Adda tiempo nga impalubos ti Dios a maaddaan ti lalaki iti dua wenno ad-adu pay nga asawa. (Genesis 4:19; 16:1-4; 29:18-29) Ngem saan a dayta ti urnos ti Dios. Maymaysa ti intedna nga asawa ni Adan.

 Inautorisaran ti Dios ni Jesu-Kristo a mangipasdek manen iti orihinal a pagalagadanna—ti pannakaadda ti maymaysa laeng nga asawa. (Juan 8:28) Idi napagsaludsodan ni Jesus maipapan iti panagasawa, kinunana: “Ti nangparsua kadakuada nanipud idi damo inaramidna ida a lalaki ken babai ket kinunana, ‘Iti daytoy a rason, ti maysa a lalaki panawannanto ti amana ken ti inana ket makitiponto iti asawana, ket dagiti dua maymaysadanton a lasag.’”—Mateo 19:4, 5.

 Idi agangay, kastoy ti impaltiing ti Dios nga isurat ti maysa kadagiti adalan ni Jesus: “Tunggal lalaki maaddaan koma iti bukodna nga asawa ket tunggal babai maaddaan koma iti bukodna nga asawa.” (1 Corinto 7:2) Ibaga met ti Biblia nga asinoman a lalaki a kameng ti kongregasion Kristiano a maipaayan iti naisangsangayan nga annongen ket masapul nga “asawa ti maymaysa a babai.”—1 Timoteo 3:2, 12.