“Puor! Adda puor!” Bayat a mangmangan ni Sandra iti balay ti katuganganna, nakitana nga adda rumrummuar nga apuy iti ridaw ti bodega iti asideg ti balay. Dagus a nagtignayda ken lakayna a Thomas. Innala ni Sandra ti fire extinguisher. Dagus met a napan kinita ni Thomas ti bodega. Nagdardaras nga inyawat ni Sandra ken Thomas ti fire extinguisher, ket dayta ti inusar ni Thomas a mangiddep iti apuy. Inyestoria ni Sandra: “No saankami a timmulong, dimmapo koman ti bodega.”

Kasano a nakapagtalinaed da Sandra ken Thomas a kalmado ken nakapagtignayda a dagus? Nasuruanda no ania ti aramidenda no adda puor, agraman ti agarup 1,000 a boluntario nga agtrabtrabaho iti sanga nga opisina dagiti Saksi ni Jehova iti Selters, Germany.

Saan laeng nga opisina ken kuarto ti adda iti 30 nga ektaria a pasilidad iti Selters. Adda pay laundry, printery, ken nagduduma a workshop​—lugar nga addaan kadagiti materiales a mabalin a pagtaudan iti apuy. Isu a nangyurnos ti Safety and Environment Department ti sangay iti programa a panangisuro iti kinatalged no adda puor. Umuna, maysa a grupo a maaw-awagan iti Emergency Response Team ti agprakpraktis a kadua ti fire department iti lugarda. Maikadua, regular nga ar-aramiden ti amin a boluntario dagitoy:

• Agpraktis nga agbakuit.

• Makiraman kadagiti lektiur maipapan iti kinatalged no adda puor.

• Agsursuro a mangiddep iti apuy bayat a bassit pay laeng.

Gapu iti dayta, adda dagiti nasursuro dagiti boluntario nga abilidad a kasapulan unay no adda dagiti emerhensia.

Bayat ti panagpraktis, nasursuro dagiti boluntario ti natalged a panangiddep iti apuy. Elementaria pay laeng ni Christin idi naudi a naisuro kenkuana ti maipapan iti kinatalged no adda puor. Inyestoriana ti pannakasanayna iti sangay: “Innalak ti fire extinguisher, inikkatko ti lock-na, sa sinebsebak ti apuy manipud iti paggapuan ti angin. Ta no saan a kasta ti inaramidko, baka napuoran ti rupak. Naiddepko ti apuy a sisiak laeng! Nasursurok met nga iddepen ti apuy a kadua ti uppat wenno lima a tao.”

Makatulong dagiti panagpraktis tapno “maksayan ti panagbuteng iti puor,” kuna ni Daniel, nga agtrabtrabaho iti sanga nga opisina kas parasanay iti natalged a panangiddep iti apuy. Inlawlawagna: “No adda puor, masansan a mapamulengleng dagiti tattao. Mabutbutengda ket pampanunotenda, ‘Ania ti aramidentayo? Kasanotayo nga usaren ti fire extinguisher?’ Ngem no ammoda ti aramidenda, alistoda a mapasardeng ti puor ket saanen a dumakkel dayta.” Imbagana a bayat ti panagsanay, “masursuro dagiti agsansanay no kasano ti umiso a panangusar iti fire extinguisher tapno maiddep ti apuy no adda emerhensia. Maaddaanda iti kompiansa ket tumuredda nga agtignay no kasapulan.”

Inyebkas ti adu ti panagyamanda iti pannakasanayda. Inamin ni Christin a nadakamat itay: “Damok idi ti agiggem iti fire extinguisher. Panagkunak, masapul a masanay ti amin iti daytoy.” Part-time volunteer ni Nadja iti sanga nga opisina ken agtrabtrabaho iti airport. Imbagana: “Iti napalabas a sangapulo a tawen a panagtrabahok iti airport, maileklektiur laeng ti kinatalged no adda puor. Ngem nagbalinak a naturtured gapu iti pannakasanayko iti sanga nga opisina. Ammok itan ti aramidek no adda uram.”

Bigbigen ni Sandra a nakatulong ti pannakasanayna iti sanga nga opisina nga agtignay a dagus idi adda iti balay ti katuganganna. “Saanak unayen a maamak nga agusar iti fire extinguisher,” kunana. “Mayat no adda tinawen a panagsanay. Nagdakkel ti naitulong daytoy kaniak.”

Regular a mangsansanay ti fire department iti Selters kadagiti pasilidad ti sanga nga opisina. Inlawlawag ti head dagiti bombero a ni Theo Neckermann no apay: “Responsabilidad ti fire department-mi ti intero a munisipalidad ti Selters, nga adayo iti siudad. Masansan a tumultulongkami a mangsebseb iti puor kadagiti balbalay wenno apartment. Naidumduma ti pasilidad ti sanga nga opisina gapu iti kinalawana, dadakkel a building, ken iti klase ti trabaho. Masapul nga agsursurokami kadagiti kanayonan nga abilidad tapno ammomi ti aramidenmi no adda emerhensia iti daytoy a pasilidad. Isu a maragragsakan ken agyamyamankami iti panagsanaymi ditoy.”

Nasurok a 100 a miembro ti Emergency Response Team ti sangay ti makikadkadua iti fire department nga agpraktis iti panag-rescue ken fire drill. Kuna ni Mr. Neckermann: “Bilibkami iti Emergency Response Team-yo. No awan ti tulong ken panangiwanwanda, saan koma a kastoy kaballigi ti fire drill ken panagpraktismi a rumesponde no adda puor.”

Impakita ti fire department ken ti Emergency Response Team ti abilidadda idi rabii ti Pebrero 2014. Napno iti asuk ti maysa a kuarto iti maysa kadagiti residence building iti sangay. “Nagpuskol ti asuk a dimi payen makita ti imami uray iyasidegmi iti rupami,” inyestoria ni Daniel a nadakamat itay. “Dagus a kinontakmi ti fire department ken pinaruarmi iti building ti amin nga aggigian iti 88 a kuarto. Idi simmangpet ti fire department, nakaruaren iti building ti amin.” Kuna ni Mr. Neckermann: “Nagpartak man ti panangparuaryo kadagiti tattao iti dayta nagdakkel a building iti siudad a kas iti Frankfurt. Talaga a disiplinadokayo a tattao, ken naglaing ti Emergency Response Team-yo!” Naammuan dagiti bombero ti nakaigapuan ti puor ket inikkatda dayta. Awan ti nasaktan, ken awan ti nakaro a nadadael iti pasilidad.

Mangnamnama ti sanga nga opisina iti Selters nga awan ti mapasamak a nakaro nga uram. Ngem no adda man, nakasagana dagiti boluntario ta nasursuroda no kasano a labanan ti puor.