IDI Disiembre 2009 ken Enero 2010, dua a kangatuan a korte idiay Russia ti nangideklara a pangta iti kagimongan ti relihion dagiti Saksi ni Jehova. Agparang a maulit manen ti dati a napasamak. Idi inturayan dagiti Soviet ti intero a Russia, rinibu a Saksi ti di nainkalintegan a napabasol kas kabkabusor ti nasion. Naidestiero, naibalud, ken napilit dagitoy nga agtrabaho kadagiti kampo. Idi narpuog dayta a turay, naabsuelto dagiti Saksi ni Jehova. Ti simmukat a nagturay opisial nga insublina ti nadalus a reputasionda. a Ngem adda latta dagiti tattao a desidido a mangpardaya kadagiti Saksi.

Idi rugrugi ti 2009, imparit manen dagiti agtuturay ti panagdayaw dagiti Saksi ni Jehova. Iti laengen bulan ti Pebrero, nasurok a 500 ti naaramid nga imbestigasion iti intero a pagilian. Ania ti panggep dayta? Tapno mapaneknekan ti ipagarupda a pananglabsing dagiti Saksi iti linteg. Kadagiti simmaganad a bulan, rinaut dagiti pulis ti pagtaengan dagiti Saksi ken ti natalna a panaggigimongda kadagiti Kingdom Hall. Kinompiskarda dagiti literatura ken sanikua dagiti Saksi. Pinagtalaw dagiti autoridad ken pinaritanda a sumrek iti pagilian dagiti ganggannaet nga abogado a mangidepdepensa kadagiti Saksi.

Idi Oktubre 5, 2009, dagiti opisial iti aduana (customs) inggawidda ti kargamento a naglaon kadagiti naibatay-Biblia a literatura iti pagbeddengan nga asideg ti St. Petersburg. Nayimprenta  dagita idiay Germany ket nairanta nga agpaay iti adu a kongregasion iti Russia. Sinukimat dayta ti maysa a grupo dagiti agtartrabaho iti ahensia ti aduana a napusgan a mangusisa kadagiti maiparit a kargamento. Apay? Maysa nga opisial a dokumento ti nangideklara a ti kargamento ket “mabalin a naglaon iti literatura a mangpataud iti narelihiosuan a riribuk.”

Kimmaro ti pannakariribuk dagiti Saksi. Dagiti Korte Suprema ti Russian Federation ken ti Altay Republic (paset ti Russia) indeklarada a pangta iti kagimongan ti adu a publikasion dagiti Saksi, pakairamanan ti magasin a basbasaem ita. Namin-adu a nagapelar dagiti Saksi ni Jehova, ket naseknan met iti dayta ti adu a nasion​—ngem awan ti nagmaayanna! Inyetnag ti korte nga ilegal iti pagilian a Russia ti umawat wenno agiwaras kadagidiay a naibatay-Biblia a publikasion.

Ania ti reaksion dagiti Saksi kadagitoy a panangmulit iti reputasionda ken pannakaiparit ti aktibidadda? Ken ania ti ipasimudaag ti desision dagiti Korte maipapan iti wayawaya ti relihion kadagiti amin nga umili iti Russia?

Idi Pebrero 26, 2010, aldaw ti Biernes, agarup 160,000 a Saksi ni Jehova iti intero a Russia ti nagiwaras iti 12 milion a kopia ti espesial a polieto a napauluan Could It Happen Again? A Question for the Citizens of Russia (Mapasamak Kadi Manen? Saludsod Kadagiti Umili ti Russia). Kas pagarigan, ginasut a Saksi ti naguummong kadagiti kalsada iti alas 5:30 ti agsapa iti siudad ti Usol’ye-Sibirskoye, Siberia. Karaman kadakuada ti sumagmamano a sigud a naidestiero idiay Siberia idi 1951 gapu iti pammatida. Inibturanda ti -40°C a temperatura tapno maiwarasda ti sag-20,000 a kopia a nailatang iti tunggal maysa kadakuada.

