Idi Marso 14, 2015, nagturpos ti maika-138 a klase ti Watchtower Bible School of Gilead iti educational center dagiti Saksi ni Jehova idiay Patterson, New York. Nasurok a 14,000 ti nakabuya iti programa, a pakairamanan dagiti adda iti sumagmamano a lokasion a naikonektar babaen ti video. Iti rugi ti programa, naipatokar dagiti uppat a baro a kanta ti Pagarian, a kinanta dagiti immatender kabayatan ti programa. *

Ni Geoffrey Jackson, a miembro ti Bagi a Manarawidwid dagiti Saksi ni Jehova, ti tserman iti programa. Iti panglukat a sasaona, pinaregtana dagiti estudiante a saanda a bukbukodan ti pannakaammo ken pannakasanay a nagun-odanda no di ket usarenda dagita a pakabenepisiaran ti sabsabali.—2 Timoteo 2:2.

Inlawlawag ni Kabsat Jackson ti ulidan ni Moises. Nabayag bassit nga iti tolda ni Moises ti nagserbi a pannakasentro ti panagdaydayaw ti nasion ti Israel. Ngem idi naipatakderen ti tabernakulo, daytan ti nagbalin a sentro ti pudno a panagdaydayaw. Agparang a saan a napalubosan ni Moises a sumrek iti Kasasantuan a paset ti tabernakulo ta dayta a pribilehio ket para laeng iti nangato a padi. Nupay kasta, awan mabasatayo a nagreklamo ni Moises iti dayta a panagbalbaliw. Imbes ketdi, simamatalek a sinuportaranna ni Aaron iti baro nga annongenna kas nangato a padi. (Exodo 33:​7-​11; 40:34, 35) Ania ti maadaltayo? “Ipategtayo ti aniaman a pribilehiotayo ngem saantay a bukbukodan dagita,” kuna ni Kabsat Jackson.

“Mapabutnganka Kadi iti Karasakas ti Bulong?” Dayta ti tema ti palawag ni Kenneth Flodin, a maysa a katulongan iti Teaching Committee ti Bagi a Manarawidwid. Imbagana a mabalin a maipasangonto dagiti estudiante kadagiti situasion a kasla nakabutbuteng, kas iti pannakaidadanes wenno narigat a pakaibaonan. Inusarna dagiti sasao iti Levitico 26:36 a nangiparegta kadagiti estudiante a dida panunoten a saanda a mapagballigian dagita a situasion no di ket ibilangda kas nagango laeng a bulong. Intampok ni Kabsat Flodin ti ulidan ni apostol Pablo, a naibturanna ti adu a karit gapu ta nagtalek ken Jehova.—2 Corinto 1:​8, 10.

“Ania ti Birbirokem?” Imparang ni Mark Sanderson, a miembro ti Bagi a Manarawidwid, ti simmaruno a palawag iti programa. Inlawlawagna ti prinsipio iti Proverbio 13:12, a kunana: “Ti inanama a maitantan pagsakitenna ti puso.” Nakalkaldaang ta adu ti nangusar iti intero a biagda a nanggaw-at kadagiti impasdekda a kalat, kas iti kinabaknang ken kinalatak, ngem naupayda gapu ta saanda a pulos nagun-odan dagita.

Idi kaaldawan ni Jesus, di umiso ti ninamnama ti adu maipapan ken Juan a Mammautisar. (Lucas 7:​24-​28) Kas pagarigan, mabalin a ninamnamada ni Juan kas maysa a nalaing a tao a mabalin a mangparagsak kadakuada babaen kadagiti awan nakaibatayanna a pannursuro. No kasta ti ninamnamada, naupayda la ketdi ta dagiti natibker a mensahe ti kinapudno ti insuro ni Juan. Mabalin a ninamnama ti dadduma ti maysa a lalaki a makaay-ayo ti kawes ken langana. Ngem ordinario laeng ti kawes ni Juan. Nupay kasta, saan a napaay dagidiay nangnamnama iti maysa a propeta ta ni Juan ket saan la a propeta no di ket isu pay ti nangisagana iti panagparang ti Mesias!​—Juan 1:​29.

