NADISENIO KADI?

Ti Echolocation ti Panniki

I-PLAY

Makakita dagiti panniki, ngem agus-usar ti kaaduan kadakuada iti echolocation tapno mariknada dagiti adda iti aglawlawda bayat ti rabii. Ania ti echolocation? Dayta ti abilidad a mangammo iti distansia dagiti banag babaen ti maibalandra nga uni. Kas pagarigan, mailasin ti dadduma a panniki no lamok wenno abal-abal ti maysa nga insekto sigun iti kapartak ti panagpayakpakna.

Panunotem: Kaaduan a panniki ket agpataud iti uni iti karabukobda sada iruar dayta iti ngiwat wenno agongda. Usarenda dagiti dadakkel a lapayagda a mangdetek kadagiti kallangugan (echo) no maibalandra ti uni iti maysa a banag. Gapu kadagita a kallangugan, mangpataud ti isip ti panniki iti 3D image kadagiti banag iti aglawlawna. Kas resulta, maammuan ti panniki ti lokasion, kangato, ken distansia ti maysa a banag uray no natagari ti aglawlaw gapu iti uni ti dadduma a panniki.

Masapul nga eksakto la unay ti echolocation ti maysa a panniki. Ngamin no agkamali iti uray maysa laeng a millisecond (kakasangaribu ti maysa a segundo), agingga iti 17 a sentimetro (6.7 a pulgada) ti pagmintisan ti panniki iti targetna. Sigun iti dadduma a researcher, “kasla imposible” ti kinaeksakto a nasursurok ngem iti maysa a millisecond. Nupay kasta, ipakita dagiti eksperimento a ti kinaeksakto ti kallangugan dagiti panniki ket 10 a nanosecond (kakasangagasut a milion ti maysa a segundo). Isu a madetekda ti eksakto a distansia, no dayta ket maysa a milimetro wenno awan pay!

Nakaaramid dagiti researcher iti elektroniko a baston nga agusar iti echolocation. Inaramidda dayta tapno matulonganda dagiti bulsek a mangpanunot no ania dagiti adda iti aglawlawda ket malisianda dagiti posible a pakaitim-ogan ken pakaidungparanda, a kas iti agdawdawadaw a sanga ti kayo. “Napanunotmi nga aramiden daytoy a baston ta bilibkami iti echolocation dagiti panniki,” kinuna da Brian Hoyle ken Dean Waters, a dua kadagiti nangdisenio iti baston a maawagan iti Batcane.