“Dika agbuteng, ta addaak kenka. Dika madanagan, ta siak ti Diosmo. Patibkerenkanto, wen, tulongankanto, talaga nga iggamankanto babaen ti kannawan nga imak ti kinalinteg.”—Isaias 41:10, Baro a Lubong a Patarus.

 “Dica agbuteng, ta addaac kenca; dica agkullayaw, ta siac ti Diosmo; papigsaencanto; wen, tulongancanto: wen, tapayaencanto iti akincanawan nga ima ti kinalintegco.”—Isaias 41:10, Ti Biblia.

 Ipaspasigurado ni Jehova a a Dios kadagiti matalek nga agdaydayaw kenkuana a tulonganna ida, aniaman ti problemada.

 “Addaak kenka.” Ik-ikkan ni Jehova dagiti agdaydayaw kenkuana iti rason a saanda nga agbuteng—saanda nga agmaymaysa. Makitkitana ngamin ti mapaspasaranda ken mangmangngegna dagiti kararagda, a kas man la adda iti mismo a sibayda.—Salmo 34:15; 1 Pedro 3:12.

 “Siak ti Diosmo.” Pagkalkalmaen ni Jehova ti rikna dagiti agdaydayaw kenkuana ta ipalpalagipna nga isu latta ti Diosda ken awatenna ti panagdayawda kenkuana. Masiguradoda nga awan ti aniaman a makalapped iti Dios a tumulong kadakuada.—Salmo 118:6; Roma 8:32; Hebreo 13:6.

 “Patibkerenkanto, wen, tulongankanto, talaga nga iggamankanto babaen ti kannawan nga imak ti kinalinteg.” Nagusar ni Jehova iti tallo a sasao tapno ipaganetgetna a sigurado a tulonganna ida. Nagusar iti ilustrasion tapno ipakitana no ania ti aramidenna no agkasapulan iti tulong dagiti adipenna. No adda matuang kadakuada, iyawat ti Dios ti makannawan nga imana tapno bangonenna.—Isaias 41:13.

 Ti kangrunaan a pamay-an a pabpabilgen ken tultulongan ti Dios dagiti agdaydayaw kenkuana ket babaen ti Saona, ti Biblia. (Josue 1:8; Hebreo 4:12) Kas pagarigan, mangipapaay ti Sao ti Dios iti praktikal a sirib kadagiti maipaspasango iti problema, a kas iti kinapanglaw, sakit, wenno ipapatay ti ay-ayatenda. (Proverbio 2:6, 7) Mabalin met nga usaren ti Dios ti nasantuan nga espirituna, wenno aktibo a puersana, tapno matulonganna dagiti agdaydayaw kenkuana nga agpanunot a naimbag ken mapabilegna ti pakinakemda a mangibtur kadagiti pakasuotanda.—Isaias 40:29; Lucas 11:13.

 Dagitoy a sasao ti nangliwliwa kadagiti matalek a Judio a naipan idiay Babilonia idi agangay kas adipen. Impakpakauna ni Jehova nga iti panagpatingga ti pannakaadipen dagiti Judio, madamagda nga adda um-umay a mangparmek ken mangdadael kadagiti nasion iti aglawlawda ken mamagpeggad iti Babilonia. (Isaias 41:2-4; 44:1-4) Nupay napalalo ti buteng ti Babilonia ken dagiti nasion iti aglawlaw gapu iti kasta a damag, saan a masapul nga agdanag dagiti Judio ta salakniban ida ni Jehova. Namitlo nga impasiguradona kadakuada ti sasao a “dika agbuteng.”—Isaias 41:5, 6, 10, 13, 14.

 Idi damo, ti sasao ni Jehova a Dios iti Isaias 41:10 ket para kadagiti matalek a Judio a naipan idiay Babilonia kas adipen. Ngem siniguradona nga agtalinaed dagita a sasao tapno maliwliwa ti amin nga agdaydayaw kenkuana. (Isaias 40:8; Roma 15:4) Tultulonganna ida ita a kas iti panangtulongna kadagiti agserserbi kenkuana idi un-unana.