“TI SAAN nga agayat, saanna nga ammo ti Dios, ta ti Dios ket ayat,” kuna ti Biblia. (1 Juan 4:8, Ti Baro a Naimbag a Damag Biblia) Ngarud, ti umiso a relihion nasken nga isurona ti panagayat iti pada a tao.

Nasayaat ti ar-aramiden ti adu a relihion, kas iti panangasikaso kadagiti masakit, nataengan, ken napanglaw. Paregtaenda dagiti miembroda a mangyaplikar iti balakad ni apostol Juan, a nangisurat: “No addaanka ket makitam ti maysa a kabsat a makasapul iti tulong ngem dika pulos mangrikna, kasano ti panagkunam nga ay-ayatem ti Dios? Anakko, saantayo koma nga agayat babaen iti sao wenno sarita laeng.   Ipakitatayo ketdi ti pudno a panagayat babaen iti aramid.”—1 Juan 3:17, 18, Naimbag a Damag.

Ngem ania ti mapasamak no aggugubat dagiti nasion? Ti kadi bilin ti Dios nga “ayatem ti padam a tao a cas iti bagim” ket agaplikar laeng no tiempo ti talna ngem saanen no ti maysa a politiko wenno ari kayatna a gubaten ti kabangibangna a nasion?—Mateo 22:39, Ti Biblia, PBS.

Kinuna ni Jesus: “No agiinnayatkayo, maamoanto ti amin a tao a dakayo dagiti adalak.” (Juan 13:35, Naimbag a Damag) Bayat a sungbatam dagiti sumaganad, isaludsodmo iti bagim, ‘Dagiti kadi miembro daytoy a relihion ay-ayatenda ti amin a tattao iti amin a tiempo saan laeng a babaen iti sao no di ket iti pay aramid?’

NO ANIA TI ISURSURO TI BIBLIA:

Imbilin ni Jesus kadagiti adalanna: “Cunac cadacayo nga agdengdengngeg: Ayatenyo dagiti cabusoryo: agaramidcay ti naimbag cadagiti gumura cadacayo.”—Lucas 6:27, Ti Biblia, PBS.

Idi a dagiti soldado arestuenda ni Jesus, inasut ni apostol Pedro ti kampilanna tapno salaknibanna ti Apona. Ngem kinuna ni Jesus: “Ipulangmo ta campilanmo iti calubanna; ta isuamin dagiti mangaramat iti campilan mataydanto iti campilan.”—Mateo 26:52, Ti Biblia, PBS.

Insurat ni apostol Juan: “Ti nalawag a pakaigiddiatan dagiti annak ti Dios kadagiti annak ti diablo isu daytoy: Saan nga anak ti Dios ti siasinoman a di agaramid iti naimbag wenno di agayat iti kabsatna. Daytoy ti mensahe a nangngegyo manipud idi damo: masapul nga agiinnayattayo. Saantayo nga agbalin a kas ken ni Cain a pinaiturayan iti Managdakdakes ket pinatayna ni Abel a kabsatna.”—1 Juan 3:10-12, Naimbag a Damag.

SALUDSOD:

Idagdagadag kadi daytoy a relihion a makigubat dagiti miembrona?

NO ANIA TI ISURSURO TI BIBLIA:

Kalpasan a naimatangan dagiti tattao ti panagaramidna kadagiti milagro, kayat ti dadduma a pagbalinen a panguloda ni Jesus. Ania ti reaksionna? “Ni Jesus ngarud idi a naawatanna a ngannganida umay ket alaenda a piliten, tapno aramidenda nga ari, napan manen nga is-isu idiay bantay.”—Juan 6:15, Ti Biblia, PBS.

Idi naaresto ni Jesus ken siuulbod a naakusaran a sugsugsoganna dagiti tattao nga agrebelde iti turay, kinunana: “Saan a ditoy lubong ti ayan ti pagariak . . . No ditoy lubong koma, makigubat dagiti pasurotko tapno saanak a mayawat kadagiti agtuturay a Judio. Ngem saan a ditoy lubong ti ayan ti pagariak!”—Juan 18:36, Naimbag a Damag.

Idi nagkararag ni Jesus iti Dios mainaig kadagiti adalanna, kinunana: “Intedko  kadakuada ti saom ket ginura ida ti lubong ta kas kaniak, saanda a taga-lubong.”—Juan 17:14, Naimbag a Damag.

SALUDSOD:

Sursuroten kadi daytoy a relihion ti ulidan ni Jesus a saan a makiraman iti politika, uray busoren ida ti dadduma a politiko?

NO ANIA TI ISURSURO TI BIBLIA:

Idi nagbalin a Kristiano dagiti umuna kadagiti di nakugit a Gentil, kinuna ni apostol Pedro: “Ti Dios saan a mangidumduma cadagiti tao: No di ket uray ania a nacion dagiti agbuteng ken agaramid ti kinalinteg makaay-ayoda kencuana.”—Aramid 10:34, 35, Ti Biblia, PBS.

Insurat ni Santiago kadagiti Kristiano idi umuna a siglo: “Kakabsatko, kas mamati ken ni Apotayo a Jesu-Cristo, ti nadayag nga Apo, awan koma ti idumdumayo. Kas pangarigan, dumar-ay iti taripnongyo ti nabaknang ken ti napanglaw. Nagsingsing ti baknang iti balitok ken nagaruat iti napintas idinto a rutayrutay ti pagan-anay ti napanglaw. No ad-adda a bigbigenyo ti nabaknang ket kunayo, ‘Agtugawka ditoy nasayaat a lugar,’ ngem kunayo iti napanglaw, ‘Agtakderka wenno agdalupisakka iti sakaanak,’ nagbasolkayon iti panangidumduma ken panangukom a maibatay iti dakes a panggep.”—Santiago 2:1-4, Naimbag a Damag.

SALUDSOD:

Isursuro kadi daytoy a relihion nga agpapada ti panangmatmat ti Dios kadagiti amin a tattao ken saan a mangidumduma dagiti miembrona gapu iti puli wenno kasasaad ti biag?