1. A wa mek som piipl mait-a tingk se dem kyaahn go liv fi eva?

 KAA nof piipl waahn fi mek shuor se dem no siki-siki, dem iit gud fuud an eksasaiz aafn. Bot iivn duo dem du dat, dem stil nuo se wan die dem a-go get uol, ar get sik an ded. An so wen dem ier se sumadi kyan liv fi eva, it komiin laik se a jriim dem a jriim​—dem no biliiv notn kyan go so. Bot bies pan wa Jan 3:16 an 5:24 se, Jiizas mek wi nuo se wi kyan go “liv fi eva.”

 2. A wa Jan 6:39, 40 se a-go apm tu piipl we ded?

² Jiizas did wok wan mirikl fi fiid wan big kroud a piipl wid som fish an bred. a Wol iip a piipl did shak wen im du dat. An di neks die wen dem fala im go a Kyaporniyom, im se sitn we mek dem mout jrap a grong. Im mek dem nuo se ded piipl kyan kom bak alaiv an get fi liv fi eva. (Riid Jan 6:39, 40.) Tingk bout wa dat a-go miin fi yu fren an fambili dem we ded. Wa Jiizas se mek wi nuo se nof a di piipl dem we ded a-go kom bak alaiv an wi an dem kyan get fi liv fi eva. Bot di res a di sitn dem we Jiizas se iina Jan chapta 6 did aad fi nof piipl andastan dem taim de an it stil aad fi nof piipl andastan. Mek wi si wa mek.

 3. Azkaadn tu Jan 6:51, a wa Jiizas did se bout imself?

 ³ Di mirikl we Jiizas did du fi fiid di piipl dem we fala im go a Kyaporniyom mek dem kuda tingk bout di mana we Jeuova did yuuz fi fiid dem faada faada dem iina di dezot. Matarafak, di piipl dem did don nuo se di Baibl kaal di mana “fuud fram outa evn.” (Sa. 105:40; Jan 6:31) So Jiizas yuuz wa dem nuo bout di mana fi tiich dem sitn impuotant bout imself. Im shuo dem se iivn duo Jeuova did wok wan mirikl fi gi di Izrelait piipl dem fuud iina di dezot, di wan dem we nyam di mana did stil en op ded. (Jan 6:49) Bot Jiizas mek dem nuo se im a “di riil fuud fram outa evn,” an “di fuud we Gad gi,” an “di bred we gi laif.” (Jan 6:32, 33, 35) So di mana kudn mek piipl liv fi eva. Bot Jiizas se: “Mi a di fuud we gi laif, an we kom dong fram outa evn. Ef enibadi nyam dis ya fuud ya, dem a-go liv fi eva.” (Riid Jan 6:51.) Di Juu piipl dem beks wen im se dat kaa dem neehn nuo wa im did miin. So dem staat fi wanda se, ‘Ou Jiizas fi se im a “di fuud” we kom dong fram outa evn an dat im beta dan di mana we Gad did gi wi faada faada dem?’ Jiizas mek dem nuo se: “Mi uona badi a di fuud we mi gweehn gi.” Bot wa im kuda miin bai dat? Wi fi waahn fi get di ansa fi da kwestiyan de kaa it a-go shuo wi ou wi kyan get fi liv fi eva.

A WA JIIZAS DID MIIN WEN IM TAAK BOUT IM BADI AN DI FUUD WE GI LAIF?

 4. Wa mek wa Jiizas did se did shak di piipl dem?

⁴ Som a di piipl dem we did a lisn tu Jiizas did shak wen im se: “Mi uona badi a di fuud we mi gweehn gi so di piipl dem iina di worl kyan liv.” Dem mait-a did tingk se Jiizas did miin se im a-go gi dem im badi fi nyam. (Jan 6:52) Bot Jiizas du sitn els we shak dem agen wen im se: “Ef unu no nyam di Man we Gad Pik badi an ef unu no jringk fi’im blod, unu naa go liv fi eva.”​—Jan 6:53.

 5. Wa mek wi nuo se Jiizas neehn waahn di piipl dem fi jringk im blod?

⁵ Iina Nowa taim, Gad did mek di piipl dem nuo se dem no fi nyam notn we av blod iina it. (Jen. 9:3, 4) An Jeuova did se dis agen iina di Laa we im gi tu di Izrel piipl dem. Im mek dem nuo se enibadi we nyam blod, dem fi ded. (Liv. 7:27, ftn.) Jiizas did mek di piipl dem nuo se dem fi stik tu wa di Laa se. (Mat. 5:17-19, NWT ) So fi tingk se Jiizas did waahn di piipl dem fi nyam im badi an jringk im blod, notn kudn go so. Bot Jiizas did a tiich dem fi mek dem si wa dem niid fi du fi “liv fi eva.”​—Jan 6:54.

