Agkasapulan man ti trabahom iti panagpanunot, pigsa, wenno agpadpada, bigbigem nga ‘adda pagsayaatan iti tunggal kita ti panagbannog.’ (Proverbio 14:23) Ania dagita a pagsayaatan? Makatulong ti napasnek a panagtrabaho tapno maipaay dagiti material a kasapulantayo. Agpayso nga ikarkari ti Dios nga ipaayna ti kasapulan dagidiay sipapasnek nga agdaydayaw kenkuana. (Mateo 6:31, 32) Ngem namnamaenna met nga aramidentayo ti pasettayo, nga ikagumaantayo ti agbirok iti pagbiagtayo iti nasayaat a pamay-an.​—2 Tesalonica 3:10.

No kasta ti aramidentayo, matmatmatantayo ti trabahotayo kas pamay-an tapno maitungpaltayo ti panggeptayo. Ti panagtrabaho ket nadayaw a pamay-an tapno maibaklay dagiti responsabilidadtayo. “Maibilang a balligi no masuportaram ti bagim,” kuna ti 25 anyos a ni Joshua. “No kabaelam a bayadan ti kasapulam, matungpal ti panggep ti panagtrabahom.”

Makatulong met ti nadagsen a trabaho tapno maaddaantayo iti panagraem iti bagitayo. Siempre, talaga a narigat ti nadagsen a trabaho ngem no maanusantayo dayta​—uray no kasla makauma wenno narigat​—mapnektayo ta ammotayo a naannurottayo ti nangato a pagalagadan ni Jehova. Naparmektayo ti pagannayasan  a mangbirok iti panglakaan. (Proverbio 26:14) Iti kasta a pamay-an, mangyeg ti trabaho iti pudpudno a pannakapnek. “Nagmayat ti riknak kalpasan ti agmalmalem a panagtrabahok,” kuna ni Aaron a nadakamat iti immuna nga artikulo. “Agpayso a nabannogak​—ken nalabit saan pay a maapresiar ti dadduma ti trabahok​—ngem ammok nga adda nagapuanak.”

Padayawan ti Biblia ti maysa a lalaki a “nasigo iti trabahona” ken ti maysa a babai nga ‘agar-aramid iti aniaman a pakaragsakan dagiti imana.’ (Proverbio 22:29; 31:13) Siempre, saan nga automatiko a nasigo ti maysa ken manmano laeng ti maragragsakan a mangaramid iti banag a saanna a paglaingan. Nalabit dayta ti makagapu nga adu ti saan a maragsakan iti trabahoda; saanda nga ikagkagumaan a sursuruen dayta.

Kinapudnona, mabalin a masursuro ti maysa a tagiragsaken ti dandani amin a trabaho no umiso ti panangmatmatna​—no ipamaysana a sursuruen no kasanona nga aramiden a naimbag ti trabahona. “No aramidem ti amin a kabaelam iti maysa a trabaho ken makitam dagiti resultana, makapnek unay dayta,” kuna ti 24 anyos a ni William. “Dayta a rikna ket saan a maala iti pinnartakan wenno iti kurang a panagregget.”

Saan laeng koma a ti kadakkel ti mateggedam ti pampanunotem. Nasayaat met a panunotem dagitoy a saludsod: ‘Apay a napateg daytoy a trabaho? Ania ngata ti mapasamak no saan a malpas​—wenno saan nga umiso ti pannakaaramidna? Kasano a makatulong ti trabahok iti sabsabali?’

Nangnangruna a nasayaat a panunoten ti naudi a saludsod, ta ad-adda a makapnek ti trabaho no makitatayo a makatulong dayta iti sabsabali. Kinuna a mismo ni Jesus: “Ad-adu ti kinaragsak iti panangted ngem iti panangawat.” (Aramid 20:35) Malaksid kadagidiay direkta a magunggonaan iti serbisiotayo​—kas kadagiti kostumer ken amo​—magunggonaan met dagiti miembro ti pamiliatayo ken dagidiay agkasapulan.

Dagiti miembro ti pamiliatayo. No ipasnek ti ulo ti pamilia ti agtrabaho tapno maipaay ti kasapulan ti pamiliana, matulonganna ida iti dua a pamay-an. Umuna, masiguradona a maipaay dagiti kasapulanda​—taraon, kawes, ken pagtaengan. Iti kasta, maitungpalna ti inted ti Dios a responsabilidadna nga “ipaay ti kasapulan dagidiay kukuana.” (1 Timoteo 5:8) Maikadua, kas nagaget a parasapul iti pagbiag, maisurona a napateg ti napasnek a panagtrabaho. “Nagsayaat nga ulidan ni tatangko iti umiso a kababalin iti trabaho,” kuna ni Shane a nadakamat iti immuna nga artikulo. “Mapagpiaran ken nagaget a trabahador iti intero a biagna, a kaaduanna kas maysa a karpintero. Nasursurok iti ulidanna ti kinapateg ti manomano a panagtrabaho ken panangaramid kadagiti bambanag a mausar ti sabsabali.”

