2022 წლის 1 მაისიდან ექვსი დღის განმავლობაში ხელმძღვანელი საბჭოს წევრმა, ძმა მარკ სანდერსონმა, მოინახულა უკრაინიდან პოლონეთში გაქცეული და-ძმები. მას თან ახლდა ფილიალის კომიტეტის სამი წევრი. მათ უშუალოდ დაზარალებული და-ძმებისგან მოისმინეს თავსგადამხდარი ამბები და ისინი ხელმძღვანელი საბჭოს სიყვარულსა და თანადგომაში დაარწმუნეს.

ექვსი დღის განმავლობაში ძმებმა 2 500 კილომეტრზე მეტი გაიარეს ლტოლვილი და-ძმების მოსანახულებლად, რომლებიც სხვადასხვა ადგილებს, მათ შორის ჩვენს დარბაზებს, აფარებენ თავს. ისინი აგრეთვე შეხვდნენ იმ მოხალისეებს, რომლებიც საზღვარზე უკრაინელ და-ძმებს ხვდებიან.

ერთი უკრაინელი ძმა ამბობს: „ეს შეხვედრა ჩვენთვის ძალის მომცემი იყო, თითქოს პაპანაქებაში ჭიქა ცივი წყალი მოგვაწოდეს“.

„ეს დიდი სიურპრიზი იყო. ვხედავთ, როგორ ზრუნავს იეჰოვა ჩვენზე“, — აღფრთოვანებით აღნიშნა ერთმა უკრაინელმა დამ.

კიდევ ერთმა უკრაინელმა დამ ასეთი რამ თქვა: „პოლონეთში ცარიელ-ტარიელი ჩავედით, მაგრამ იეჰოვას წყალობით ახლა ყველაფერი გვაქვს, რაც გვჭირდება“.

ძმებმა სხვა მოხალისეებიც მოინახულეს, რომლებიც ლტოლვილ და-ძმებს ეხმარებიან. ძმა სანდერსონმა მათ ხელმძღვანელი საბჭოს გულთბილი მოკითხვები გადასცა. მან ებრაელების 6:10-ში ჩაწერილი სიტყვების პერიფრაზი გააკეთა და ხაზგასმით აღნიშნა, რომ იეჰოვა არ დაივიწყებს მათ შრომას, ბოლოს კი დასძინა: „არც ჩვენ დავივიწყებთ!“. მოხალისეები იეჰოვას ემადლიერებიან, რომ რაღაცით მაინც შეუძლიათ გასაჭირში ჩაცვენილი თანამორწმუნეების დახმარება.

პოლონეთის ფილიალის კომიტეტის წევრმა, ძმა ვესა ვაანანენმა აღნიშნა: „რწმენის განმამტკიცებელი იყო საკუთარი თვალით იმის დანახვა, რომ ყველაფერი იეჰოვას კონტროლქვეშაა. იეჰოვა ზუსტად იმას გვაძლევს, რაც იმ მომენტშია საჭირო. ამას კი ხელმძღვანელი საბჭოსგან მიღებული დროული ხელმძღვანელობით და მზადყოფნის სულით სავსე იმ და-ძმების მეშვეობით აკეთებს, რომლებიც თანაქრისტიანების დასახმარებლად ძალ-ღონეს არ იშურებენ“.

და-ძმები, რომლებიც ნებისმიერ ვითარებაში თანაქრისტიანების საჭიროებებზე ზრუნავენ, იესოს სიტყვისამებრ გაცემით გამოწვეულ სიხარულს განიცდიან (საქმეები 20:35).