Ti Panagturpos ti Maika-131 a Klase ti Gilead

“Mapaisemyo ni Jehova”

IDI Setiembre 10, 2011, nagtataripnong dagiti pamilia, gagayyem, ken ti dadduma pay nga indibidual tapno atendaranda ti panagturpos ti maika-131 a klase ti Watchtower Bible School of Gilead. Iti dayta nga agsapa, magagaran dagiti estudiante ken dagiti ispiker. Ngem idi malpasen ti programa, naragsak ken nakaisem ti amin a 9,063 a timmabuno ta nagunggonaanda kadagiti naiparang a palawag, demostrasion, ken interbiu.

Ni Stephen Lett a kameng ti Bagi a Manarawidwid dagiti Saksi ni Jehova ken tserman ti programa ti immuna a nagpalawag. Inlawlawagna dagiti bersikulo ti Biblia a mangtukoy ken Jehova a Dios kas addaan iti piguratibo a bagi. Inlawlawagna a naimbag no kasano nga us-usaren ni Jehova dagiti piguratibo a mata, lapayag, ima, ken takiagna.

Umuna nga inusig ti ispiker ti 2 Cronicas 16:9, nga agkuna a “mapan nga agsublisubli dagiti mata [ni Jehova] iti intero a daga tapno ipakitana ti pigsana maigapu kadagidiay a ti pusoda naan-anay kenkuana.” Naiparegta kadagiti estudiante a maaddaanda iti puso a naan-anay a mangay-ayat ken Jehova. Naibaga kadakuada a matuladda ti Dios babaen iti panangkitada iti naimbag a galad dagiti tattao. Inlawlawag met ni Kabsat Lett ti kaipapanan ti 1 Pedro 3:12, nga agkuna a kanayon a dumngeg dagiti lapayag ni Jehova iti araraw dagiti nalinteg. Inggunamgunamna kadagiti estudiante a kanayon koma nga agkararagda, a laglagipenda a talaga a kayat ni Jehova a denggen dagiti kararagda.

Inusig met ti ispiker ti Isaias 41:13, a sadiay inkari ni Jehova: “Siak, ni Jehova a Diosmo, ig-iggamak ti makannawan nga imam, Daydiay agkunkuna kenka, ‘Dika agbuteng? Siak tulongankanto.’” Sigaganetget a kinuna ni Kabsat Lett: “Amirisenyo daytoy a makaallukoy a sasao ni Jehova. Iyaw-awatna ti imana tapno maiggamanna ti imatayo.” Imbagana kadagiti estudiante a kanayon a palubosanda a tumulong kadakuada ni Jehova ket saanda koma a pulos pagkedkedan dayta. Imbagana met a matuladda ni Jehova babaen ti panangtulongda iti sabsabali.

Kamaudiananna, binasa ni Kabsat Lett ti Isaias 40:11. Inawisna ti tallaong a panunotenda ti kinadungngo a nailadawan iti dayta a teksto. “Arakupennatayo ni Jehova babaen kadagiti takiagna,” kinuna ni Kabsat Lett. “Ubbaennatayo.” Ania koma ti reaksiontayo? Naibalakad kadagiti estudiante nga agtalinaedda koma a naamo ken natalna kas iti urbon a karnero tapno maubba ida ni Jehova.

“Addaankami Itoy a Gameng Kadagiti Damili a Basehas”

Dayta a Nainkasuratan a tema ti inlawlawag ni David Splane a kameng ti Bagi a Manarawidwid. (2 Corinto 4:7) Ania dayta a gameng? Dayta kadi ket pannakaammo wenno sirib? “Saan,” kinuna ti ispiker. “Ti gameng a dinakamat ni apostol Pablo ket ‘daytoy a ministerio’ a ‘panangiparangarang iti kinapudno.’” (2 Corinto 4:1, 2, 5) Pinalagipan ni Kabsat Splane dagiti estudiante a ti lima a bulan a panagadalda ket panagsagana iti espesial nga annongenda iti ministerio. Nakapatpateg dayta nga annongen.

