LESN 8
Wa mek Gad Lou Iivl an Sofarin fi A Gwaan?
1. A ou iivl did staat?
Gad lou man fi gwaan ruul demself fi nou fi shuo se man kyaahn fiks di prablem dem iina di worl
Iivl did staat pan ort wen Sietan tel di fos lai. Sietan did staat out az wan gud ienjel, bot im neva “av notn fi du wid di chuut.” (Jan 8:44) Sietan did waahnti-waahnti an red yai. Im did waahn piipl fi worship im, an a onggl Gad fi get worship. Sietan tel Iiv lai an inviigl ar fi du we im waahn insted a we Gad se. Adam fala ar an du we Gad tel im se im no fi du.—Riid Ruoman 5:19; 2 Korintiyan 11:3.
Wen Sietan did get Iiv fi no lisn tu Gad, im did waahn evribadi els fi du di siem ting tu an ton dem bak pan Gad rait fi ruul uova dem. Di majariti a piipl pan di ort a fala Sietan an ton dem bak pan Gad, an a so kom Sietan a “di ruula fi da worl ya.”—Riid Jan 14:30; 1 Jan 5:19.
2. Eniting did rang wid we Gad mek?
Evriting we Gad mek did porfek. So Adam an Iiv an di ienjel dem did av it iina dem fi du egzakli we Gad se. (Deuteronomy 32:4, 5) Gad mek wi iina wan wie so dat wi frii fi chuuz weda wi waahn du gud ar iivl. So wi kyan shuo se wi lov Gad bies pan wa wi chuuz fi du.—Riid Jiemz 1:13-15; 1 Jan 5:3.
3. Wa mek Gad lou sofarin fi a gwaan til nou?
Jeuova lou man fi gwaan ruul demself fi nou, so dat dem kyan lorn dat dem kyaahn ruul gud widout Gad. (Ecclesiastes 7:29; 8:9) A uova 6,000 ier nou man a ruul demself, an it klier klier se dem kyaahn ruul demself kaa tingz a get fram bad tu wos. Dem kyaahn stap waar, kraim, get rid a diziiz, ar iivn gi wi jostis.—Riid 2 Piita 3:7-9.
Bot wen Gad ruul, it no komiin laik wen man a ruul. Di piipl uu chuuz Gad fi ruul dem, dem laif betaraaf. (Isaiah 48:17, 18) Suun suun, Jeuova a-go get rid a aal a di govament dem uova di worl, an den, onggl piipl we chuuz fi mek Gad ruul uova dem a-go liv pan di ort.—Isaiah 11:9.—Riid Revilieshan 11:15.
Wach da vidiyo ya Wa Mek Gad Lou Iivl an Sofarin fi a Gwaan?
4. Kaa Gad tek im taim wid wi, wa dat gi wi di chaans fi du?
Sietan did kliem se nobadi no sorv Gad bikaa dem lov im, bot onggl bikaaz a wa dem kyan get fram Gad. Yu kyan pruuv se dat a lai. Gad tek im taim wid wi so dat wi kyan shuo weda wi waahn Gad fi ruul wi ar man. An di wie wi liv wi laif shuo wich wan wi chuuz.—Riid 2 Jan 4; Revilieshan 12:10.
5. Wa wi fi du fi shuo se a Gad a di Ruula iina wi laif?
Wa wi chuuz fi du wi shuo ef wi waahn Gad fi bi di Ruula iina wi laif
Wi kyan shuo se a Gad a di Ruula iina wi laif wen wi chrai fi fain out wa a di rait wie ou di Baibl se wi fi worship Gad, an den wi du we it se wi fi du. (Jan 4:23) An wi shuo se wi no waahn Sietan ruul wi wen wi kip outa palitiks an waar jos laik ou Jiizas did du.—Riid Jan 17:14.
Sietan yuuz im powa fi kanchuol piipl an mek dem get invalv iina aal kain-a seks sin an ada tingz we wi ort dem. Wen wi no du dem bad sitn de, an wi shuo se wi no laik dem, wi fren an fambili mait mek fon a wi an mek tingz aad fi wi. (1 Piita 4:3, 4) So, we wi a-go du? Wi kyan chuuz fi kip kompni wid piipl uu lov Gad, an wi kyan du di tingz we im tel wi fi du kaaz im lov wi an nuo wa bes fi wi. Ef wi du dat, wi shuo se a lai Sietan did a tel wen im kliem se wen tingz get rof nobadi wudn du we Gad se dem fi du.—Riid 1 Korintiyan 6:9, 10; 15:33.
Gad lov fi wi mek wi shuor se iivl an sofarin a-go don we wid. Piipl uu shuo se dem biliiv dis a-go enjai laif pan di ort fi eva.—Riid Jan 3:16.
