“Agpakumbabakayo ngarud iti mannakabalin nga ima ti Dios, tapno itan-oknakayto iti naikeddeng a tiempo, bayat nga ipalladawyo kenkuana ti amin a pakadanaganyo, ta ipatpategnakayo.”—1 Pedro 5:6, 7, Baro a Lubong a Patarus.

 “Awatenyo a sipapakumbaba ti mannakabalin nga ima ti Dios tapno itan-oknakay inton dumteng ti tiempona. Itaklinyo kenkuana dagiti amin a pakaringgoranyo gapu ta ipatpategnakayo.”—1 Pedro 5:6, 7, Ti Baro a Naimbag a Damag Biblia.

 Imbaga ni apostol Pedro dagitoy a sasao tapno ipasiguradona kadagiti Kristiano a maikararagda iti Dios dagiti problema ken pakaseknanda. Ipatpateg ti Dios dagidiay napakumbaba, ket sibabaknangto a gunggonaanna ida.

 “Agpakumbabakayo . . . iti mannakabalin nga ima ti Dios.” Iti Biblia, ti ima ti Dios ket masansan a tumukoy iti pannakabalinna a mangisalakan ken mangprotektar. (Exodo 3:19; Deuteronomio 26:8; Esdras 8:22) Ipakpakumbaba dagiti Kristiano ti bagida iti ima ti Dios no agtaltalekda kenkuana. Ammoda dagiti limitasionda ken bigbigenda a saanda a kabaelan dagiti problemada nga is-isuda. (Proverbio 3:5, 6; Filipos 4:13) Kombinsidoda nga usaren ti Dios ti pannakabalinna a tumulong kadakuada iti umiso a tiempo ken iti kasayaatan a pamay-an.—Isaias 41:10.

 “Tapno itan-oknakayto iti naikeddeng a tiempo.” Makapagtalek dagidiay siaanus a mangib-ibtur kadagiti suot nga itan-ok, wenno gunggonaanto met laeng ida ti Dios. Saanna a baybay-an a dagiti adipenna ket masubok iti agnanayon wenno iti labes ti kabaelanda. (1 Corinto 10:13) Ngem no itultuloyda ti agaramid iti naimbag, sigurado a gunggonaanto ida ti Dios iti “naikeddeng a tiempo.”—Galacia 6:9.

 “Bayat nga ipalladawyo kenkuana ti amin a pakadanaganyo, ta ipatpategnakayo.” Maipalladaw wenno maitaklin dagiti Kristiano iti Dios ti amin a pakadanaganda, no sipapakumbaba nga agkararagda kenkuana. Ilawlawag ti maysa a reperensia: “Ipakita ti sao nga itaklin ti panangikagumaan a mangipuruak iti maysa a banag tapno adayon dayta kadatayo. Inggagara dayta a tignay.” No ti maysa a Kristiano impalladawnan iti Dios ti amin a pakadanaganna, maksayan ti panagdanagna ken mariknana ti “talna ti Dios” nga ibagbaga ti Biblia. (Filipos 4:6, 7) Masiguradona a kayat a tulongan ti Dios ta ammona nga ipatpateg isuna ti Dios. Kombinsido met nga usaren ti Dios ti aglaplapusanan a pannakabalinna a tumulong kenkuana nga agibtur.—Salmo 37:5; 55:22.

 Ingudo ti kapitulo 5 ti umuna a surat ni apostol Pedro kadagiti Kristiano. (1 Pedro 1:1) Dagiti Kristiano idi, kas met ita, ket naipasango iti nadumaduma a suot a nangsubok iti pammatida ken sigurado a nagdanaganda. (1 Pedro 1:6, 7) Ammo dagita ni Pedro isu a nangaramid iti naimpusuan ken makaparegta a surat idi agarup 62-64 C.E.—1 Pedro 5:12.

 Inleppas ni Pedro ti suratna babaen ti makaparegta a pammalagip kadagidiay maipaspasango iti suot gapu iti pammatida. No agtultuloyda a napakumbaba ken agtalekda iti Dios, masiguradoda a tulongan ida ti Dios nga agtalinaed a natibker. (1 Pedro 5:5-10) Dagiti sasao ni Pedro ket makaparegta met kadagiti Kristiano a maidaddadanes ita.

 Buyaem daytoy ababa a video tapno makitam ti pakabuklan ti libro nga 1 Pedro.