Gapu iti nakapigpigsa a tudo, naglippias dagiti karayan a nanglayus iti Central Europe idi Hunio 2013. Ti dandani intero a Danube River iti Hungary ket dimmanon iti kangatuan pay laeng a rukod ti danumna.

Gapu iti dayta nga emerhensia, dinamag ti Hungarian Ministry of Human Resources iti sanga nga opisina dagiti Saksi ni Jehova idiay Hungary no mabalin a tulongan ida dagiti Saksi a manglapped iti layus. Gapuna, inawis ti sanga nga opisina dagiti kongregasion iti asideg ti Danube River tapno makiramanda iti trabaho a pananglapped iti layus nga inorganisar dagiti lokal nga autoridad.

Naisangsangayan ti panagtignay dagiti kongregasion. Kadagiti simmaganad nga aldaw, nasurok a 900 a Saksi manipud iti 72 a kongregasion ti nakiraman iti trabaho a panagikabil iti bangen iti igid ti karayan. Naibaga kadakuada nga agusarda iti badge card nga adda naisurat a “Saksi ni Jehova,” agraman ti naganda ken ti siudad a naggapuanda.

Maysa a pannakabagi ti Hungarian Red Cross iti maysa a siudad ti nangipatulod iti daytoy a mensahe iti maysa a kongregasion: “Maikarikayo iti panagyaman ken panagraem gapu ta manmanokami a makakita kadagiti tattao a mangipakpakita iti kasta a panagkaykaysa ken kinamasindadaan a tumulong. Ken nakaad-adayo pay ti naggapuanyo! Ipagpampannakkelko ti nagsayaat nga ulidanyo iti siudadtayo!”

Ti tserman ti maysa nga organisasion a tumultulong kadagiti nadidigra (disaster relief organization) ken miembro ti Hungarian Parliament ket nangipatulod iti surat iti sanga nga opisina. Agyamyaman kadagiti Saksi gapu iti nagdakkel a naitulongda.