Inlawlawag ti ispiker a ti pisikal a bagitayo ti matuktukoy a “damili a basehas.” Pinagdiligna ti basehas a damili ken basehas a balitok. Di unay maus-usar ti basehas a balitok. Ngem nairanta a mausar dagiti damili a basehas. No ti gameng ikargatayo iti basehas a balitok, mabalin a maisentro ti atensiontayo iti basehas imbes a ti gameng a kargana. “Dakayo nga estudiante, saanyo koma nga ipangpangruna ti bagiyo,” kinuna  ni Kabsat Splane. “Kas misionero, kayatyo nga iturong ti atension dagiti tattao ken Jehova. Dakayo ti nanumo a damili a basehas.”

Intuloy a kinuna ti ispiker nga idi tiempo ti Biblia, adda dagiti saan a mauram a damili a basehas, ket adda met nalagda a kalupkop ti dadduma isu a saanda a matippingan. Ania ti puntona? Iti umuna a bulbulan a kaaddada iti teritoriada, arigna makapataudda iti nalagda a kalupkop. Saandanton a nalaka a masair gapu iti pammabalaw. “Makitayonto a naib-ibturkayo gayam ngem iti impagarupyo,” kinuna ni Kabsat Splane. Daytoy a ministerio ket saan nga intalek ni Jehova kadagiti anghel no di ket kadagiti damili a basehas. “Dayta ti pammaneknek nga agtalek ni Jehova kadakayo,” ingngudo ti ispiker.

“Nagtarayka a Kadua Dagiti Lallaki . . . Kasano, Ngarud, a Makilumbaka Kadagiti Kabalio?”

“Kasano kapaut ken kapartak ti panagtarayyo?” inyimtuod ni Samuel Herd a kameng ti Bagi a Manarawidwid. Apay nga insaludsodna dayta kadagiti estudiante? Pinagdilig ti ispiker ti kapadasan dagiti estudiante ken ti kasasaad idi ni propeta Jeremias. Marigatan idi daytoy a matalek a lalaki kadagiti karit a nakaipasanguanna. Ngem adu pay ti pakasuotan nga agur-uray kenkuana. Isu a sinaludsod kenkuana ni Jehova: “Agsipud ta nagtarayka a kadua dagiti lallaki . . . , ket bannogendaka, kasano, ngarud, a makilumbaka kadagiti kabalio?”​—Jeremias 12:5.

Imbaga ni Kabsat Herd nga agaplikar met daytoy kadagiti estudiante. Kinunana: “Mabalin a mariknayo a kasla nakilumbakayo kadagiti kabalio gapu iti adu nga eksamen. Ngem kinapudnona, arig tattao laeng ti kinalumbayo, saan a dagiti kabalio. Kadagiti lugar a pakaibaonanyo, arigna makilumbakayto kadagiti kabalio gapu iti daddadakkel a karit a diyo ninamnama. Kabaelanyonto ngata a sanguen dagita? Ti pannakasanayyo iti Gilead ti nangisagana kadakayo a makilumba kadagiti kabalio a dikay mapaksuyan.” Pinabilegna dagiti estudiante a kanayon nga agsanayda iti naespirituan tapno maitultuloyda ti rutinada a panagadal iti Biblia ken panagkararag.

Kinuna ni Kabsat Herd a mabalin a maupayto ti sumagmamano a maibaon a misionero wenno saan ida a denggen dagiti tattao. Mabalin nga addanto agsakit wenno mangipagarup a saan a kualipikado. Ngem impanamnamana kadakuada nga adda pangalaanda iti bileg tapno mapagballigianda ti aniaman a narigat a situasion ket saanda a mapaksuyan. “Tattao man wenno kabalio ti pakilumbaanyo,” kuna ti ispiker, “agtalekkayo iti nabileg nga ima ti Dios a mangsaranay kadakayo agingga a malpasyo ti lumba. Iti kasta, agbalinkayo a naballigi a misionero a mangidaydayaw ken Jehova.”