Tapno ipakaammo dagiti Saksi ni Jehova ti tallo nga aldaw a kampania, nangangayda iti press conference idiay Moscow, ti kabesera ti Russia. Karaman kadagiti naimbitaran nga agsao ket ni Mr. Lev Levinson, maysa nga eksperto manipud Human Rights Institute. Insalaysayna iti apagbiit ti di nainkalintegan a pannakariribuk ken pannakaidadanes dagiti Saksi ni Jehova iti sidong ti panagturay dagiti Nazi ken Soviet Union sa imbinsabinsana ti pannakaabsuelto dagiti Saksi idi agangay. Kinunana pay: “Amin a miembro ti relihion a naidadanes bayat ti panagturay ti Soviet ket imbilin ni Presidente Yeltsin a mawayawayaan ken maisubli iti normal a kasasaadda. Rumbeng met a maipulang kadakuada ti aniaman a banag a napukawda. Awan ti makuna a sanikua dagiti Saksi  ni Jehova bayat ti panagturay ti Soviet Union, ngem naisubli kadakuada ti naimbag a naganda.”

Agpegpeggad a mamulitan manen dayta a naimbag a nagan. “Nupay mismo nga inyebkas idin ti gobierno ti panagbabawina,” kinuna ni Mr. Levinson, “agsagsagaba manen dagitoy a tattao iti bin-ig nga awan nakaibatayanna a pannakaidadanes.”

Nagballigi kadi ti kampania? Kinuna ni Mr. Levinson: “Bayat ti panagturongko iti [press] conference, nakitak dagiti tattao iti siudad a nakatugaw ken mangbasbasa iti bassit a polieto nga iwarwaras ita nga aldaw dagiti Saksi ni Jehova iti intero a Russia. . . . Nakatugaw dagiti tattao a sipapasnek a mangbasbasa iti dayta.” b Adtoy ti sumagmamano a kapadasan.

Iti rehion ti makintengnga a Russia nga ayan ti adu a Muslim, inawat ti maysa a baket ti polieto sa dinamagna no ania dayta. Idi naibaga kenkuana a maipapan dayta iti kalintegan ti tao ken wayawaya iti Russia, kinunana: “Adda met laengen mangas-asikaso kadagitoy nga isyu iti kagimongan! Ngamin agsubsubli manen ti Russia idi tiempo ti Soviet Union. Agyamanak unay. Nasayaat ti ar-aramidenyo!”

Kuna ti maysa a babai a taga-Chelyabinsk a nayawatan iti polieto: “Addan naawatko a kasta a polieto, nabasak payen. Suportarankayo. Awan pay ti ammok a sabali a relihion a kastoy kaorganisado ti panangidepensada iti pammatida. Magustuak ti panagkawkawesyo ken ti nasayaat nga ugaliyo. Nabatad a natibker ti pammatiyo. Iti panagkunak, adda kadakayo ti Dios.”

Idiay St. Petersburg, maysa a lalaki a nakaawaten iti polieto  ti napagsaludsodan no nagustuanna ti nabasana. “Wen,” insungbatna. “Simgarak idi basbasaek dayta, uray la a nakasangitak. Naidadanes ni lolangko [idi tiempo ti Soviet] ket adu ti inestoriana maipapan kadagiti kakaduana a naibalud. Adu dagiti kriminal, ngem adda met dagiti inosente a naibalud gapu iti pammatida. Mayat siguro no maammuan ti amin dayta a pasamak, ket husto ti ar-aramidenyo.”

Impateg dagiti Saksi ni Jehova ti wayawaya a tinagiragsakda idiay Russia iti napalabas a dua a dekada. Nupay kasta, ammoda met a nalaka laeng a maikkat ti wayawayada. Saantayo nga ammo no ti agdama a pannakapadpadakesda ket mangituggod iti sabali manen a nasipnget a tiempo ti pannakaidadanes.

Nupay kasta, determinado dagiti Saksi ni Jehova a mangitultuloy iti panangikasabada iti mensahe ti kappia ken namnama a linaon ti Biblia, aniaman ti mapasamak. Kastoy ti kunaen ti espesial a polieto maipapan iti determinasionda: “Saanto nga agballigi ti panangidadanes. Saanminto nga isardeng ti sitataktika ken siraraem a panagsaomi maipapan ken Jehova ken iti Saona, ti Biblia. (1 Pedro 3:15) Saankami a simmardeng idi nagsagabakami iti kinaranggas dagiti Nazi. Saankami a simmardeng bayat ti nakas-ang a pannakaidadanesmi iti pagilianmi, ket saankami met a sumardeng ita.​—Aramid 4:18-20.”