Ti Cluj-Napoca, a maysa kadagiti kadakkelan a siudad ti Romania, ket pagaammo kas Ti Siudad ti Gameng. Bayat ti Gaudeamus bookfair, a naaramid iti siudad idi Abril 20 agingga iti 24, 2016, intampok dagiti Saksi ni Jehova dagiti moral ken naespirituan a prinsipio a masarakan iti Biblia. Nangaramidda iti booth ken nakisaritada iti rinibu a tattao nga immay ken interesado kadagiti maipabpabuya a video ken kadagiti nakadispley a naibatay iti Biblia a publikasion ken Biblia.

Adda dagiti eskuelaan a nangyurnos iti field trip iti bookfair, ken impan dagiti titser dagiti estudianteda iti booth dagiti Saksi. Naragsakan unay dagiti estudiante idi binuyada dagiti animated video iti serye nga Agbalinka a Gayyem ni Jehova, ken kayat ti adu kadakuada ti maaddaan iti kopia Ti Librok dagiti Estoria ti Biblia ken ti broshur nga Isuroyo Dagiti Annakyo. Nabuya ti maysa a babai nga agtrabtrabaho iti daycare center dagiti animated video ket imbagana iti katrabahuanna, “Masapul a kopiaenta daytoy nga adres ti website [www.mr1310.com] tapno maipabuyata ti amin a cartoons kadagiti ubbing.”

Nagbilib dagiti tin-edyer nga estudiante kadagiti whiteboard animation a maipabpabuya kadagiti tablet. Karaman kadagiti maipabpabuya a video ti Ayat Kadi Daytoyen Wenno Crush Laeng?, Agannadka no Agusarka iti Social Network, ken Maabakmo ti Bully Uray Dika Lumaban.

Namin-adu nga immay iti booth ti maysa a padi nga Orthodox ken ti asawana. Nakaalada iti Baro a Lubong a Patarus ti Nasantuan a Kasuratan ken sumagmamano a broshur. Kuna ti padi a nagustuanna ti paset ti Biblia nga “Indese ti Sasao iti Biblia” ken nagbilib iti kinaadu ti mapagtalkan a reperensia nga inusar dagiti nangipatarus. Intedna kadagiti Saksi ti numero ti teleponona ket imbagana a kontakenda tapno maitultuloyda ti saritaanda maipapan iti Biblia.

Dinamag ti asawa ti padi no sadino iti jw.org website ti pakakitaanna kadagiti impormasion para kadagiti ubbing ket imbaga dagiti Saksi nga iti seksion nga “Ubbing.” Binuyana ti video nga Agbalin a Napudno ket naragsakan unay iti dayta. Kalpasan a kinitada nga agassawa dayta a seksion ken ti dadduma pay a feature ti website, inawagan dayta ti padi a “regalo ti Dios kadagiti tattao.”