Dagidiay agkasapulan. Binalakadan ni apostol Pablo dagiti Kristiano nga ‘agtrabahoda a sipipinget tapno adda maibunongda iti asinoman nga agkasapulan.’ (Efeso 4:28) Kinapudnona, no igaedtayo ti agtrabaho para iti kasapulantayo ken iti pamiliatayo, mabalin a makatulongtayo met kadagidiay napanglaw. (Proverbio 3:27) Babaen ti napinget a panagtrabaho, makariknatayo iti ad-adu a kinaragsak nga itden ti panangted.

Kinuna ni Jesus iti nalatak a Sermonna iti Bantay: “No ti asinoman iti turay pilitennaka nga agserbi iti maysa a milia, kumuyogka kenkuana iti dua a milia.” (Mateo 5:41) Kasanom a mayaplikar daytoy a prinsipio iti trabahom? Imbes a ti laeng maikalikagum ti aramidem, kumitaka kadagiti gundaway a mangaramid iti ad-adu pay. Mangipasdekka kadagiti kalat; subokem ti kabaelam babaen ti panagtrabahom a nasaysayaat wenno naparpartak ngem iti ekspektarenda kenka. Saysayaatem ti trabahom uray kadagiti kababassitan a detalye.

No aramidem ti ad-adu pay ngem iti maikalikagum, ad-adda a matagiragsakmo ti trabahom. Apay? Gapu ta kontroladom dagiti tignaymo. Ad-adu ti ar-aramidem gapu ta kayatmo, saan ket a gapu ta pilpilitendaka. (Filemon 14) Mainaig iti daytoy, mabalin a malagiptayo ti prinsipio iti Proverbio 12:24: “Ti ima dagidiay nasaet isunto ti agturay, ngem ti managbaybay-a nga ima agpaayto iti pinuersa a panagtrabaho.” Manmano met ketdi ti literal a maadipen wenno mapuersa nga agtrabaho. Nupay kasta, daydiay mangaramid laeng iti makalikaguman mabalin a mariknana a maad-adipen, a kankanayon a madagdagsenan iti ipapaaramid ti sabsabali. Ngem daydiay mangaramid iti ad-adu pay ngem iti makalikaguman​—gapu ta kayatna​—mariknana a kontroladona ti biag ken tigtignayna.

Maapresiar ti napinget a panagtrabaho ngem nasayaat met a laglagipentayo a saan la a trabaho ti napateg iti biag. Agpayso nga iparparegta ti Biblia ti kinagaget. (Proverbio 13:4) Ngem dina iparparegta ti nalabes a panagtrabaho. “Nasaysayaat ti sangarakem nga inana ngem iti dua a rakem a napinget a panagtrabaho ken panangkamkamat iti angin,” kuna ti Eclesiastes 4:6. Ania ti punto? No nalabes ti panagtrabahom, maibus ti amin a tiempo ken pigsam isu a mabalin a saanmonton a matagiragsak ti pagbambannogam. Kas resultana, awan serserbi ti panagtrabahom a kas iti “panangkamkamat iti angin.”

Tulongannatayo ti Biblia a mangpatanor iti balanse a panangmatmat iti trabaho. Nupay ibagana nga igaedtayo ti agtrabaho, balakadannatayo met a ‘siguraduentayo dagiti napatpateg a bambanag.’ (Filipos 1:10) Ania dagitoy? Ramanenna ti pannakikadua kadagiti kapamilia ken gagayyem. Ken napatpateg pay, dagiti naespirituan nga aktibidad kas iti panagbasa iti Sao ti Dios ken panangmennamenna iti dayta.

Dagidiay mangtagtaginayon iti balanse a biag ad-adda a matagiragsakda ti trabahoda. “Nagsayaat nga ulidan ti maysa kadagiti dati nga amok no maipapan iti balanse a panangmatmat iti trabaho,” kuna ni William a nadakamat itay. “Nakapingpinget nga agtrabaho, ken nasayaat ti relasionna kadagiti klientena gapu iti kalidad ti trabahona. Ngem iti ngudo ti aldaw, no malpasen ti trabaho, lipatenna pay laeng dayta ket ipamaysana ti atensionna iti pamiliana ken iti panagdaydayawna. Isu ti maysa kadagiti kararagsakan a tao nga am-ammok!”