Iina Matyu 24:21, Jiizas tel wi bout wan taim wen “piipl a-go sofa bad bad.” Da “sofarieshan” de, it a-go wos dan eni staam we wi eva si an wi naa go kyan ron we fram it. Bot wi kyan du sitn fi protek wiself. Wa wi kyan du?

Wen Jiizas did sidong pan Mount Aliv, im tel im falara dem se: “Muo dan notn els, wa unu fi du, a put unu main pan Gad Kindom an du wa im waahn unu fi du.” (Matyu 6:33) So wa a som a di sitn dem we wi fi du fi shuo se wi a du wa Jiizas did se?

Wi fi put wi main pan Gad Kindom. Wa it miin wen it se wi fi put wi main pan Gad Kindom? Dis miin se Gad Kindom fi bi di bigis ting iina wi laif. (Matyu 6:25, 32, 33)Wi fi du dat kaa wi kyaahn mek tingz beta fi wiself. Onggl Gad Kindom kyan go mek tingz beta fi wi.

Wi fi du wa Gad waahn wi fi du. Ef wi tek it op pan wiself fi liv di wie ou wi waahn fi liv, tingz naa go wok out gud fi wi. (Pravorbz 16:25) So das wai wi fi mek Gad tel wi ou fi liv. Ef wi du tingz di wie ou Gad waahn wi fi du it, it a-go mek im api an tingz a-go wok out gud fi wi.​—Aizaiya 48:17, 18.

No tap put Gad Kindom fos an aalwiez du wa im waahn wi fi du. Jiizas did se som a im falara dem wuda en op staat ron dong moni an ada tingz, an tingk se dem sitn de wuda mek dem betaraaf. An yu av som ada wan we wuda fret bout dem laif an a wori wori op demself so til dem no av no taim fi Gad.​—Matyu 6:19-21, 25-32.

Bot Jiizas did tel wi se di wan dem we liv dem laif fi shuo se a Gad Kindom dem waahn fi ruul uova dem, Gad a-go tek kier a dem  nou an im a-go gi dem nof nof blesn iina di fyuucha.​—Matyu 6:33.

Aalduo di fos set a piipl we did a fala Jiizas did a du tingz fi shuo se dem waahn Gad Kindom fi ruul uova dem, dem did stil get sik an dem neva liv fi si wan taim we no pien an sofarieshan no de. Bot Jeuova did stil a tek kier a dem. Wa mek wi kyan se so?

Dem did liv di wie ou Gad waahn dem fi liv, an kaaz a dat dem neva afi diil wid nof a di ada sitn dem we di piipl dem roun dem wuda afi go chuu kaa dem neehn a du wa Gad se. Dem did biliiv se Gad Kindom wuda kom kom mek tingz beta, an dis did elp dem fi diil wid eni prablem we dem did av. An kaaz Gad a di wan we av “aal a di powa,” im gi dem di chrent we dem did niid so dat dem kuda diil wid eni prablem we lik dem.​—2 Korintiyan 4:7-9.

Di fos set a Kristiyan dem did du wa Jiizas se dem fi du an put dem main pan Gad Kindom. So dem did priich bout Gad Kindom an dem neehn tap pred di gud nyuuz iina di paat a di worl we dem did de. (Koloshan 1:23) Yu tingk nobadi a du dat tide?

Ye man! Di Jeuova Witnis dem a du it kaa dem si se Gad Kindom suun kom get rid a aal a di bad sitn dem we de iina da worl ya. So dem chrai aad fi du wa Jiizas se a Matyu 24:14. It se: “Da gud nyuuz ya bout Gad Kindom afi go priich aal uova di worl. So evribadi wi get di chaans fi ier di chuut. A onggl afta dat, di worl a-go don.”

So laik ou yu si aal a dem gud sitn ya we Gad Kindom a-go du fi wi, wa yu a-go du? Wi a beg yu fi du laik dem piipl de we did liv iina Beriya, wan siti we did iina Masiduoniya. Wen di apasl Paal did priich tu dem, dem neehn tek it az fi im wod bot dem tek it az Gad Wod. Dem “lisn gud kaaz dem did wel waahn ier di mesij. So evridie dem luk aad aad iina Gad Wod fi si ef wa Paal did a se mach op wid wa rait dong iina Gad Wod.” An afta dem du dat, dem du di sitn dem we dem lorn bout wa Gad waahn dem fi du.​—Aks 17:11, 12.

Yu kyan du di siem ting tu. Wen wi put wi main pan Gad Kindom an du wa im waahn wi fi du, Gad a-go tek kier a wi nou an im a-go gi wi wol iip a nais sitn iina di fyuucha an mek wi liv iina piis fi eva.