“Diyo pakadanagan ti problema iti sumaganad nga aldaw, ta adda bukod a problema ti tunggal aldaw. Ti laeng problema ita nga aldaw ti panunotenyo.”—Mateo 6:34, Baro a Lubong a Patarus.

 “Diyo pakasikoran ti agpaay kadakayo inton bigat; ta ti sumaganad nga aldaw adda bukodna a parikut. Ti parikut ti maysa nga aldaw umdasen iti dayta nga aldaw.”—Mateo 6:34, Naimbag a Damag Biblia.

 Ni Jesus a nangibaga kadagita a sasao impasiguradona kadagiti agdengdengngeg kenkuana a saanda a pakadanagan unay dagiti problema iti masanguanan. Imbes ketdi, pagsayaatanda no asikasuenda laeng dagiti problema a maipasango kadakuada iti tunggal aldaw.

 Saan a kayat a sawen ni Jesus a liklikantayo a panunoten ti mapasamak iti sumaruno nga aldaw wenno saantayon nga agplano para iti masanguanan. (Proverbio 21:5) Imbes ketdi, tultulongannatayo a saan nga agdanag unay maipapan iti posible a mapasamak iti sumaruno nga aldaw. Pukawen ti kasta a panagdanag ti ragsaktayo ken saantayon a makapokus kadagiti trabahotayo. Uray no pakadanagantayo ita dagiti problema a di pay napasamak, ditay masolusionan dagita. Ket masansan a saan met a mapasamak dagita wenno saan met gayam a nakaro dagita a kas iti pampanunotentayo.

 Dagitoy a sasao ni Jesus ket paset ti nalatak a Sermon iti Bantay a masarakan iti Mateo kapitulo 5-7. Iti dayta a sermon ni Jesus, inlawlawagna a ti nakaro a panagdandanag saanna a mapasayaat wenno mapaatiddog ti biagtayo. (Mateo 6:27) Imbagana met a no iyun-unatayo ti Dios iti biagtayo, saantayo a pakadanagan unay ti sumaruno nga aldaw. Ay-aywanan ti Dios dagiti mula ken animal, ket aywananna met dagidiay agserserbi kenkuana.—Mateo 6:25, 26, 28-33.