 6. A ou wi nuo se wen Jiizas did se dem fi ‘nyam im badi an jringk im blod’ im did a yuuz wan tuori?

⁶ Wen Jiizas did a taak tu di piipl dem, im did jos a yuuz wan tuori fi tiich dem sitn biga. Laik wen im did a taak tu di Samaritan uman an se: “Enibadi we jringk di waata we mi gi’im naa go torsti agen. Yu si, di kain-a waata we mi a-go gi’im gweehn ton wan spring iina im, wan we no tap ron, an we kaaz im fi liv fi eva.” (Jan 4:7, 14) b Jiizas neehn a se di Samaritan uman kuda jos jringk waata fram di wel an get fi liv fi eva. An  a siem so im neehn miin se di kroud a piipl wuda get fi liv fi eva ef dem nyam im badi an jringk im blod.

WAN NEDA TAIM WEN JIIZAS TAAK BOUT IM BADI AN IM BLOD

 7. Wa som piipl av it fi se bout wa Jiizas se a Jan 6:53?

⁷ Som choch piipl tingk se wa Jiizas se a Jan 6:53 miin se a dat dem fi fala wen dem a kip di Laad Sopa, kaa lieta wen dem did a kip it, Jiizas did se som sitn we soun laik wa im did se aredi. (Mat. 26:26-28) Dem biliiv se evribadi we go a di Laad Sopa fi nyam di bred an jringk di wain. Bot a so it fi go? Dis a sitn gud fi wi nuo wa Jiizas miin kaa evri ier uol iip a piipl aal uova di worl kom tugeda wid wi fi kip di Laad Sopa. Mek wi luk pan som sitn we Jiizas did se a Jan 6:53 we difrant fram wa im se a di Laad Sopa.

 8. Wa a tuu sitn we mek wi nuo se wa Jiizas se a Jan 6:53 difrant fram wa im se wen im did a kip di Laad Sopa? (Luk pan di picha dem tu.)

⁸ Si tuu sitn ya we difrant: (1) Wa Jiizas se a Jan 6:53-56 mek wi nuo se a di Juu piipl dem im did a taak tu iina Gyalalii iina 32 C.E. An dat did a bout wan ier bifuo im kip di Laad Sopa iina Jeruusilem. (2) Di piipl dem iina Gyalalii we Jiizas did a taak tu onggl did a tingk bout fi ful dem beli an di sitn dem we  dem kuda get an naa tek iin wa Jiizas a tiich dem. (Jan 6:26) Matarafak, kaa dem neehn andastan wa Jiizas a se, nof a dem tap biliiv iina im. Iivn som a im falara dem tap fala im. (Jan 6:14, 36, 42, 60, 64, 66) Bot wen Jiizas did a kip di Laad Sopa iina 33 C.E., im 11 apasl dem did di de wid im iivn duo dem neehn andastan evriting we im did a tiich dem. Dem neehn tan laik di piipl dem iina Gyalalii. Dem did nuo se Jiizas a Gad Bwai Pikni we kom dong fram evn. (Mat. 16:16) So im big dem op an mek dem nuo se: “Unu tan wid mi wen mi did a go chuu mi chobl dem.” (Luuk 22:28) Dem tuu sitn ya we wi jos luk pan mek wi si klier klier se wa Jiizas se a Jan 6:53 neehn av notn fi du wid ou wi fi kip di Laad Sopa. Bot muor sitn de we mek wi se dat.

WA JIIZAS SE AV NOTN FI DU WID WI?

 9. A uu Jiizas did a taak bout wen im did a kip di Laad Sopa?

⁹ Wen Jiizas did a kip di Laad Sopa, im tek di bred we naa no yiis ar notn els laka dat iina it an gi im apasl dem an mek dem nuo se it tan fi im badi. Den afta dat im tek di kop wid di wain an tel dem se: “Dis a mi blod we set op di nyuu plan we Gad mek wid unu.” (Maak 14:22-25; Luuk 22:20; 1 Kor. 11:24) Dat a did sitn impuotant kaa di nyuu plan we Jiizas mek, im mek it wid som a di Izrel piipl dem an som ada piipl we get pik fi go a evn fi bi “iina Gad kindom,” im neehn mek da plan de wid evribadi. (Iib. 8:6, 10; 9:15) Jiizas apasl dem neehn andastan wa im did a se dem taim de, bot likl afta dat Jeuova did a-go yuuz im uoli spirit fi pik dem fi mek dem bi paat a di nyuu plan so dat dem kyan ruul wid Jiizas iina evn.​—Jan 14:2, 3.

10. Ou wi nuo se di wan dem we Jiizas did a taak tu iina Gyalalii did nof nof muor dan di wan dem we im did a taak bout a di Laad Sopa? (Luk pan di picha tu.)

