Di gud nyuuz bout fambili apinis kom fram Jeuova. Im a di api Gad, an im waahn evri fambili fi bi api tu. (1 Timoti 1:11) Di fos man an uman, a Gad marid dem. A so kom wi nuo se Gad waahn man an uman fi get marid. Wen piipl marid azkaadn tu di laa iina dem konchri, it wi mek evribadi iina di fambili api. It wi mek di man an uman kyan riez dem pikni tugeda, so dat di pikni dem kyan fiil sief an api. Piipl uu a sorv Gad di rait wie fi rispek di laa a di lan we dem liv iina an rejista dem marij.​—Riid Luuk 2:1, 4, 5.

Ou Gad fiil bout marij? Im waahn di ozban an waif fi aalwiez stie tugeda az wan, an fi bi fietful an chuu tu dem wan aneda. (Iibruu 13:4) Im iet wen piipl get divuos. (Malachi 2:16) Bot im se wan Kristiyan kyan get divuos an marid agen ef di ozban ar waif sliip wid sumadi els.​—Riid Matyu 19:3-6, 9.

Jeuova mek di man an uman so dat wen dem marid dem kyan work tugeda an bring out di bes iina dem wan aneda. (Genesis 2:18) Di ozban a di ed a im fambili. Im fi provaid fuud, kluodin, an shelta fi dem an tiich dem bout Gad. Im fi lov im waif so moch dat im wilin fi du tingz fi ar—aal wen it aad fi im. Di ozban an waif fi lov an rispek dem wan aneda. Fi riili av apinis iina dem marij, ozban an waif afi lorn fi figiv dem wan aneda kaa non a dem no porfek.​—Riid Ifiijan 4:31, 32; 5:22-25, 33; 1 Piita 3:7.

Ef yu av prablem iina yu marid laif, di tuu a unu fi work aad fi chriit unu wan aneda wid lov. (1 Korintiyan 13:4, 5)  Di Baibl no inkorij piipl fi lef dem wan aneda fi get rid a di prablem dem we dem av iina dem marid laif.​—Riid 1 Korintiyan 7:10-13.

Jeuova waahn yu fi bi api. Im tel yu di rait tingz dem we yu fi du so yu kyan enjai laif wail yu yong. Im waahn yu fi lisn tu yu mada an faada kaaz dem uola an nuo muor dan yu, so dem nuo wa gud fi yu. (Koloshan 3:20) Jeuova waahn yu fiil di jai we kom wen yu du tingz fi im an Jiizas.​—Riid Matyu 19:13-15; 21:15, 16; Ifiijan 6:1, 2.

Yu fi work aad fi tek kier a yu fambili an mek shuor se yu pikni dem av fuud fi iit, somwe fi liv, an kluoz fi wier. (1 Timoti 5:8) Bot fi yu pikni dem fi bi riili api, yu fi tiich dem fi lorn fram Gad an lov im. (Ifiijan 6:4) Wen yu shuo se yu lov Gad, it kyan muuv yu pikni dem fi du di siem ting tu. So ef we yu tel yu pikni dem kom fram Gad Wod, it a-go elp dem fi tingk iina di rait an prapa wie.​—Riid Ifiijan 6:4; 2 Timoti 3:15.

Wen yu se gud tingz tu yu pikni dem, it wi mek dem fiil gud bout demself. Yu afi set ruul fi yu pikni dem fala. An wen dem du tingz we no rait, yu afi mek dem nuo se dem rang. So wen yu chrien dem iina da wie de, dem wi stie we fram tingz we no gud fi dem, an dem kyan liv api. (Proverbs 22:15) Wen yu waahn dem fi du wa rait, yu no fi biit-biit an bata-bruuz-op yu pikni dem.

Di Jeuova Witnis piipl dem rait uol iip a buk we fi elp mada, faada, an di pikni dem. An wa iina dem buk de bies pan we di Baibl se.​—Riid Jiemz 1:25.