Maysaka kadi kadagiti minilion a naapektaran iti abnormal a paniempo? Nagduduma dagiti kalamidad a resulta ti abnormal a paniempo ken nagduduma met dagiti makadadael nga epektona. Dagiti napipigsa a bagyo ket masansan nga agresulta iti dadakkel a dalluyon iti baybay, layus, ken adu ti maperhuisio iti napigsa nga angin. Ti nakapigpigsa a tudo ket mabalin nga agresulta iti landslide, ken ti kimat ti pangrugian dagiti wildfire. Dakkel met a perhuisio ti maaramid ti tikag, heat wave, ken winter storm.

 Iti adu a lugar iti lubong, ti abnormal a paniempo a mangyeg iti kalamidad ket mas masansanen a mapasamak ita ken nakarkaron dagiti perhuisio nga aramidenna. “Umad-adu pay nga umad-adu dagiti maap-apektaran kadagiti kalamidad,” inreport ti International Federation of Red Cross and Red Crescent Societies, “ta masansanen ita a mapasamak ti layus, bagyo ken tikag. Kas resultana, tinawen nga adu ti matmatay ken mapukpukawan iti pagsapulan, ken minilion ti madaddadael ti balayda.”

 No mapasamak dagita, adu a tattao ti marigatan ken maapektaran pay ti emosionda. Mabalin a ma-trauma-da ta adu ti napukawda, naperdi ti balayda ken natay ti ay-ayatenda.

 No marigrigatanka kadagiti epekto ti abnormal a paniempo, matulongannaka ti Biblia. Mangipaay iti liwliwa, namnama, ken makatulong a pammagbaga. Saanen a mabilang a biktima dagiti kalamidad a resulta ti abnormal a paniempo ti natulongan ti Biblia. (Roma 15:4) Sungbatanna met ti importante a saludsod a mangparparigat iti adu: Dusdusaennak kadi ti Dios isu nga ipalpalubosna a mapasamak daytoy?

 Isursuro ti Biblia a saan a ti Dios ti mangar-aramid kadagiti situasion a mangparparigat kadagiti tattao. Ipasigurado ti Biblia a “saan a mabalin a masubok ti Dios iti dakes a bambanag, ken saanna met a suboken ti asinoman.” (Santiago 1:13) Ipakita dayta a saan a basol ti Dios ti abnormal a paniempo a mapadpadasantayo ita.

 Adda dagiti naisurat iti Biblia nga inusar idi ti Dios dagiti natural a puersa a mangdusa kadagiti dakes a tattao. Ngem dagita a pasamak ket naiduma iti abnormal a paniempo ita, ta bigla a mapasamak dagita ken apektaranna dagiti nasingpet ken dakes a tattao. Ngem dagiti pasamak a naisurat iti Biblia ipakitana a kanayon a prinotektaran ti Dios dagiti inosente, nasaksakbay a nangpakdaar, ken inlawlawagna dagiti rason nga aramidenna dagita. Kas pagarigan, inlawlawag ti Dios no apay a layusenna ti intero a lubong idi panawen ni Noe, nasaksakbay a nangpakdaar, ken prinotektaranna ni Noe ken ti pamiliana.—Genesis 6:13; 2 Pedro 2:5.

 Tapno ad-adu pay ti maammuam no apay a saan a panangdusa ti Dios dagiti kalamidad ita, kitaem ti artikulo nga “Ania ti Kuna ti Biblia Maipapan Kadagiti Natural a Didigra?”

 Ipakita ti Biblia a ni Jehova a a Dios ket naayat ken mannakipagrikna. Kitaem dagitoy a makaliwliwa a bersikulo.

•   Isaias 63:9: “Iti amin a panagrigatda, naparigatan met [ti Dios].”

   Kayatna a sawen: Apektado ni Jehova no marigrigatan ti maysa.

•   1 Pedro 5:7: “Ipatpategnakayo.”

   Kayatna a sawen: Pampanunoten ni Jehova ti pagsayaatam.

 Agtignay ni Jehova gapu ta ipatpateg ken maassian kadatayo. Liwliwaennatayo babaen kadagiti makatulong a pammagbaga iti Biblia ken ti sigurado a namnama nga ibagana a maawanton dagiti makadadael a didigra a resulta ti abnormal a paniempo.—2 Corinto 1:3, 4.