Dadduma Pay a Tampok ti Programa

“Saanka a Mapnek Lattan iti Sumagmamano.” Ni John Ekrann, a kameng ti Branch Committee ti United States, inlawlawagna ti milagro nga inaramid ni propeta Eliseo iti balo a babai a mailako koman kas adipen agraman ti anakna. (2 Ar-ari 4:1-7) Addaan ti balo iti maymaysa a bassit a burnay a pagikkan ti lana. Imbilin ni Eliseo a mangala ti balo iti dadduma pay a burnay manipud kadagiti kaarrubana, ket kinunana: “Saanka a mapnek lattan iti sumagmamano.” Babaen ken Eliseo, simimilagro a pinunno ni Jehova iti lana ti amin a burnay nga inummong ti balo. Kalpasanna, inlako ti balo dagita a lana ket immanay ti naglakuanna a pinangbayadna kadagiti utangna ken adda pay pagbiagda nga agina iti sumagmamano a tiempo.

Ania ti maadal dagiti maibaon a misionero iti daytoy a salaysay? Saan la ketdi a nagpilpili ti balo no ania dagiti burnay a kolektaenna. “Innalana ti uray ania a kita ti burnay a mabalin a kargaan iti lana,” kinuna ti ispiker, “ket nasaysayaat no dakdakkel ti burnay.” Kalpasanna, imparegta ni Kabsat Ekrann kadagiti estudiante nga awatenda koma ti aniaman wenno amin nga annongen, dakkel man wenno bassit dayta. “Saankay koma nga agpilpili,” kinunana. Impalagipna met kadakuada a ti kaadu ti bendision a  naawat ti balo ket nagdepende iti panagtulnogna iti bilin ni Eliseo. Ania ti kayatna a sawen? Ti kaadu ti bendision a maawattayo ket agdepende iti kinabara ti regtatayo ken kadakkel ti pammatitayo. “Saankayo koma a kontento lattan iti bassit,” kuna ti ispiker.

“Tinapayda Kadatayo.” Daytoy a tema a naadaw iti Numeros 14:9 ket imparang ni William Samuelson a manangaywan iti Theocratic Schools Department. Intampokna ti nasayaat nga ehemplo da Josue ken Caleb. Ti sao a “tinapay” iti daytoy a kaso impasimudaagna a nalaka laeng a maparmek dagiti agnanaed iti Canaan ket mapabileg ti Israel iti kasta a kapadasanda. Ania ti maadal ditoy dagiti estudiante? “Iti panagserbiyonto iti ministerio,” kuna ti nagpalawag, “agserbi koma a pakapabilganyo dagiti karit a pakaipasanguanyo.”

“Natibker Kadi ti Pannakayangkla ti Pammatida Para iti Dumteng a Bagyo?” Ni Sam Roberson, maysa kadagiti instruktor, inlawlawagna ti impakdaar ni apostol Pablo a ‘pannakarba ti pammati’ ti sumagmamano. (1 Timoteo 1:19) Indagadagna kadagiti estudiante a tulonganda koma ti dadduma a maaddaan iti natibker a pammati a nayangkla ken Jehova a Dios. “Ti trabahoyo ket umasping iti trabaho ti maysa nga agpampanday iti landok,” kunana. Kasano? Ti mammanday agaramid iti kawar nga agserbi kas natalged nga angkla ti maysa a barko. Umasping iti dayta, tulongan dagiti misionero dagiti iyad-adalanda iti Biblia a mangpatanor kadagiti naespirituan a kualidad a nasken iti pannakaisalakan.

Kinuna ti ispiker a dagiti paset ti kawar ket mayasping iti walo a kualidad a nailanad iti 2 Pedro 1:5-8. Kinuna ni Kabsat Roberson a no tulongan dagiti misionero dagiti iyad-adalanda iti Biblia a mangtarus no kasano nga ipakpakita ni Jehova dagita a kualidad, mabalin a makapatanor dagitoy nga iyad-adalanda iti di magessat a relasion ken Jehova. Maandurandanto ti aniaman a kasla bagyo a pakarigatan a mangsubok iti pammatida.

