“Insungbat ni Jesus: ‘Siak ti dalan ken ti kinapudno ken ti biag. Awan ti makapan iti Ama no saan a magna kaniak.’”—Juan 14:6, Baro a Lubong a Patarus.

 “‘Siak ti dalan, ken ti pudno, ken ti biag; awan ti makapan iti Ama no di magna kaniak,’ insungbat ni Jesus.”—Juan 14:6, Ti Baro a Naimbag a Damag Biblia.

 No kayat ti maysa a tao ti agdaydayaw iti Ama, ni Jehova a a Dios, masapul a bigbigenna ti importante a papel ni Jesus.

 “Siak ti dalan.” Inlukat ni Jesus “ti dalan” tapno makaasidegtayo iti Dios ken awatennatayo. Kas pagarigan, dagiti agkararag iti Dios masapul nga ipadalanda iti nagan ni Jesus. (Juan 16:23, 24) Gapu iti ipapatay ni Jesus, posiblen a maikappia dagiti tattao iti Dios, wenno agbalinda a gayyemna. (Roma 5:8-11) Nangted met ni Jesus iti pagtuladan a masapul a tuladen dagiti mayat a makigayyem iti Dios.—Juan 13:15.

 “Siak . . . ti kinapudno.” Kanayon nga insarsarita ken inaramid ni Jesus ti kinapudno. (1 Pedro 2:22) No dumngeg ti maysa a tao kenkuana, maammuanna ti kinapudno maipapan iti Dios. (Juan 8:31, 32) Ni Jesus met “ti kinapudno” gapu ta intungpalna dagiti padto iti Biblia. Isu a natungpal dagiti kari ti Dios.—Juan 1:17; 2 Corinto 1:19, 20; Colosas 2:16, 17.

 “Siak . . . ti biag.” Inted ni Jesus ti biagna tapno agbiag nga agnanayon dagiti mamati kenkuana. (Juan 3:16, 36) Ni Jesus met “ti biag” para kadagiti natay, gapu ta pagungarennanto ida.—Juan 5:28, 29; 11:25.

 “Awan ti makapan iti Ama no saan a magna kaniak.” No kayat dagiti tattao ti agbalin a gayyem ti Dios, masapul nga awatenda ti naidumduma a papel ni Jesus. Ar-aramidenda dayta babaen ti panangipadalanda iti nagan ni Jesus ti kararagda iti Dios, isu a bigbigenda ti autoridad ni Jesu-Kristo. (Juan 15:16) Bigbigenda met a maisalakanda laeng gapu ken Jesus.—Aramid 4:12; Filipos 2:8-11.

 Naglaon ti Juan kapitulo 13 agingga iti 17 iti pammagbaga ni Jesus kadagiti 11 a matalek nga apostolna iti rabii sakbay ti ipapatayna. Iti kapitulo 14, ibagbaga ni Jesus kadagiti adalanna nga ipakitada ti pammati kenkuana ken iti Amana ken ayaten ken agtulnogda kadakuada. (Juan 14:1, 12, 15-17, 21, 23, 24) Impakaammona a nakadekdekket idi ti relasionna ken Amana ken agingga ita. (Juan 14:10, 20, 28, 31) Uray dandanin agsubli idiay langit, impasiguradona kadagiti adalanna a saanna ida a baybay-an. (Juan 14:18) Inkarina met a maipaayandanto iti “katulongan,” a dayta ket ‘ti nasantuan nga espiritu, nga ibaonto ti Ama iti naganna.’ (Juan 14:25-27) Babaen kadagita ken iti dadduma pay a pamay-an, insagana ni Jesus dagiti pasurotna kadagiti pakarigatan a pakaipasanguanda.