Idi tiempo ti Biblia, inusar ti Dios dagiti ukom tapno maisalakan ti ilina manipud kinaawan hustisia. (Uk-ukom 2:18) Ibaga ti Biblia a ti Aldaw ti Panangukom ket naragsakto a tiempo. Daytanto ti panawen a ni Jehova​—ti Ukom ti intero a daga​—pagpatinggaenna ti panagrigrigat ti tao gapu iti kinaawan hustisia.​—Basaem ti Salmo 96:12, 13; Isaias 26:9.

Ni Jesus ti pinili ti Dios a mangted iti kinahustisia kadagiti sibibiag ken kadagiti natay. (Aramid 10:42; 17:31) Adu ti natnatay a dida man la naam-ammo ti Dios. Inton Aldaw ti Panangukom, pagungaren ida ni Jesus tapno maam-ammoda ti pudno a Dios ken maikkanda iti tsansa a mangipakita ti ayatda kenkuana.​—Basaem ti Aramid 24:15.

Iti uneg ti 1,000 a tawen, mapagungarto dagiti natay. (Apocalipsis 20:4, 12) Kasapulanda ti adu a tiempo tapno adalenda dagiti linlinteg ti Dios ken agtulnogda kenkuana. Saan a kas iti kuna ti kaaduan, ipakita ti Biblia a maukomto dagiti tattao depende no anianto ti aramidenda kalpasan a mapagungarda.​—Basaem ti Roma 6:7.

Adda pay dinakamat ti Biblia a sabali nga aldaw ti pannakaukom, a di mapakpakadaan a mapasamak sakbay a mangrugi ti 1,000 a tawen. Maawagan met dayta nga aldaw iti panungpalan, kas naisalaysay kadagiti immun-una nga artikulo iti daytoy a ruar. Iti dayta nga aldaw, dadaelento ti Dios ti amin a managdakdakes. (2 Pedro 3:7) Masapul ngarud nga ikarigatantayo a paneknekan ti ayattayo iti Dios.​—Basaem ti 2 Pedro 3:9, 13.