Sungbat ti Biblia

 Ti bautismo ket pannakaitaneb ti intero a bagi. a Adu a bautismo ti nairekord iti Biblia. (Aramid 2:41) Maysa kadagita ti bautismo ni Jesus, a naitaneb iti Karayan Jordan. (Mateo 3:13, 16) Tawtawen kalpasanna, adda Etiope a lalaki a nabautisaran iti “danum” nga asideg iti kalsada a pagdaldalananna.—Aramid 8:36-40.

 Insuro ni Jesus a masapul nga agpabautisar dagiti pasurotna. (Mateo 28:19, 20) Pinatalgedan ni apostol Pedro dayta a pannursuro.—1 Pedro 3:21.

Iti daytoy nga artikulo

•  Ania ti kaipapanan ti bautismo?

•  Ania ti kuna ti Biblia maipapan iti bautismo dagiti maladaga wenno panagbuniag?

•  Ania ti kaipapanan ti pannakabautisar iti nagan ti Ama, ti Anak, ken ti nasantuan nga espiritu?

•  Basol kadi ti agpabautisar manen?

•  Dadduma pay a bautismo a nadakamat iti Biblia

•  Dagiti di umiso a kapanunotan maipapan iti Nakristianuan a bautismo

 Ania ti kaipapanan ti bautismo?

 Ti bautismo ket simbolo, wenno panangipakita iti publiko, a ti tao a nabautisaran ket nagbabawin kadagiti basolna ken nagkari iti Dios nga aramidenna ti pagayatanna. Ramanen dayta ti kanayon a panagtulnog iti Dios ken ni Jesus. No mabautisaranen ti maysa, mangrugin a magna iti dalan nga agturong iti biag nga agnanayon.

 Ti pannakaitaneb iti danum ket maitutop a simbolo ti panagbalbaliw nga aramiden ti maysa a tao iti biagna. Kasano? Inyarig ti Biblia ti bautismo iti pannakaitabon. (Roma 6:4; Colosas 2:12) No maitaneb ti maysa a tao iti danum, ipakpakitana a natayen no maipapan iti dati a wagas ti panagbiagna. No rumkuasen iti danum, arigna mangrugin ti baro a biagna kas dedikado a Kristiano.

 Ania ti kuna ti Biblia maipapan iti bautismo dagiti maladaga wenno panagbuniag?

 Saan nga isursuro ti Biblia a masapul a mabautisaran wenno “mabuniagan” dagiti maladaga wenno babassit nga ubbing. b Imbes ketdi, isursurona nga adda dagiti masapul nga aramiden ti tao a kayatna ti agpabautisar. Kas pagarigan, masapul a maawatanna uray laeng dagiti kangrunaan a pannursuro ti Sao ti Dios ken iyap-aplikarnan dagita. Nagbabawyannan dagiti basolna. Ken babaen ti kararag, indedikarnan ti biagna iti Dios. (Aramid 2:38, 41; 8:12) Saan a maaramid dagita dagiti maladaga.

 Ania ti kaipapanan ti pannakabautisar iti nagan ti Ama, ti Anak, ken ti nasantuan nga espiritu?

 Imbilin ni Jesus kadagiti pasurotna a ‘pagbalinenda nga adalan dagiti tattao, a bautisaranda ida iti nagan ti Ama ken iti nagan ti Anak ken iti nagan ti nasantuan nga espiritu ken isuroda a tungpalenda ti amin nga imbilinna kadakuada.’ (Mateo 28:19, 20) Ti sasao nga “iti nagan ti” kaipapananna a bigbigen ti mabautisaran ti autoridad ken posision ti Ama ken ti Anak, kasta met ti papel ti nasantuan nga espiritu ti Dios. Kas pagarigan, imbaga ni apostol Pedro iti lalaki a nayanak a pilay: “Iti nagan ni Jesu-Kristo a Nazareno, magnaka!” (Aramid 3:6) Nalawag ti kaipapananna—binigbig ni Pedro ti autoridad ni Kristo ken imbagana a ni Kristo ti nangaramid iti milagro.

