•   Kayatmo nga aramiden dagiti bambanag a saanka nga agplamplano; kayat ti asawam a nakaplano ti amin.

•   Naulimek ken managbabainka; mannakigayyem ken kaykayat ti asawam ti makikadua iti dadduma.

 Adda kadi kasursuronmo nga ugali ti asawam? No agpokuska iti dayta, baka agproblema ti panagasawayo. Kastoy ti kuna ti Biblia: “Ti mangisarsarita iti [maysa a banag] pagsisinaenna ti nasinged nga aggagayyem.”—Proverbio 17:9.

 Imbes a pagririanyo nga agassawa dagiti makapasuron nga ugali, kitaenyo ti positibo nga anggulo dayta.

Iti daytoy nga artikulo

•  Kitaem ti positibo nga anggulo ti ugali a makapasuron kenka

•  Ti kuna dagiti naasawaan

•  Salsaludsod a pagsaritaan

 Baka ti ugali a pakasursuronam iti asawam ket adda koneksionna iti ugalina a magusgustuam. Kitaem ti tallo a pagarigan:

 “Nabuntog ni lakayko a mangaramid kadagiti bambanag wenno nabayag nga agrubbuat no adda papananmi. Ngem gapu iti dayta nga ugalina, naanus—uray kaniak. No dadduma, masuronak iti kinabuntogna, ngem karaman met dayta iti inayatko kenkuana.”—Chelsea.

 “Kayat ni baketko a detalyado a maiplano ti bambanag; kayatna a kontroladona ti amin. Makaparurod dayta. Ngem gapu ta partikular iti detalye, saan a komporme lattan no adda aramidenna.”—Christopher.

 “Cool lang ni lakayko iti amin a banag, ket makapadismaya dayta. Ngem ti kinarelaksna ti maysa kadagiti ugali a nagustuak kenkuana. Kaykayatko ti kinakalmadona uray makapa-stress-en ti situasion.”—Danielle.

 Kas iti nasursuro da Chelsea, Christopher, ken Danielle, dagiti paglaingan ken pagkapuyan ti maysa nga asawa ket nadumaduma laeng nga anggulo ti nasayaat nga ugalina. Isu a no kayatmo a balbaliwan ti pagkapuyanna, balbaliwam met ti paglainganna, no kasano a saanmo a maibelleng ti maysa laeng a side ti baria.

 Siempre, dadduma nga ugali ti awan a pulos positibo nga anggulona. Kas pagarigan, ibaga ti Biblia a “nalaka nga agpungtot” ti dadduma a tattao. (Proverbio 29:22) Iti dayta a kaso, masapul nga ikagumaan nga ikkaten ti maysa a tao ti “amin a kita ti sakit ti nakem, panagunget, panagpungtot, panagbugkaw, [ken] nasakit a panagsasao.” a—Efeso 4:31.

 Ngem no talaga a makapasuron ti maysa nga ugali, surotem daytoy a pammagbaga ti Biblia: “Itultuloyyo ti agiinnanus . . . uray no adda pangibatayan ti maysa nga agreklamo.”—Colosas 3:13.

 Kasta met, birokem ti positibo nga anggulo ti ugalina, a mabalin a dayta pay ketdi ti inayatmo kenkuana. Imbaga ti asawa a lalaki a ni Joseph: “No agpokuska iti makapasuron nga ugali ti asawam, kasla ti kitkitaem laeng ket ti natirad a paset ti diamond, saan a ti kinapintasna.”

 Umuna, personal a sungbatanyo dagitoy a saludsod. Sa pagsaritaanyo dagiti sungbatyo.

•   Adda kadi ugali ti asawayo nga isu ti pagap-apaanyo? No adda, ania dayta nga ugali?

•   Talaga kadi a madi ti ugalina, wenno makapasuron laeng?

•   Adda kadi positibo nga anggulo dayta nga ugali? No adda, ania dayta, ken apay a kaykayatmo dayta nga aspeto ti kababalin ti asawam?