Kasla adda social media ti amin a gagayyemmo, ken kanayon a pagsasaritaanda dayta. Baka kankantiawandaka pay ketdi gapu ta awan account-mo. Ania ti masapul a maammuam maipapan iti situasionmo? Ken ania ti mabalinmo nga aramiden maipapan iti dayta?

 Saan la a sika ti kasta. Saan nga ipalubos ti adu a nagannak nga agusar dagiti annakda iti social media. Mabalin a pampanunotenda a ti panagusar iti social media ket adda koneksionna kadagitoy:

•   depresion ken dadduma pay a problema iti mental a salun-at.

•   pannakakita iti pornograpia, ken pannakaipasango iti sexting ken cyberbullying.

•   panagaapa dagiti aggagayyem.

 Pinili ti adu a tin-edyer nga isardengda ti agusar iti social media. Nakitada a mismo nga ad-adu ti pagdaksanna ngem iti pagimbaganna kadakuada ti social media. Kitaentayo dagitoy agpaypayso a kapadasan:

•   Naamiris ni Priscilla a maib-ibus ti orasna iti panagusarna iti social media imbes a mausarna koma kadagiti nasaysayaat a banag.

•   Saan a makontrol ni Jeremy ti panagparang dagiti saan a nasayaat a post iti social media-na.

•   Nakita ni Bethany a gapu iti social media, nakapokus laengen iti ar-aramiden ti sabali a tattao.

 “In-delete-kon ti social media app-ko, ket imbag laengen ta inaramidko dayta. Saankon a birbiroken dayta, ken ad-adun ti tiempok nga agpokus kadagiti napatpateg a bambanag.”—Sierra.

 “Makapaadik ti social media ken kanayon idi a pampanunotek ti reaksion ti dadduma a tattao kadagiti post-ko. Diak kayat ti kasta. Saan a nalaka para kaniak nga i-delete ti account-ko, ngem idi inaramidko dayta, nasaysayaaten ti riknak. Nataltalnan ti panunotko.”—Kate.

 Agtulnogka kadagiti bilin dagiti nagannakmo. Surotem dagiti bilinda a saanka a masuron wenno agreklamo tapno maipakitam a nanakemkan.

 Prinsipio ti Biblia: “Iyebkas ti maag ti amin a riknana, ngem sikakalma a kontrolen ti masirib ti riknana.”—Proverbio 29:11.

 Mabalin nga adda dagiti mangibaga kenka nga agusarka iti social media a saanmo nga ibagbaga kadagiti nagannakmo wenno mangaramidka iti account a saanda nga ammo. Saan a nasayaat dayta! No adda ilimlimedmo, mabalin a madandanagan ken makonkonsiensiaka. Sika met laeng ti agproblema no maammuanda, ket sigurado a madadael ti panagtalekda kenka.

 Prinsipio ti Biblia: “Kayatmi ti agbiag a mapagtalkan iti amin a banag.”—Hebreo 13:18.

 Desisionmo koma dayta. Kas kadagiti agtutubo a nadakamaten, mabalin nga adu dagiti mapanunotmo a rason a liklikam ti social media. No makitam a saan a nasayaat ti epektona kenka ti social media, liklikam dayta saan la a gapu ta desision dagiti nagannakmo, no di ket desisionmo a mismo dayta. Isu nga inton agdamag kenka dagiti padam nga agtutubo maipapan iti dayta, saankanton a mabain ken mabalin a saandakanto unayen a kantiawan.

 Laglagipem: Agtulnogka kadagiti nagannakmo, ken mangbirokka kadagiti pagtutunosanyo tapno ti desisionda ket isu met laeng ti desisionmo. Total, agbiagka met latta uray awan pay social media account-mo.