Kapkapadasan ken Interbiu

Ti sabali pay nga instruktor a ni Michael Burnett kiniddawna nga isalaysay ken iyakto dagiti estudiante ti dadduma a nabiit pay a kapadasanda iti panangasaba. Naragsakan a dimngeg ti tallaong no kasano a nangasaba dagiti estudiante iti shopping mall, airport, binalaybalay, ken uray iti tao a kamali ti tinawaganna a numero.

Kalpasanna, ni Michael Hansen a kameng ti Bethel Family ti United States imparangna ti tema a, “Siraragsak a Panangaramid iti Pagayatan ni Jehova.” (Salmo 40:8) Ininterbiuna ti tallo a lallaki​—ni Stephen McDowell (agdama a misionero iti Panama), ni Mark Noumair (misionero idi iti Kenya), ken William Yasovsky (misionero idi iti Paraguay). Dinakamat ni Mark Noumair dagiti nakaigapuan ragsakda ken baketna bayat ti panagserbida iti destinoda. Nagrag-oanda ti nasinged a relasionda kadagiti Saksi idiay Kenya. Nagragsakanda met ti kinatulnog dagiti kakabsat kadagiti instruksion, ti panagreggetda a mangbalbaliw iti kabibiagda, ken ti panangbendision ni Jehova iti panagreggetda. Impanamnamana kadagiti estudiante a naragragsakdanto pay iti masanguanan.

Kalpasan nga imbasa ti maysa nga estudiante iti maika-131 a klase ti nagpintas a surat ti panagyamanda, ingngudo ni Kabsat Lett ti programa ket pinabilegna nga agtignay koma a nainsiriban dagiti estudiante. No aramidenda dayta, kunana a “mapaisemyo ni Jehova.” Sigurado a maragsakan ni Jehova iti maaramidan dagitoy a misionero bayat a matalek nga agserbida iti pakaibaonanda a teritoria.​—Isaias 65:19.

 [Tsart/Mapa iti panid 31]

ESTADISTIKA TI KLASE

10 pagilian a nairepresentar

34.7 promedio nga edad

19.0 promedio a tawen sipud bautismo

13.5 promedio a tawen iti amin-tiempo a ministerio

[Mapa]

(Para iti aktual a pannakaurnosna, kitaem ti publikasion)

Naipakita iti baba dagiti pagilian a nakaibaonan dagiti naggraduar

PAKAIDESTINUAN DAGITI MISIONERO

BENIN

BRAZIL

BULGARIA

BURUNDI

CAMEROON

CANADA

CENTRAL AFRICAN REPUBLIC

GERMANY

GHANA

HONG KONG

INDONESIA

KENYA

LIBERIA

LITHUANIA

MALAYSIA

MOZAMBIQUE

NEPAL

PANAMA

PARAGUAY

SIERRA LEONE

SLOVAKIA

SOUTH AFRICA

UNITED STATES OF AMERICA

VENEZUELA

[Ladawan iti panid 30]

Iyak-akto dagiti estudiante ti Gilead ti maysa a kapadasanda iti panangasaba

[Ladawan iti panid 31]

Ti Maika-131 a Klase a Nagturpos iti Watchtower Bible School of Gilead

Iti listaan iti baba, nanumeruan dagiti intar manipud iti sango nga agpalikud, ken nailista dagiti nagan manipud iti kannigid nga agpakannawan iti kada intar.

(1) Lesch, C.; Lesch, N.; Shakarjian, P.; Shakarjian, T.; Budden, R.; Budden, K.; Nash, T.; Nash, L.

(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.

(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S.; Thenard, E.; Thenard, A.

(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.

(5) Hartman, E.; Hartman, T.; Goolia, W.; Goolia, K.; Thomas, J.; Thomas, E.; Okazaki, N.; Okazaki, M.

(6) Mills, C.; Mills, A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.

(7) Hansen, B.; Hansen, M.; Fahie, A.; Fahie, M.; Dalgaard, J.; Dalgaard, J.; Andersson, M.; Andersson, R.