LESN 37
Wa Di Baibl Av Fi Se Bout Wok An Moni?
Yu eva a fret bout moni ar a wori bout wok so moch dat yu fiil schres out? Somtaim it mait-a aad fi tek kier a wiself an wi fambili an fi du wa Jeuova waahn wi fi du a di siem taim. Di Baibl tel wi som tingz we kyan elp wi.
1. Wa di Baibl av fi se bout wok?
Gad waahn wi fi api wid di wok we wi a du. Di Baibl tel wi se: “Notn no beta fi sumadi du dan fi im . . . fiil gud bout di aad wok we im a du.” (Iikliiziyastiiz 2:24) Jeuova aalwiez a wok aad. Wen wi du laik im an wok aad tu, wi mek im fiil gud an wi fiil gud iina wiself tu.
Wok a sitn we wi fi du, bot it no fi tap wi fram du wa Jeuova waahn wi fi du. (Jan 6:27) Im pramis wi se ef wi put fi im bizniz fos im a-go tek kier a wi.
2. Ou wi fi fiil bout moni?
Di Baibl mek wi nuo se “wen yu av moni yu kyan yuuz it fi tek kier a yuself.” Bot it mek wi nuo se moni wan kyaahn mek wi api. (Iikliiziyastiiz 7:12) So it a mek wi si se wi no fi lov moni bot wi fi ‘satisfai wid wat-eva wi av.’ (Riid Iibruu 13:5.) Wen wi satisfai wid wa wi av, it mek wi no waahnti-waahnti ar afi kil op wiself fi get wa wi no av. Bot no onggl dat, it mek wi no lov fi baro baro so dat wi na’afi uo nobadi notn. (Pravorbz 22:7) An wi naa go en op a gyambl an a ron dong tingz we kyan mek wi get rich kwik niida.
3. Ou wi kyan yuuz di moni we wi av fi elp ada piipl?
Jeuova a wan kain Gad, an wi du laik im wen wi “gi tu ada piipl an shier” wa wi av wid dem. (1 Timoti 6:18) Wi kyan yuuz wi moni fi elp out iina di kanggrigieshan an fi elp ada piipl, espeshali wi breda an sista dem. Di big ting tu Jeuova a no umoch wi gi, bot a di riizn wa mek wi gi. Wen wi gi fram wi aat, wi a-go api an Jeuova a-go api tu.—Riid Aks 20:35.
LORN SOM MUO
Luk pan wa mek it gud fi wi satisfai wid wa wi av an no put wok bifuo Jeuova bizniz.
4. Di wie ou yu wok fi big op Jeuova
Kaa wi an Jeuova muuv so gud, di wie ou im tingk bout wok a so wi a-go tingk bout it tu. Plie di VIDIYO, an den wi a-go taak bout di neks kwestiyan dem.
-
Iina da vidiyo ya, wa yu laik bout ou Jason did a gwaan a im wokplies?
-
Wa im did du fi mek shuor se im wok neva kom bifuo Gad bizniz?
Riid Koloshan 3:23, 24, an den wi a-go taak bout da kwestiyan ya:
-
Wa mek it mata ou wi fiil bout wok?
Wok a sitn we wi fi du. Bot it no fi tap wi fram du wa Jeuova waahn wi fi du
5. Wi a-go betaraaf wen wi satisfai wid wa wi av
Wol iip a piipl chrai fi get aal di moni we dem kyan get. Bot a no dat di Baibl tel wi se wi fi du. Riid 1 Timoti 6:6-8, an den wi a-go taak bout da kwestiyan ya:
-
Wen wi luk iina Gad Wod, wa wi si se im waahn wi fi du?
Aal ef a likl bit a sitn wi av, wi kyan stil api. Plie di VIDIYO, an den wi a-go taak bout di neks kwestiyan.
-
Aalduo dem av likl bit a moni, wa mek di piipl dem iina dem fambili ya api?
Bot wa ef wi av wol iip a sitn an wi stil waahn muor? Jiizas mek wi nuo ou bad dis bi. Riid Luuk 12:15-21, an den wi a-go taak bout da kwestiyan ya:
-
Wa yu lorn fram wa Jiizas did se?—Luk pan vors 15.
Fi si wa dem skripcha ya av fi du wid dem wan aneda, riid Pravorbz 10:22 an 1 Timoti 6:10. An den wi a-go taak bout dem kwestiyan ya:
-
Wich wan a dem ya yu tingk muo impuotant? Fi yu an Jeuova ton gud fren ar fi av wol iip a moni? Wa mek yu se so?
-
Wen wi ron dong moni, wa a som prablem we dat kaaz?
6. Jeuova a-go tek kier a wi
Wen wi kyaahn get no wok, ar wi a av prablem wid wi wok, ar wi no av nof moni, it kyan mek wi si ef wi riili chos iina Jeuova. Plie di VIDIYO fi si ou wi kyan tan op chrang wen wi a go chuu dem sitn ya, an den wi a-go taak bout di neks kwestiyan dem.
-
Wen yu a wach di vidiyo, wa a som a di prablem dem we di breda did afi go chuu?
-
Wa im did du fi diil wid dem prablem ya?
Riid Matyu 6:25-34, an den wi a-go taak bout da kwestiyan ya:
-
Wa Jeuova pramis fi du fi di wan dem we a put im bizniz fos iina dem laif?
SUMADI MAIT-A SE: “Mi afi wok aad fi tek kier a mi fambili. Mi kyaahn go a miitn evri wiik.”
-
Wich wan a di skripcha dem elp yu fi si se di bes ting fi du a fi put Jeuova bizniz fos?
DIS A WA YU FI MEMBA
Wok a sitn we wi fi du, an wi niid moni tu. Bot wi no mek dat tap wi fram du wa Jeuova waahn wi fi du.
Wa yu did lorn iina da lesn ya?
-
Wa kyan elp yu fi tingk bout wok di wie ou Jeuova waahn yu fi tingk bout it?
-
Ou it kyan elp yu wen yu satisfai wid wa yu av?
-
Wa yu kyan du fi shuo se yu chos iina Jeuova wen im se im a-go tek kier a im piipl dem?
CHEK OUT SOM MUO SITN
Fain out ef di Baibl tel wi se moni a sitn bad.
“Moni A Di Ruut A Aal Kain-a Wikidnis?” (Sitn we yu kyan get pan di websait)
Luk pan wa mek Gad api wen wi gi sumadi sitn.
“Wa Di Baibl Av Fi Se Bout Wen Wi Gi Sumadi Sitn?” (Sitn we yu kyan get pan di websait)
Yu tingk it rang fi gyambl?
“Luk Pan Wa Di Baibl Av Fi Se Bout Gyambl” (Wiek Op!, Maach 2015)
Luk pan wa elp wan man we yuus tu gyambl an tiif fi chienj op im laif.
