1. Apay a pagyamanantayo ni Jehova?

NI Jehova, ti Manangipaay iti “tunggal naimbag a sagut ken tunggal naan-anay a rangkap,” ket maikari a pagyamanantayo. (Sant. 1:17) Kas naayat a Pastortayo, sidudungngo nga ipapaayna ti amin a pisikal ken naespirituan a kasapulantayo. (Sal. 23:1-3) Isu ti agbalin a “kamang ken pigsa[tayo]”—nangnangruna iti tiempo ti rigat! (Sal. 46:1) Wen, adu ti panggapuantayo a naimpusuan nga umanamong iti salmista, a nangisurat: “Agyamankayo ken Jehova, ta isu naimbag; ta ti naayat a kinamanangngaasina ket agingga iti tiempo a di nakedngan [wenno, agnanayon].”—Sal. 106:1.

2, 3. (a) Ania dagiti resultana no tagtagilag-anentayo dagiti naawattayo a bendision? (b) Ania dagiti saludsod nga usigentayo iti daytoy nga artikulo?

² Apay a napateg nga usigentayo ti maipapan iti kinamanagyaman? Kas naipadto, kumarkaro ti kinaawan panagyaman dagiti tattao kadagitoy maudi nga al-aldaw. (2 Tim. 3:2) Adu ti saan unay a mangtagtagipateg iti maaw-awatda a bendision. Minilion a tattao ti naimpluensiaan iti lubong ti komersio ken adbertismen isu nga ikagkagumaanda ti maaddaan iti ad-adu pay imbes a kontentoda koman iti adda kadakuada. Amangan no maapektarantayo  iti daytoy a kababalin. Kas kadagiti Israelita idi ugma, posible nga agbalintayo a di managyaman ken mapukawtayo ti apresasiontayo iti napateg a relasiontayo ken Jehova ken kadagiti bendision a naawattayo.—Sal. 106:7, 11-13.

³ Usigentayo met ti mabalin a mapasamak no makapasartayo kadagiti narigat a suot. Kadagita a gundaway, mabalin a nalakatay a maupay ket saantayon a makita dagiti naawattayo a bendision. (Sal. 116:3) No kasta, kasanotayo ngarud a mapatanor ken mapagtalinaed ti managyaman a puso? Ken ania ti tumulong kadatayo nga agtalinaed a positibo uray no agpaspasartayo kadagiti nakaro a suot? Kitaentayo.

4. Kasano a mapagtalinaedtayo ti managyaman a puso?

⁴ Tapno mapatanor ken mapagtalinaedtayo ti managyaman a puso, masapul a bigbigen ken naimpusuan nga apresiarentayo dagiti bendision ni Jehova ken mennamennaentayo ti dakkel nga ayatna kadatayo. Idi inaramid dayta ti salmista, nagamanga iti adu a nagsasayaat a bambanag nga inaramid ni Jehova.—Basaen ti Salmo 40:5; 107:43.

5. Ania ti maadaltayo ken apostol Pablo maipapan iti kinamanagyaman?

⁵ Adu ti maadaltayo ken apostol Pablo maipapan iti kinamanagyaman. Minennamennana la ketdi dagiti naawatna a bendision ta masansan nga inyebkasna ti naimpusuan a panagyamanna. Aklonen ni Pablo a maysa idi a ‘managtabbaaw ken manangidadanes ken nakuspag a tao.’ Gapuna, nagyaman ta iti laksid dagiti napalabas a basolna, kinaasian latta ti Dios ken ni Kristo ken intalekda kenkuana ti maysa a ministerio. (Basaen ti 1 Timoteo 1:12-14.) Inapresiar met unay ni Pablo dagiti padana a Kristiano ken kanayon a nagyamyaman ken Jehova iti nasasayaat a kababalin ken matalek a panagserbida. (Fil. 1:3-5, 7; 1 Tes. 1:2, 3) Ket idi naipasango kadagiti suot, dagus a nagyaman ken Jehova iti naintiempuan a suporta dagiti kapammatianna. (Ara. 28:15; 2 Cor. 7:5-7) Saan ngarud a pakasdaawan nga imparegta ni Pablo kadagiti Kristiano: “Ipakitayo a managyamankayo . . . , a [paregtaenyo] ti maysa ken maysa babaen kadagiti salmo, daydayaw iti Dios, naespirituan a kankanta buyogen ti [panagyaman].”—Col. 3:15-17.