Kas panangyaplikar iti leksion a maadal iti dayta, pinaregta ni Kabsat Sanderson dagiti estudiante a dagiti umiso a banag ti kitaenda. Imbes a tarigagayanda ti kinalatak wenno namnamaenda ti espesial a pannakaasikaso iti pakaibaonanda, masapul a naipamaysada iti panangusar iti pannakasanayda tapno mabenepisiaran ti sabsabali. Maaramidda daytoy no iranudda dagiti nasursuroda iti Gilead, patibkerenda ti pammati dagiti kakabsatda, ken ayatenda ida. “Agbalinkay koma a napakumbaba nga adipen dagiti kakabsatyo ken aramidenyo ti amin a kabaelanyo a mangitungpal iti pagayatan ni Jehova ket saankayto a pulos mapaay,” kuna ni Kabsat Sanderson.

“Pakanen Dagiti Mabisin.” Dayta ti tema ti palawag ni James Cauthon, a maysa nga instruktor iti Theocratic Schools Department. Imbaga ni Kabsat Cauthon a mabisintayo amin iti ayat, apresasion, ken panangipateg. Kinasapulan met dayta ni Jesus, ket impaay dayta ni Jehova babaen ti panangyebkasna iti makapabileg a sasao idi nabautisaran ni Jesus.—Mateo 3:​16, 17.

Inikkannatayo ni Jehova iti pannakabalin a mangparegta ken mangpatibker iti sabsabali babaen iti sasaotayo, ken namnamaenna nga usarentayo dayta a pannakabalin. (Proverbio 3:​27) “Sanayenyo ti bagbagiyo a dagiti naimbag iti sabsabali ti kitaenyo ken dikay bumdeng a mangkomendar kadakuada,” kuna ni Kabsat Cauthon. No naimpusuan a komendarantayo dagiti kakabsat, mariknada a maipatpateg dagiti panagreggetda.

“Nasayaat Agingga iti Maudi a Tedted.” Ti simmaruno a palawag iti programa ket imparang ni Mark Noumair, a katulongan iti Teaching Committee. Inusar ni Kabsat Noumair ti ulidan ni apostol Pablo a nangparegta kadagiti estudiante a saanda koma a mapnek iti panangaramid laeng iti bassit. Imbes ketdi, kas ken Pablo, mariknada ti pudpudno a rag-o no ibukbokda ti bagbagida agpaay iti sabsabali.—Filipos 2:​17, 18.

Saan a simmuko ni Pablo uray iti narigat a kasasaad. Gapu ta nagsakripisio ni Pablo agingga iti ipapatayna, arigna impaayna ti bagina agingga iti maudi a tedted. Isu a pudno ti imbagana: “Tinarayko ti tarayen agingga iti pagpatinggaan.” (2 Timoteo 4:6, 7) Imparegta ni Kabsat Noumair kadagiti estudiante a tuladenda ni Pablo babaen ti simamatalek a panangsuportada iti trabaho mainaig iti Pagarian iti pakaibaonanda.

Kapkapadasan. Ni Michael Burnett, a maysa pay nga instruktor iti Gilead ti nangiparang iti sumaruno a paset ti programa. Iti daytoy a paset, inyakto ti sumagmamano nga estudiante dagiti kapadasanda iti ministerio bayat ti kaaddada idiay Patterson.

Masansan a nasayaat ti resulta ti kinaalerto dagiti estudiante kadagiti gundaway a makapangasabada ken ti panangikagumaanda a mangiranud iti kinapudno iti “lengguahe ti pusoda” wenno iti nakayanakanda a lengguahe. Kas pagarigan, naibaga iti maysa nga estudiante nga adu ti agsasao iti Espaniol iti teritoria a planona a pangasabaan. Isu a sakbay a napan nangasaba iti maysa nga aldaw, nagsursuro iti sumagmamano a sasao iti Espaniol babaen ti tulong ti app a JW Language. Iti dayta nga aldaw, adda nakasaritana a lalaki iti kalsada nga agsasao iti Espaniol. Babaen ti panangusarna iti sangkabassit nga Espaniol a nasursurona, nairugina ti saritaan ket nagbanag dayta iti panagadal iti Biblia ti lalaki ken ti uppat a kameng ti pamiliana.

Interbiu. Sumaganad, ni William Turner, Jr., a katulongan iti Service Committee ti Bagi a Manarawidwid, ininterbiuna ti uppat nga estudiante maipapan iti kapadasanda sakbay a napanda iti Gilead kasta met ti pannakasanay a naawatda manipud iti eskuelaan.

