti panagdayaw, panangasaba, ken pakasaritaantayo. Ngem ania ti pagsayaatanna ti panangitalimeng kadagita ken ti panangsubli iti napalabas? Bueno, dagiti ulo ti pamilia iti nagkauna nga Israel isuroda kadagiti annakda dagiti linteg ken nakaskasdaaw nga aramid ni Jehova tapno maaddaanda iti ‘panagtalek iti Dios.’​—Sal. 78:1-7.

Nabayagen a dakkel ti maitulong ti panangsukimat kadagiti naitalimeng a rekord iti pannakaitungpal ti panggep ni Jehova. Kas pagarigan, idi pasardengen dagiti bumusbusor ti trabaho iti templo idiay Jerusalem, naibilin ti pannakasukimat dagiti rekord iti pagidulinan idiay Ecbatana a kabesera ti Media. Nakitada ti dokumento a naglaon iti bilin ni Ari Ciro a nangautorisar iti panagbangon. (Esd. 6:1-4, 12) Kas resultana, naibangon ti templo maitunos iti pagayatan ti Dios. Ti maysa a nagsurat iti Ebanghelio a ni Lucas inusarna met dagiti napateg a nakadulin a rekord a ‘nangtalunton iti amin a bambanag manipud iti pangrugian buyogen ti kinaumiso.’​—Luc. 1:1-4.

Interesado unay ti Bagi a Manarawidwid iti nateokratikuan a pakasaritaantayo. Maipapan iti kinapateg  ti panangitalimeng, panangirekord, ken panangipasa iti naespirituan a tawidtayo, kuna ti maysa a kameng ti Bagi a Manarawidwid: “Masapul nga ammotayo ti nagtaudantayo tapno ammotayo ti papanantayo.” Dayta ti makagapu a nabukel iti nabiit pay ti departamento a Writing Archives iti sangalubongan a hedkuarter idiay Brooklyn, New York nga imatmatonan ti Writing Committee.

TI “ALBUM TI PAMILIA” KEN “PATAWID A GAMENG”

Gapu ta alisto nga aglabas ti tiempo, kaaduan kadatayo ti nalabit mangibaga nga ad-adu koma ti naitalimengtayo a personal a pakalaglagipan mainaig iti pamiliatayo. Ikagkagumaan ita ti Writing Archives a taginayonen ken irekord ti umad-adu ken nabaknang a tawidtayo. Dagiti ladawan a naitalimeng a naimbag iti Archive ket maibilang a paset ti “album ti pamilia.” Dagiti nagkauna a publikasion, makaparegta a personal a kapadasan, ken nagpateg a koleksion ket karaman kadagiti gameng iti Archive. Dagita ket “patawid a gameng” a makatulong tapno maammuantayo ti nateokratikuan a tawidtayo ken sikokompiansa a seggaantayo ti mapasamak iti naespirituan a pamiliatayo.

Awisendaka a mangkita iti Writing Archives babaen ti baro a benneg a “Gameng iti Archive.” Adda dagiti ruar a pagparangan dayta iti pagadalan nga edision Ti Pagwanawanan. Kas pagarigan, iti sumaganad a ruar, planomi nga ipablaak ti salaysay nga adda ladawanna a nairanta a mangsungbat kadagitoy a saludsod: Ania ti Dawn Mobile? Siasino ti nagusar? Kaano a nausar, ken ania ti panggepna?

Kas iti pakalaglagipan nga album ti pamilia, adu ti ipalgak dagiti naitalimeng iti Archive maipapan kadatayo ken kadagiti naespirituan nga ammatayo​—ti pammati ken kinaturedda, dagiti rag-o ken karit a nakaipasanguanda gapu iti panagserbida iti naayat a nailangitan nga Amatayo, ken ti panangiwanwan ti Dios ken agtultuloy a tulongna iti ilina. (Deut. 33:27) Makapagtalektayo a bendisionan ni Jehova ti maar-aramid a panangikagumaan a mangitalimeng iti pakasaritaan ti organisasiontayo tapno ad-adda a makapagkaykaysa ken mapabilegtayo a mangitungpal iti pagayatanna.

[Kahon/Ladawan iti panid 31]

Kitaentayo

Bayat ti pannakaisagana dagiti Nakristianuan a literatura, DVD, ken dagiti sabali pay a naibatay-Biblia a material, dagiti mannurat, artist, managsirarak, ken dadduma pay, usarenda dagiti adda iti Archive. Gapuna, siaannad ken nagpateg dagiti addang nga ar-aramiden ti Writing Archives a mangurnong ken mangitalimeng iti nakaad-adu a material mainaig iti historia manipud kadagiti sanga nga opisina, departamento ti Bethel, kongregasion, indibidual, ken sekular nga institusion. Kitaem ti pakabuklan dayta a trabaho:

Panangurnong ken Panangsukimat: Adda dagiti naisangsangayan a bambanag a mainaynayon iti Archive. Adu kadagita ti indonar wenno impabulod dagiti indibidual a ti pamiliada ket nabayagen a simamatalek nga agserserbi ken Jehova. Ti panangsukimat ken panangidilig kadagita paunegenna ti pannakaawattayo iti historia ti organisasiontayo ken kadagiti nagbiag kadagidi a panawen.

Panangirekord: Dagiti naurnong ti Writing Archives ket buklen ti rinibu a bambanag, a dadduma kadagita ti nasuroken a maysa a siglo ti kabayagna. Nagduduma ti sukog, kadakkel, ken kita dagita ken masapul a mairekordda a naimbag tapno mausar iti masanguanan.

Pannakatarimaan ken Pannakaitalimeng: Dagiti libro ken kadaanan nga alikamen a nalaka a madadael ket natarimaan ken naitalimeng babaen kadagiti moderno a proseso ti panangtarimaan. Napagbalin a digital dagiti dokumento, ladawan, nakartib nga artikulo, film, ken recording. Iti kasta, mabalinen a makita iti kompiuter tapno saanen nga iggaman dagiti orihinal a dokumento wenno dadduma pay a bambanag mainaig iti historia.

Panangidulin ken Panangiruar: Naurnos ken natalged ti pannakaitalimeng dagiti adda iti Archive tapno saanda a mapukaw ken madadael gapu iti lawag ken agneb. Madama a maar-aramid ti database a makatulong iti panagsirarak ken panangiruar kadagitoy a nagpateg a gameng manipud iti napalabas ti organisasiontayo.

[Dagiti Ladawan iti panid 32]

1. Poster para iti “Photo-Drama of Creation.” 2. Subscription register. 3. Sound car. 4. Akkub ti Abril 15, 1912 a Watch Tower. 5. Surat ti pagbaludan para ken J. F. Rutherford. 6. Mikropono ti WBBR. 7. Ponograpo. 8. Bag a pagkargaan kadagiti libro. 9. Personal a sursurat. 10. Telegrama para ken J. F. Rutherford.