6. Ania ti nangnangruna a pagyamyamanam ken Jehova?

⁶ Kasanotayo a matulad ti nasayaat nga ulidan ni Pablo? Kas kenkuana, masapul met a mennamennaentayo dagiti naaramidan kadatayo ni Jehova. (Sal. 116:12) Ania ti sungbatmo no maisaludsod kenka: ‘Ania dagiti bendision ni Jehova a pagyamyamanam?’ Iramanmo kadi ti napateg a relasionmo kenkuana? Wenno ti pannakapakawan ti basbasolmo gapu iti pammatim iti daton a subbot ni Kristo? Saggaysaem kadi nga inaganan dagiti kakabsat a nangsuporta kenka bayat a mapaspasaram dagiti nakaro a suot? Siempre, karaman met kadagiti dakamatem ti dungdungnguem nga asawa wenno dagiti patpatgem nga annak. No mennamennaem ti kasta a nagsasayaat a bendision manipud iti naayat nga Amatayo a ni Jehova, mapno ti pusom iti panagyaman ket matignayka nga agyaman iti inaldaw.—Basaen ti Salmo 92:1, 2.

7. (a) Apay a rumbeng nga agyamantayo kadagiti kararagtayo? (b) Ania dagiti magunggonam no agyamanka kadagiti kararagmo?

⁷ No sipapanunottayo kadagiti maaw-awattayo a bendision, matignaytayo nga agyaman ken Jehova iti kararag. (Sal. 95:2; 100:4, 5) Adu a tattao ti agkarkararag gapu laeng ta adda kayatda a kiddawen iti Dios.  Ngem ammotayo a maay-ayo ni Jehova no pagyamanantayo dagiti bambanag nga adda kadatayo. Naglaon ti Biblia iti adu a makatukay-rikna a kararag ti panagyaman, pakairamanan ti kararag da Anna ken Ezekias. (1 Sam. 2:1-10; Isa. 38:9-20) Isu a masapul a tuladem dagitoy a matalek nga adipen ti Dios a nangipakita iti kinamanagyamanda. Wen, agyamanka ken Jehova babaen ti kararag gapu kadagiti maaw-awatmo a bendision. (1 Tes. 5:17, 18) No kasta ti aramidem, agbalinka a naragsak, umuneg ti ayatmo ken Jehova, ken nasingsingedka kenkuana.—Sant. 4:8.

8. Ania ti mabalin a mangpukaw iti apresasiontayo iti amin a naaramidan ni Jehova para kadatayo?

⁸ Apay a masapul nga annadantayo a saan a mapukaw ti apresasiontayo iti kinaimbag ni Jehova? Gapu ta adda natawidtayo a pagannayasan a di managyaman. Usigentayo daytoy: Nagnaed dagiti immuna a nagannaktayo, da Adan ken Eva, iti paraiso a hardin. Naipaay ti amin a kasapulanda, ken mabalinda ti agbiag nga agnanayon iti natalna a kasasaad. (Gen. 1:28) Ngem saanda nga inapresiar dagita a bendision. Siaagum a tinarigagayanda ti sabali pay a banag. Kas resultana, napukawda ti amin nga adda kadakuada. (Gen. 3:6, 7, 17-19) Gapu ta napalawlawantayo kadagiti di managyaman a tattao, posible a mapukaw met ti apresasiontayo iti amin a naaramidan ni Jehova para kadatayo. Mabalin a mangrugin a tagtagilag-anentayo ti relasiontayo kenkuana ken ti pribilehiotayo nga agbalin a paset ti sangalubongan a panagkakabsat. Nalabit agbalintayon nga okupado iti bambanag iti daytoy a lubong nga asidegen nga aglabas. (1 Juan 2:15-17) Tapno maliklikantay dayta, mennamennaentayo koma dagiti maaw-awattayo a bendision ken kanayon a pagyamanantayo ni Jehova iti pribilehio nga agbalin a paset ti ilina.—Basaen ti Salmo 27:4.