¹⁰ Sitn fi wi tingk bout a dat Jiizas iit di Laad Sopa wid im ilevn apasl dem we stik wid im. A dem im did a taak bout wen im se: “Unu we a fala mi.” (Luuk 12:32) So a onggl Jiizas apasl dem we did stik wid im an enibadi els we Jeuova pik fi go a evn wid Jiizas fi nyam di bred an jringk di wain. So dat miin tu se wa Jiizas se tu im apasl dem da nait de difrant fram wa im se tu di kroud a piipl iina Gyalalii. Wa Jiizas se a Gyalalii a did fi uol iip muor piipl dan wa im did se a di Laad Sopa.

11. Ou wa Jiizas se iina Gyalalii mek wi nuo se im neehn a taak bout di wan dem we get pik fi go a evn?

¹¹ Wen Jiizas did de iina Gyalalii iina 32 C.E., im did a taak tu di Juu piipl dem uu did a luk fuud fram im fi ful dem beli. Bot Jiizas mek dem nuo se im av sitn beta dan da kain-a fuud de​—sitn we kuda mek dem liv fi eva, an pan tap a dat, piipl we ded kuda kom bak alaiv an liv fi eva tu. Wa Jiizas did a se ya-so a neehn fi di wan dem we get pik fi go a evn uu im did a taak bout a di Laad Sopa. Bot Jiizas did a mek di kroud a piipl iina Gyalalii nuo se evribadi kuda get dem blesn ya. Matarafak, im se: “Ef enibadi nyam dis ya fuud ya, dem a-go liv fi eva. Mi uona badi a di fuud we mi  gweehn gi so di piipl dem iina di worl kyan liv.”​—Jan 6:51. c

12. Wa wi afi du fi get di blesn dem we Jiizas taak bout?

¹² Yu tingk Jiizas did miin se evribadi wuda get dem blesn ya jos so? Nuo sa! Kaa im mek di kroud a piipl iina Gyalalii nuo se a onggl di wan dem we chos iina im a-go get dem blesn de. Bot nof piipl we se dem a Kristiyan tingk se dem onggl niid fi ‘biliiv iina Jiizas Krais’ an dem wi get siev. (Jan 6:29) Bot memba ino, som a di piipl dem iina Gyalalii uu did biliiv iina Jiizas en op ton dem bak pan im. Bot wa mek dem du dat?

13. Wa Jiizas se im riil falara dem wuda afi du?

¹³ Nof a di piipl dem we Jiizas gi di bred an di fish jos did a fala im kaaz a di sitn dem we dem kuda get, kaa im kuda mek dem get beta, gi dem fuud fi iit, an im tiich dem tingz we dem did waahn fi ier. Bot Jiizas mek it klier klier se dem did niid muor dan dat. Im neehn jos kom a ort fi gi piipl wa dem fiil laik dem waahn. Im mek dem nuo se im riil falara dem wuda afi “kom tu” im an a tek iin di sitn dem im a tiich dem an du dem tu.​—Jan 5:40; 6:44.

14. Wa wi fi du fi get fi liv fi eva?

¹⁴ Wen Jiizas did a taak bout im badi an im blod, a mek im did a mek di piipl dem nuo se im did a-go gi op im laif so dat dem kuda liv fi eva. Jos laik ou dem  taim de di Juu piipl dem wuda afi chos iina Jiizas an biliiv wa im se, a di siem ting wi afi du iina fi wi taim ya nou. (Jan 6:40) Jan 6:53 mek wi nuo se wi afi chos iina Jiizas badi an blod we im gi op fi wi fi get di chaans fi liv fi eva. An dis a sitn we uol iip a piipl kyan get.​—Ifii. 1:7.

15-16. Wa a som a di impuotant sitn dem we wi lorn fram wa Jan chapta 6 se?

¹⁵ Wa Jiizas se iina Jan chapta 6 wot nof tu aal a wi tide. It mek wi si se Jiizas riili lov piipl. Wen im did de iina Gyalalii, im mek sik piipl get beta, im tiich piipl bout Gad Kindom govament, an im mek shuor se dem did av fuud fi nyam. (Luuk 9:11; Jan 6:2, 11, 12) Bot di bigis ting we Jiizas du a fi tiich wi se im a “di bred we gi laif.”​—Jan 6:35, 48.

¹⁶ Wi nuo se di wan dem we di Baibl kaal di “ada shiip” naa go nyam di bred an jringk di wain a di Laad Sopa we wi kip a ier taim. (Jan 10:16) Bot dat no miin tu se dem naa go get di blesn dem we kom fram wa Jiizas du fi wi. Dem wi get dem blesn ya wen dem shuo se dem chos iina wa Jiizas du wen im gi op im laif fi wi. (Jan 6:53) Di wan dem uu fi nyam di bred an jringk di wain a di wan dem we Jeuova pik fi ruul wid Jiizas iina evn, an a dem wan ya a paat a di nyuu plan. So weda wi get pik fi go a evn ar wi a-go liv pan di ort, di sitn dem a Jan chapta 6 wot nof tu wi. It mek wi si se di onggl wie wi kyan get fi liv fi eva a ef wi chos iina wa Jiizas du fi wi.