Natay Kadi ni Jesus iti Krus?

I-PLAY

Sungbat ti Biblia

Ti krus ket ibilang ti adu kas gagangay a simbolo ti Kristianidad. Ngem saan a dakamaten ti Biblia ti itsura ti kayo a nakatayan ni Jesus, isu nga awan a talaga ti makaammo iti dayta. Nupay kasta, adda pammaneknek ti Biblia a natay ni Jesus iti maysa a kayo saan ket nga iti krus.

Kadawyan nga usaren ti Biblia ti Griego a sao nga stau·rosʹ no tukoyenna ti kayo a nakatayan ni Jesus. (Mateo 27:40; Juan 19:17) Nupay ti dadduma ipatarusda dayta a sao iti “krus,” umanamong ti adu nga iskolar a ti kangrunaan a kaipapananna ket “maysa a kayo.” a Sigun iti A Critical Lexicon and Concordance to the English and Greek New Testament, ti sao nga stau·rosʹ “dina kaipapanan ti dua a kayo a nagkinnuros.”

Ti Biblia usarenna ti Griego a sao a xyʹlon a katupag ti stau·rosʹ. (Aramid 5:30; 1 Pedro 2:24) Daytoy a sao kaipapananna ti “kayo” wenno “poste.” b Gapuna, kuna ti The Companion Bible: “Awan a pulos ti nadakamat iti pagsasao a Griego [iti Baro a Tulag] a mangipasimudaag iti dua a kayo.”

Anamongan kadi ti Dios ti panagusar iti krus iti panagdayaw?

Ti crux simplex—ti Latin a sao para iti maysa a kayo a nausar a pakailansaan dagiti kriminal

Aniaman ti itsura ti kayo a nakatayan ni Jesus, ipakita dagiti sumaganad nga impormasion ken teksto ti Biblia a di rumbeng nga usaren ti krus iti panagdayaw.

Saan nga awaten ti Dios ti panagdayaw nga agusar iti imahen wenno simbolo, agraman ti krus. Binilin ti Dios dagiti Israelita a saanda nga agusar iti “langa ti aniaman a simbolo” iti panagdayawda, ken nabilin met dagiti Kristiano liklikanda ti “idolatria.”— Deuteronomio 4:15-19; 1 Corinto 10:14.
Dagiti Kristiano idi umuna a siglo saanda a nagusar iti krus iti panagdayawda. c Dagiti pannursuro ken ulidan dagiti apostol ket maysa a pagtuladan a rumbeng a suroten ti amin a Kristiano.— 2 Tesalonica 2:15.
Nagtaud kadagiti pagano ti panagdayaw iti krus. d Ginasut a tawen kalpasan ti ipapatay ni Jesus, idi simmina ti simbaan kadagiti pannursurona, dagiti baro a miembro ti simbaan “napalubosanda a mangitultuloy kadagiti pagano a simbolo,” agraman ti krus. (The Expanded Vine’s Expository Dictionary of New Testament Words) Ngem saan nga anamongan ti Biblia ti panagusar kadagiti pagano a simbolo tapno maaddaanda kadagiti baro a miembro.—2 Corinto 6:17.

a Kitaem ti New Bible Dictionary, Third Edition, edited by D. R. W. Wood, panid 245; Theological Dictionary of the New Testament, Volume VII, panid 572; The International Standard Bible Encyclopedia, Revised Edition, Volume 1, panid 825; ken The Imperial Bible-Dictionary, Volume II, panid 84.

b Kitaem ti The Expanded Vine’s Expository Dictionary of New Testament Words, panid 1165; A Greek-English Lexicon, da Liddell ken Scott, Ninth Edition, panid 1191-1192; ken Theological Dictionary of the New Testament, Volume V, panid 37.

c Kitaem ti Encyclopædia Britannica, 2003, entry “Cross”; The Cross—Its History and Symbolism, panid 40; ken The Companion Bible, Oxford University Press, appendix 162, panid 186.

d Kitaem ti The Encyclopedia of Religion, Volume 4, panid 165; The Encyclopedia Americana, Volume 8, panid 246; ken Symbols Around Us, panid 205-207.