 Ibagbaga ti Biblia nga ikarkari ni Jehova nga ikkannatayo iti “nasayaat a masakbayan ken namnama.” (Jeremias 29:11) Kayatna nga agbiag dagiti tattao iti paraiso a daga ken saanda nga agbuteng iti mangperhuisio a paniempo.—Genesis 1:28; 2:15; Isaias 32:18.

 Asidegen a tungpalen dayta ti Dios babaen ti Pagarianna, maysa a gobierno idiay langit a ni Jesus ti ari. (Mateo 6:10) Addaan ni Jesus iti sirib ken pannakabalin a kasapulan tapno mapasardengna ti abnormal a paniempo. Idi adda ni Jesus ditoy daga, impakitana nga adda pannakabalinna a mangkontrol iti paniempo. (Marcos 4:37-41) Agturayto nga addaan pannakaawat ken sirib ken isurona dagiti tattao no kasano nga aywanan ti aglawlaw tapno saan a madadael. (Isaias 11:2) Iti panangituray ni Jesus, saanton nga agrigat ti tao gapu iti abnormal a paniempo.

 Baka pampanunotem, ‘Kaano ngarud nga usaren ni Jesus ti pannakabalinna a mangkontrol iti paniempo?’ Tapno maammuam ti sungbat, kitaem ti artikulo a “Kaano nga Iturayan ti Pagarian ti Dios ti Daga?”

 Matulongannaka ti pammagbaga ti Biblia sakbay, bayat, ken kalpasan a mapasamak ti kalamidad nga epekto ti abnormal a paniempo.

•   Sakbay: Agsaganaka tapno ammom a dagus ti aramidem.

   Ti kuna ti Biblia: “Makita ti masirib a tao ti peggad ket aglemmeng, ngem agdiretso latta ti awanan kapadasan ket agsagaba.”—Proverbio 22:3.

   Kayatna a sawen: Panunotem dagiti posible a kalamidad a mapasamak iti lugaryo tapno ammom a dagus ti aramidem ket maprotektaram ti pamiliam.

   Kapadasan: “Idi nag-wildfire, nakapanawkami a dagus ta nakasaganakami. Adda dagiti emergency go bag-mi. Nakasagana dagiti agas ken badbadomi. Agpam-panick dagiti tattao ken saanda a makapanunot a nasayaat. Ngem kompleto dagiti kasapulanmi isu nga agyamyamanak!”—Tamara, California, U.S.A.

•   Bayat: Agpokuska iti kaimportantian.

   Ti kuna ti Biblia: “Uray kasano kabaknang ti maysa a tao, ti biagna ket saan nga agdepende kadagiti adda kenkuana.”—Lucas 12:15.

   Kayatna a sawen: Mas importante ti biag ngem kadagiti bambanag nga adda kenka.

   Kapadasan: “Idi nagbagyo iti Lawin b narba ti balaymi. Diak idi ammo no ania ti aramidek. Ngem nagkararagak ken ni Jehova a Dios. Na-realize-ko a mas importante a sibibiagak. Material laeng a banag dagiti napukawko.”—Leslie, Pilipinas.

•   Kalpasan: Problemaem laeng ti agdama.

   Ti kuna ti Biblia: “Diyo pakadanagan ti problema iti sumaganad nga aldaw, ta adda bukod a problema ti tunggal aldaw.”—Mateo 6:34.

   Kayatna a sawen: Saanmo unay a pampanunoten dagiti posible a mapasamakto pay laeng.

   Kapadasan: “Idi nagbagyo iti Irma nalayus ti balaymi. Immadu dagiti masapul a desisionak ket sobra a na-stress-ak. Sinurotko ti pammagbaga ti Biblia a problemaek laeng ti agdama. Diak idi ekspektaren a kayak a sanguen dagita. Ngem nakitak a kayak gayam ta tultulongannak ni Jehova.”—Sally, Florida, U.S.A.

 Ad-adu pay a tip ti mabasam iti artikulo a “No Dumteng ti Didigra—Dagiti Addang a Mangsalbar iti Biag.”