Með árunum sýna sumir maka sínum sífellt sjaldnar ástúð. Er ástæða til að hafa áhyggjur ef staðan er þannig í þínu hjónabandi?

•  Gott að vita

•  Hvað er til ráða?

 Ástúð er ómissandi þáttur í góðu hjónabandi. Til að halda líkamanum hraustum þarf að drekka vatn og borða reglulega, eins verður hjónabandið traustara þegar hjón halda áfram að sýna hvort öðru ástúð. Jafnvel eftir áratuga hjónaband þurfa bæði hjónin að vera fullviss um að þau séu elskuð.

 Sönn ást er óeigingjörn. Sönn ást stuðlar að hamingju makans. Hugulsamur eiginmaður eða eiginkona sýnir ástúð þegar makinn hefur þörf fyrir það en ekki bara eftir eigin geðþótta.

 Konur hafa yfirleitt meiri þörf fyrir ástúð en karlar. Eiginmaður elskar kannski konu sína heitt en ef hann lætur það bara í ljós í byrjun og lok dags eða bara áður en þau hafa mök, er ekki víst að eignkonan sé viss um að hann elski hana. Það er miklu betra að sýna ástúð oft á dag.

 Tjáðu ástúð þína með orðum. Ástúðleg orð eins og ,ég elska þig‘ eða ,þú ert mér svo mikils virði‘ geta hjálpað maka þínum að skilja að hann sé mikils metinn.

 Biblían segir: „Af gnægð hjartans mælir munnurinn.“ – Matteus 12:34.

 Tillaga: Það er líka hægt að skrifa ástúðleg orð til dæmis á miða, senda þau með tölvupósti eða SMS.

 Sýndu ástúð í verki. Faðmlag, koss eða bara að halda í hönd makans sýnir að þú meinir það þegar þú segir ,ég elska þig‘. Það er líka hægt að sýna ástúð með smá snertingu, kærleiksríku augnaráði eða óvæntri gjöf. Og hvernig væri að aðstoða eiginkonuna, til dæmis með því að bera poka fyrir hana, opna dyr, aðstoða við uppvaskið og þvotta eða elda mat? Fyrir marga er þetta ekki bara aðstoð heldur ástúð í verki.

 Biblían segir: „Elskum ekki með tómum orðum heldur í verki og sannleika.“ – 1. Jóhannesarbréf 3:18.

 Tillaga: Vertu jafn hugulsamur við maka þinn eins og þegar þið voruð að kynnast.

 Gefið ykkur tíma til að vera saman. Þegar þið hjónin eruð ein styrkið þið hjónabandið og sýnið að þið kunnið að meta hvort annað. En það getur að sjálfsögðu verið erfitt að finna tíma til að vera ein, ef þið eigið börn eða þurfið daglega að ræða nauðsynleg mál. Kannski gætuð þið ákveðið eitthvað einfalt eins og að fara reglulega tvö ein í göngutúra.

 Biblían segir: „Metið þá hluti rétt sem máli skipta.“ – Filippíbréfið 1:10.

 Tillaga: Sum mjög upptekin hjón taka frá kvöldstund eða helgi til að gera eitthvað rómantískt saman.

 Þekktu maka þinn. Fólk hefur mismunandi þörf fyrir ástúð. Talið þess vegna saman um hvað ykkur þætti vænt um og hvort eitthvað mætti bæta. Takið síðan tillit til óska makans. Munið að ástúð er ómissandi þáttur í góðu hjónabandi.

 Biblían segir: „Kærleikurinn ... leitar ekki síns eigin.“ – 1. Korintubréf 13:4, 5.

 Tillaga: Í stað þess að ætlast til að þér sé sýnd ástúð, skaltu spyrja þig: Hvað get ég gert til að hvetja maka minn til að sýna mér meiri ástúð?