Dagiti inheniero nga agim-imbento iti robot ket mangar-aramid kadagiti aparato a makatulong kadagiti doktor nga agopera kadagiti nailet a paset ti bagi a bassit laeng ti iwaenda. Ti maysa a naimbentoda ket naitulad iti nalapiot nga ima, wenno gamat, ti kurita.

 Panunotem: Makagammat, makaiggem, ken makapespes ti walo a mabennat ken nalapiot nga ima ti kurita, uray kadagiti nailet a paset. Mapilkona dagiti gamatna iti aniaman a direksion ken mapasikkilna ti dadduma a paset dagita no kasapulan.

 Patien dagiti agsuksukisok (researcher) a ti nalukneng ken nalapiot a robot nga ima a kas iti gamat ti kurita ket nakapatpateg iti panagopera a bassit laeng ti maiwa a paset ti bagi. Babaen daytoy nga aparato, posiblen nga operaen dagiti pasiente nga agkasapulan koma iti narikrikut nga operasion.

 Kitaem ti panagkuti dagiti nalapiot a gamat ti kurita

 Naimbento ken maus-usaren kadagiti kasla aktual nga operasion dagiti kasta a robot nga ima. Ti maysa a paset ti 135 a milimetro (5 inches) ti kaatiddogna nga ima ti mangingato ken mangiggem kadagiti nalukneng a lalaem a saanda a maan-ano idinto ta ti sabali pay a paset ti mangaramid iti aktual nga operasion. Kuna ni Dr. Tommaso Ranzani, a miembro ti grupo dagiti nangimbento iti aparato, “patienmi a daytoy a pamay-an ket pangrugian ti baro ken nasaysayaat a bersion nga addaanto kadagiti nasaysayaat pay a feature.”

 Ania ti makunam? Resulta kadi ti ebolusion ti ima ti kurita? Wenno adda nangdisenio iti dayta?