“Ngem pumigsanto dagidiay mangnamnama ken Jehova. Agtayabdanto a kas kadagiti agila. Agtaraydanto ngem saanda a kumapuy; magnadanto ngem saanda a mabannog.”—Isaias 40:31, Baro a Lubong a Patarus.

 “Ngem dagiti agpannuray iti APO mapabaronto ti pigsada. Agtayabdanto a kasla iti agila; saandanto a mabannog no agtarayda, saandanto a kumapsut no magnada.”—Isaias 40:31, Ti Baro a Naimbag a Damag Biblia.

 Ipaspasigurado ni Jehova a a Dios kadagiti agdaydayaw kenkuana nga ikkanna ida iti kasapulanda a pigsa tapno kayada a sanguen ti aniaman a problemada.

 “Pumigsanto dagidiay mangnamnama ken Jehova.” Sigurado a suportaran ti Dios dagidiay mangnamnama wenno agtaltalek a kayana ken kayatna a tulongan dagidiay agdaydayaw kenkuana. (Proverbio 3:5, 6) Ti maysa a pamay-an a mapapigsa ida ti Dios ket babaen ti nasantuan nga espirituna, wenno aktibo a puersana.—Lucas 11:13.

 “Agtayabdanto a kas kadagiti agila.” Ipakita dagita a sasao ti epekto ti pannakabalin ti Dios iti maysa a tao. Nakadepende ti agila iti agpangpangato a nabara nga angin a maawagan thermal tapno makapangato ken makapagampayag. No nabirokanen ti agila ti thermal, iyukradna dagiti payakna sa rikusrikusenna ti thermal, tapno ngumato a ngumato. Makapagbayag dagiti agila iti tangatang iti adu nga oras babaen ti panagakar-akarda iti nadumaduma a thermal. Iti kasta, bassit laeng nga enerhia ti mausarda bayat nga agturturongda iti papananda.

 “Agtaraydanto ngem saanda a kumapuy.” Pakapuyennatayo dagiti problema ken parigatenna ti emosiontayo. Ngem makapagtultuloytayo latta babaen ti pigsa nga it-ited ti Dios, isu a kayatayo latta nga aramiden ti umiso uray nakarigrigat ti situasion. Insurat ni apostol Pablo, nga adu ti napagballigianna a suot: “Ta adda pigsak a mangsango iti amin a banag gapu iti daydiay mangpabpabileg kaniak.”—Filipos 4:13.

 Impaisurat ti Dios ken propeta Isaias dagitoy a sasao idi maikawalo a siglo B.C.E. Nupay daytoy a bersikulo ket para iti amin a matalek nga adipen ti Dios, mabalin nga impaay ni Jehova dagitoy a sasao tapno maparegta dagiti Judio a maipanto idiay Babilonia iti 70 a tawen. Idi nakasublin dagiti Judio iti dagada manipud Babilonia, nakitada ti pannakatungpal dagita a sasao ti Dios. (Isaias 40:1-3) Inikkan ida ti Dios iti pigsa tapno kayada dayta nga atiddog ken narigat a panagbiahe b manipud Babilonia agingga idiay Jerusalem idi 537 B.C.E.—Isaias 40:29.