9. No makapasartayo kadagiti nakaro a suot, apay a napateg a laglagipentayo dagiti bendision a maaw-awattayo?

⁹ Makatulong ti kinamanagyaman tapno maibturantayo dagiti nakaro a suot. Mabalin a maupaytayo no bigla a maipasangotayo iti dadakkel a problema, kas ti pannakikamalala ti asawa, grabe a sakit, ipapatay ti maysa a kapamilia, wenno panagsagaba gapu iti natural a didigra. No mapasarantayo dagita, maliwliwa ken mapabilegtayo no laglagipentayo dagiti bendision nga adda kadatayo. Usigentayo dagiti sumaganad a kapadasan.

10. Kasano a nagunggonaan ni Irina iti panangpampanunotna kadagiti maaw-awatna a bendision?

 ¹⁰ Ni Irina * ket regular pioneer a taga-Amianan nga America. Maysa a panglakayen ti naasawana ngem nakikamalala ken binaybay-anna ida nga agiina. Ania ti nakatulong ken Irina nga agtultuloy a matalek ken Jehova? Kinunana: “Agyamanak iti panangaywan kaniak ni Jehova. Gapu ta sipapanunotak kadagiti maaw-awatko a bendision iti inaldaw, mabigbigko a maysa a pribilehio nga am-ammonak ken ipatpategnak ti manangsalaknib a nailangitan nga Amatayo. Ammok a dinakto pulos baybay-an.” Nupay nakas-ang ti paspasamak a napasaran ni Irina, nakatulong kenkuana ti naragsak a personalidadna ket maparparegta met iti dayta ti sabsabali.

11. Ania ti nakatulong ken Kyung-sook a mangdaer iti nakaro a sakitna?

¹¹ Ni Kyung-sook, a taga-Asia, ket payunirda ken lakayna iti nasuroken a 20 a tawen. Idi kuan, natakuatan nga adda nakaro a kanserna iti bara ken naibaga kenkuana a tallo agingga’t innem a bulan laengen ti panagbiagna. Nupay adun a kita ti suot ti napasaranda nga agassawa, saanda idi a problema ti salun-atda. Kinuna ni Kyung-sook: “Grabe ti epekto kaniak ti sakitko ta nariknak a kasla napukawkon ti amin ken madandanaganak unay.” Ania ti nakatulong kenkuana nga agibtur? Imbagana: “Tunggal rabii sakbay a maturogak, mapanak iti rooftop ti balaymi ket ikararagko iti napigsa ti lima a banag a pagyamyamanak iti dayta nga aldaw. Kalpasanna, lumag-anen ti riknak, ket matignayak a mangyebkas iti ayatko ken Jehova.” Kasano a nagunggonaan ni Kyung-sook iti rinabii a panagkarkararagna? Kinunana: “Nabigbigko a tartarabayennatayo ni Jehova no adda dagiti suot a mapaspasarantayo ken ad-adu nga amang dagiti bendision a maaw-awattayo ngem kadagiti suot.”

12. Kasano a naliwliwa ni Jason idi natay ni baketna?

¹² Agserserbi ni Jason iti maysa a sanga nga opisina iti Africa ken nasuroken a 30 a tawenna iti amin-tiempo a serbisio. Kinunana: “Natay ni baketko pito a tawenen ti napalabas ket nakaro a saem ti nariknak. Malidayanak no pampanunotek ti rigat a napasaranna bayat a lablabananna ti sakitna a kanser.” Ania ti nakatulong ken Jason? “Naminsan,” kunana, “linagipko ti maysa a naragsak a kanito a kaduak ni baketko, ket nagyamanak ken Jehova iti kararag gapu iti dayta. Nabang-aranak, ket sipud idin, kanayonen a pagyamanak ni Jehova kadagiti naragsak a kanito a kaduak ti asawak. Marikriknak pay laeng ti saem gapu iti ipupusay ni baketko, ngem gapu ta pagyamyamanak ti naragsak a panagasawak ken ti pribilehiok nga agserbi ken Jehova a kadua ti maysa a mangipatpateg iti Dios, nagbaliw ti panangmatmatko.”