•   “Ti Ama” ket isu ni Jehova c a Dios. Kas Namarsua, Manangted iti Biag, ken Mannakabalin-amin a Dios, ni Jehova ti addaan iti kangatuan nga autoridad.—Genesis 17:1; Apocalipsis 4:11.

•   “Ti Anak” ket ni Jesu-Kristo, a nangted iti biagna para kadatayo. (Roma 6:23) Maisalakantayo laeng no bigbigen ken apresiarentayo ti napateg a papel ni Jesus iti panggep ti Dios para iti sangatauan.—Juan 14:6; 20:31; Aramid 4:8-12.

•   “Ti nasantuan nga espiritu” ket ti aktibo a puersa ti Dios, wenno ti agtigtignay a pannakabalinna. d Inusar ti Dios ti nasantuan nga espirituna nga agparsua, mangted iti biag, mangidanon iti mensahena kadagiti propeta ken iti dadduma, ken mangpabileg kadakuada a mangaramid iti pagayatanna. (Genesis 1:2; Job 33:4; Roma 15:18, 19) Inusar met ti Dios ti nasantuan nga espiritu a mangidalan kadagiti nagsurat iti Biblia tapno maisuratda ti pampanunotna.—2 Pedro 1:21.

 Basol kadi ti agpabautisar manen?

 Adu ti agdesision a mangbaliw iti relihionda. Ngem no ngay nabautisaranda iti dati a relihionda? Makabasolda kadi no agpabautisarda manen? Wen ti sungbat ti dadduma. Nalabit imbasarda dayta iti kuna ti Efeso 4:5: “Maysa nga Apo, maysa a pammati, maysa a bautismo.” Ngem saan a kayat a sawen daytoy a bersikulo a saan a mabalin nga agpabautisar manen ti maysa a tao. Kasano a kasta?

 Konteksto. Ipakita ti konteksto ti Efeso 4:5 nga ipagpaganetget ni apostol Pablo a masapul nga agkaykaysa dagiti pudno a Kristiano iti patpatienda. (Efeso 4:1-3, 16) Posible laeng ti kasta a panagkaykaysa no sursurotenda ti maymaysa nga Apo a ni Jesu-Kristo; maymaysa ti pammatida, wenno pannakaawatda kadagiti pannursuro ti Biblia; ken agpapada dagiti sursurotenda a kualipikasion para iti bautismo.

 Imparegta ni apostol Pablo nga agpabautisar manen ti dadduma a nabautisaran idin. Ngamin, nabautisaranda a saanda a naan-anay a naawatan dagiti pannursuro ni Kristo.—Aramid 19:1-5.

 Ti umiso a pakaibatayan ti bautismo. Tapno awaten ti Dios ti panagbautisar, masapul a naibatay dayta iti umiso a pannakaammo kadagiti kinapudno iti Biblia. (1 Timoteo 2:3, 4) No mabautisaran ti maysa maibatay kadagiti narelihiosuan a sursuro a kontra iti Biblia, saan nga awaten ti Dios dayta a panagbautisar. (Juan 4:23, 24) Mabalin a nadalus ti motibo dayta a tao, ngem saan a “maitunos iti umiso a pannakaammo” ti ar-aramidna. (Roma 10:2) Tapno anamongan ti Dios, masapul a sursuruenna dagiti kinapudno iti Biblia, iyaplikarna dagiti nasursurona, idedikarna ti biagna iti Dios, ken agpabautisar manen. No aramidenna dagita, saan a basol ti panagpabautisarna manen. Kinapudnona, dayta ti umiso nga aramidenna.

 Dadduma pay a bautismo a nadakamat iti Biblia

 Mabasa iti Biblia ti dadduma pay a bautismo a naiduma iti pannakaitaneb iti danum dagiti pasurot ni Kristo. Dagitoy ti dadduma a pagarigan.

 Ti panangbautisar ni Juan a Mammautisar. e Binautisaran ni Juan dagiti Judio ken dagiti proselita kas simbolo ti panagbabawida iti panagsukirda iti Mosaiko a Linteg—ti Linteg nga inted ti Dios kadagiti Israelita babaen ken Moises. Ti bautismo ni Juan insaganana dagiti tattao a mangbigbig ken mangawat iti Mesias, ni Jesus a taga-Nazaret.—Lucas 1:13-17; 3:2, 3; Aramid 19:4.

