Ti Bagi a Manarawidwid ket maysa a bassit a grupo a buklen dagiti nataengan iti naespirituan a Kristiano a mangiwanwanwan kadagiti Saksi ni Jehova iti intero a lubong. Adda dua a paset ti trabahoda:

•   Idadauluanda ti pannakaisagana dagiti naibatay-Biblia nga instruksion babaen kadagiti publikasion, panagtataripnong, ken eskuelaan dagiti Saksi ni Jehova.—Lucas 12:42.

•   Iwanwanwanda ti sangalubongan a trabaho dagiti Saksi ni Jehova babaen ti panangipaayda iti instruksion iti trabahomi a panangasaba ken panangkitada nga umiso ti pannakausar dagiti naidonar a material a sanikua.

 Tultuladen ti Bagi a Manarawidwid ti inaramid “dagiti apostol ken lallakay idiay Jerusalem” idi umuna a siglo, a nangaramidda kadagiti napapateg a desision para iti intero a kongregasion Kristiano. (Aramid 15:2) Kas kadagidiay a matalek a lallaki, dagiti miembro ti Bagi a Manarawidwid ket saan a lider ti organisasionmi. Agpapaiwanwanda iti Biblia ken bigbigenda a ni Jehova a Dios ti nangdutok ken Jesu-Kristo kas Ulo ti kongregasion.—1 Corinto 11:3; Efeso 5:23.

 Dagiti miembro ti Bagi a Manarawidwid ket da Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, ken Jeffrey Winder. Agserserbida iti sangalubongan a hedkuartermi idiay Warwick, New York, U.S.A.

 Nangbukel ti Bagi a Manarawidwid iti innem a komite a mangiwanwan iti nagduduma a paset ti trabahomi. Agserserbi ti tunggal miembro iti maysa wenno ad-adu pay kadagitoy a komite.

•   Coordinators’ Committee: Mangas-asikaso kadagiti legal a bambanag ken agresponde no adda didigra, no maidadanes dagiti Saksi ni Jehova gapu iti narelihiosuan a patpatien, ken dadduma pay nga emerhensia a mangapektar kadagiti Saksi ni Jehova.

•   Personnel Committee: Mangas-asikaso kadagiti urnos para kadagiti miembro ti pamilia ti Bethel.

•   Publishing Committee: Mangimatmaton iti pannakayimprenta ken pannakaipatulod dagiti literatura a naibatay iti Biblia ken ti panagibangon kadagiti pasdek a pagtataripnongan, translation office, ken pasilidad ti sangay.

•   Service Committee: Mangiwanwanwan iti trabahomi a panangikasaba iti “naimbag a damag ti pagarian.”—Mateo 24:14.

•   Teaching Committee: Mangimatmaton iti pannakaisagana dagiti naespirituan nga instruksion a maipaay babaen kadagiti panagtataripnong wenno panaggigimong, eskuelaan, kasta met dagiti audio ken video a programa.

•   Writing Committee: Mangimatmaton iti pannakaisagana dagiti naespirituan nga instruksion a maipapaay babaen iti nayimprenta a publikasion ken iti website-mi ken mangiwanwanwan iti trabaho a panagipatarus.

 Malaksid iti panangasikaso iti trabaho kadagitoy a komite, linawas nga agmiting ti Bagi a Manarawidwid tapno pagsaritaan dagiti kasapulan ti organisasion. Kadagitoy a miting, pagsasaritaan dagiti miembro no ania ti kuna ti Kasuratan, ken agpaiwanwanda iti nasantuan nga espiritu ti Dios, nga ikagumaanda ti mangaramid kadagiti nagkaykaysa a desision.—Aramid 15:25.

 Dagitoy ket mapagtalkan a Kristiano a tumultulong kadagiti komite ti Bagi a Manarawidwid. (1 Corinto 4:2) Addaan dagitoy iti abilidad ken kapadasan iti trabaho nga as-asikasuen ti komite a nakaitudinganda, ken tabtabunuanda ti linawas a miting dayta. Nupay saanda a makiraman iti panagdesision, mangipapaay dagitoy a katulongan kadagiti napapateg a singasing ken impormasion, mangipatungpal iti desision ti komite, ken mangmonitor kadagiti resulta ken nagrang-ayan dagita a desision. Mabalin nga ibaon met ida ti Bagi a Manarawidwid a bumisita kadagiti kakabsatmi iti nagduduma a paset ti daga wenno agpaset kadagiti taripnong a kas kadagiti tinawen a miting wenno panagturpos ti Gilead.