Insalaysay dagiti estudiante dagiti punto iti eskuelaan a nakapabilganda. Kas pagarigan, dinakamat ti maysa nga estudiante ti nasursurona manipud iti salaysay ti Lucas kapitulo 10. Naragsakan dagiti 70 nga adalan nga imbaon ni Jesus idi adda nasayaat a resulta ti ministerioda. Nupay naragsakan met ni Jesus, insurona kadagiti adalanna a saan a kadagiti resulta ti pangibatayanda iti rag-oda no di ket kangrunaanna iti pannakaammoda a maragsakan ni Jehova kadagiti panagreggetda. Ipalagip daytoy kadatayo a ti pudno a rag-o ket agpannuray, saan nga iti kasasaadtayo, no di ket iti anamong ni Jehova.

Inyaplikar ni Kabsat Turner ti sasao iti Filipos 1:6 kadagiti estudiante, nga impatalgedna a ni Jehova ti “nangirugi iti naimbag nga aramid” kadakuada ken agtultuloy nga adda ni Jehova kadakuada.

“Ipamaysayo Dagiti Matayo ken Jehova.” Ni Samuel Herd, a miembro ti Bagi a Manarawidwid, ti nangiparang iti kangrunaan a palawag iti programa. Imbagana a saantayo a literal a makita ni Jehova. Kasano ngarud a posible nga ipamaysatayo dagiti matatayo kenkuana?

Ti maysa a pamay-an a makitatayo ni Jehova ket babaen ti panangsukimat kadagiti bambanag a pinarsuana a mangisuro kadatayo maipapan kenkuana. Kanayonanna, ‘linawagan ni Jehova dagiti mata ti pusotayo.’ (Efeso 1:​18) No kanayontayo a basaen ti Biblia, ad-adu met ti maadaltayo maipapan ken Jehova. Kas resultana, nasingsingedtayo kenkuana.

Kayattayo nga ad-adda nga usigen dagiti Ebanghelio ta nalawlawag ti pannakailadawan ni Jehova kas makita iti sasao ken tigtignay ti Anakna. Naan-anay nga impakita ni Jesus ti personalidad ni Jehova isu a naibagana: “Ti nakakita kaniak nakitana met ti Ama.”—Juan 14:9.

Pinaregta ni Kabsat Herd dagiti agdengdengngeg a saanda laeng a kitaen ni Jehova babaen iti ulidan ni Jesus no di ket tuladenda met ti makitada. Kas pagarigan, kas iti panangikagumaan ni Jesus a mangpakan iti sabsabali, kayattayo met ti agregget a mangiranud kadagiti naawattayo a naespirituan a taraon.

Ania ti resulta ti panangipamaysa kadagiti matatayo ken Jehova? Maaddaantayo met iti umasping a panagtalek a kas iti salmista, a nangisurat: “Insaadko ni Jehova iti sanguanak a patinayon. Agsipud ta isu adda iti makannawanko, saanakto a mapagdiwengdiweng.”—Salmo 16:8.

Konklusion. Apaman a naawat dagiti estudiante ti diplomada, imbasa ti maysa kadagiti nagturpos ti naimpusuan a surat ti panangapresiar ti klase. Kalpasanna, inngudo ni Kabsat Jackson ti programa babaen ti panangibagana kadagiti nagturpos a saanda koma a marikna a masapul a kabbaro wenno nauneg amin nga isuroda. Adunto dagiti gundaway a palagipanda dagiti kakabsatda kadagiti bambanag nga ammodan. Impaganetgetna met a kasapulan ti kinapakumbaba. Imbes nga iti bagbagida wenno iti pannakasanay iti Gilead ti pangituronganda iti atension, ipamaysa koma dagiti nagturpos ti atensionda iti Biblia ken kadagiti naibatay iti Biblia a publikasiontayo. Isu nga imbes nga upayenda ti rikna dagiti saan a makapageskuela iti Gilead, paregtaen dagiti nagturpos dagiti kapammatianda babaen ti panangtulong kadakuada a mabenepisiaran kadagiti adda kadakuadan a naespirituan a probision. Idi nalpas ti programa, napabileg la ketdi ti amin ken determinadoda a pagserbian dagiti kakabsatda.