13. Ania ti nakatulong ken Sheryl a mangibtur iti ipapatay dagiti miembro ti pamiliana?

¹³ Idi dinalapus ti napigsa a bagyo a Haiyan (wenno Yolanda) ti makintengnga a paset ti Pilipinas idi Nobiembre 2013, ni Sheryl, nga agtawen laeng idi iti 13, napukawna ti gistay amin a napateg kenkuana. Kinunana: “Napukaw ti balaymi, ken dagiti miembro ti pamiliak.” Natay ti ama, ina, ken tallo a kakabsatna gapu iti dadakkel ken napipigsa a dalluyon ti baybay. Ania ti nakatulong ken Sheryl a mangdaer iti daytoy a pasamak a saan a maupay? Isu ti kinamanagyamanna ken ti panangpampanunotna kadagiti bendision nga adda kenkuana. “Nakitak ti panagregget dagiti kakabsat a mangsaranay ken mangparegta kadagiti agkasapulan iti tulong. Ammok a dagiti kakabsat iti intero a lubong  iramramandak kadagiti kararagda.” Innayonna: “Agyamyamanak ta ni Jehova ti Diosko. Kanayon nga ipaayna dagiti kasapulantayo.” Wen, ti panangpampanunot kadagiti maaw-awattayo a bendision ti tumulong kadatayo a manglaban iti kasta unay a ladingit. No managyamantayo, saantayto a sumuko iti aniaman a parikut a pakaipasanguantayo.—Efe. 5:20; basaen ti Filipos 4:6, 7.

14. Ania a namnama ti segseggaantayo? (Kitaen ti ladawan iti rugi ti artikulo.)

¹⁴ Sipud pay idi unana, pagragragsakan ti ili ni Jehova dagiti maaw-awatda a bendision. Kas pagarigan, kalpasan a naispal dagiti Israelita iti ima ni Faraon ken dagiti buyotna iti Nalabaga a Baybay, inyebkasda ti rag-oda babaen ti kankanta ti panangidaydayaw ken panagyaman. (Ex. 15:1-21) Ita, karaman kadagiti segseggaantayo a bendision ket ti namnamatayo a mapukawton ti saem ken ladingit. (Sal. 37:9-11; Isa. 25:8; 33:24) Panunotem no ania ti riknam inton dadaelen ni Jehova ti amin a kabusorna ken pagnaedennatayo iti natalna ken nalinteg a baro a lubong. Sigurado a malapunostayto iti panagyaman iti dayta nga aldaw!—Apoc. 20:1-3; 21:3, 4.

15. Ania koma ti determinasionmo iti intero a tawen 2015?

¹⁵ Namnamaentayo nga adu a naespirituan a bendision ti ipaay kadatayo ni Jehova bayat ti 2015. Siempre, adda latta dagiti mapasarantayo a suot. Ngem aniaman ti mapasamak, ammotayo a dinatayto pulos baybay-an ni Jehova. (Deut. 31:8; Sal. 9:9, 10) Itultuloyna nga ipaay ti amin a kasapulantayo tapno makapagserbitayo kenkuana a simamatalek. Gapuna, pagtalinaedentayo koma ti determinasiontayo a kas ken propeta Habakuk, a nagkuna: “Nupay ti met laeng kayo a higos saan nga agsabong, ket awan bunga kadagiti puon ti ubas; ti trabaho ti kayo nga olibo mabalin nga agbanag iti pannakapaay, ket dagiti met laeng natukantukad a talon mabalin a saanda a mangpataud iti taraon; ti arban pudno a maisina iti kulongan, ket mabalin nga awan pangen kadagiti alug-og; kaskasdi, no maipapan kaniak, agragsakakto ken Jehova a mismo; agrag-oakto iti Dios ti pannakaisalakanko.” (Hab. 3:17, 18) Wen, iti daytoy a tawen, sapay koma ta sirarag-o a mennamennaentayo dagiti bendision a maaw-awattayo ken matignaytayo a mangaramid iti iparparegta ti tekstotayo iti tawen 2015: “Agyamankayo ken Jehova, ta isu naimbag.”—Sal. 106:1.