 Ti bautismo ni Jesus. Naidumduma ti pannakabautisar ni Jesus nga inaramid ni Juan a Mammautisar. Perpekto ni Jesus ken awan ti basolna. (1 Pedro 2:21, 22) Isu a ti bautismona ket saan a panagbabawi wenno “panagkiddaw iti Dios iti nasayaat a konsiensia.” (1 Pedro 3:21) Imbes ketdi, ipakitana nga idatdatagna ti bagina iti Dios tapno aramidenna ti pagayatanna kas naipadto a Mesias, wenno Kristo. Ramanen daytoy ti panangitedna iti biagna para kadatayo.—Hebreo 10:7-10.

 Pannakabautisar iti nasantuan nga espiritu. Agpada a dinakamat ni Juan a Mammautisar ken ni Jesu-Kristo ti pannakabautisar iti nasantuan nga espiritu. (Mateo 3:11; Lucas 3:16; Aramid 1:1-5) Naiduma dayta iti pannakabautisar iti nagan ti nasantuan nga espiritu. (Mateo 28:19) Apay?

 Limitado ti bilang dagiti pasurot ni Jesus a nabautisaran iti nasantuan nga espiritu. Isuda ket dinutokan ti nasantuan nga espiritu ta naayabanda idiay langit kas kadua ni Kristo nga ar-ari ken papadi a mangituray iti daga. f (1 Pedro 1:3, 4; Apocalipsis 5:9, 10) Iturayandanto ti minilion a pasurot ni Jesus nga addaan iti namnama nga agbiag nga agnanayon iti Paraiso a daga.—Mateo 5:5; Lucas 23:43.

 Pannakabautisar ken Kristo Jesus ken iti ipapatayna. Dagidiay nabautisaran iti nasantuan nga espiritu ket “nabautisaran [met] ken Kristo Jesus.” (Roma 6:3) Agaplikar ngarud daytoy a bautismo kadagiti nadutokan a pasurot ni Jesus a kaduananto nga agturay idiay langit. No mabautisaranda ken Jesus, agbalinda a miembro ti kongregasionna a buklen dagiti dinutokan ti espiritu. Ni Kristo ti Ulo, ket isuda ti bagi.—1 Corinto 12:12, 13, 27; Colosas 1:18.

 Dagiti Kristiano a dinutokan ti espiritu ket ‘nabautisaran [met] iti ipapatay’ ni Jesus. (Roma 6:3, 4) Kas panangtuladda ken Jesus, agsaksakripisioda tapno makapagtulnogda iti Dios ken insukoda ti namnamada nga agbiag nga agnanayon ditoy daga. Makompletoda daytoy simboliko a bautismo no matayda ken agungarda idiay langit kas espiritu a parsua.—Roma 6:5; 1 Corinto 15:42-44.

 Pannakabautisar iti apuy. Imbaga ni Juan a Mammautisar kadagiti dumdumngeg kenkuana: “Bautisarannakayto [ni Jesus] iti nasantuan nga espiritu ken iti apuy. Nakaiggem iti pala a pagtaep, ken dalusannanto a naimbag ti pagirikan ket urnongennanto ti trigo iti kamarinna, ngem puorannanto ti taep iti apuy a saan a maiddep.” (Mateo 3:11, 12) Paliiwem ta adda nagdumaan ti pannakabautisar iti apuy ken ti pannakabautisar iti nasantuan nga espiritu. Ania ti kayat a sawen ni Juan iti daytoy nga ilustrasion?

 Ti trigo irepresentarna dagidiay dumngeg ken agtulnog ken Jesus. Posible a mabautisaran dagitoy iti nasantuan nga espiritu. Ti taep isimbolona dagidiay saan a dumngeg ken Jesus. Ti pagtungpalanda ket bautismo iti apuy, a mangisimbolo iti agnanayon a pannakadadaelda.—Mateo 3:7-12; Lucas 3:16, 17.