MBEƐD lmut n Cimcun, yiwen wergaz iwumi qqaren Camwil yuɣal d nnbi di tmurt n Isṛayil. At Isṛayil ţḥawaten deg-​s akken ad sɛun agellid ara iḥekmen fell-​asen am leǧnas nniḍen. S wayen akka i xedmen amzun d rregmat i regmen Yahwa axaṭer d neţţa i d agellid-​nsen n ṣṣeḥ. Xas akken, Yahwa yefka lameṛ i Camwil akken a sen-​yeddu di lebɣi. Ṛebbi yextaṛ ihi yiwen wergaz yesɛan annuz yeţţusemman Cawul. Lameɛna, mi gɛedda kra n lweqt, Cawul yuɣal d amnefxi yerna yeţɛaṣi Ṛebbi. Yahwa iḍerref-​it, dɣa yenna i Camwil ad yextiṛ yiwen ilemẓi yeţţusemman Dawed akken ad yuɣal d agellid. Acu kan, armi d asmi i ɛeddan kra n iseggasen i geṭṭef akersi n lḥekma.

Yiwen n wass, mi t-​mazal ahat d ilemẓi, Dawed iṛuḥ ad iẓer atmaten-​is yellan di lɛeskeṛ n Cawul. Gulyat, yiwen n weɛdaw yesɛan azal n tlata n lmitrat di lqedd, yesseɣli-​d rrehba ɣef iɛsekṛiwen meṛṛa n wat Isṛayil. Yezga yecqirriw-​iten ama d nutni ama d Ṛebbi-​nsen. Annect-​a yesserfa mliḥ Dawed, dɣa yeqbel ad yennaɣ neţţa d lɣul-​agi. Mi geffeɣ ɣer imenɣi, yewwi kan ildi d kra n yeblaḍen yid-​es. Gulyat iqejjem di Dawed. Dawed yerra-​yas belli leslaḥ-​is ɣelben wigad-​is imi s yisem n Yahwa Ṛebbi ara t-​iqabel. Umbeɛd, Dawed yenɣa-​t s yiwen weblaḍ kan, yekkes-​as ssif-​is yerna yegzem-​as yis aqerru. Iɛsekṛiwen n Ifilistiyen ikcem-​iten lxuf, dɣa rewlen.

Tirrugza n Dawed tessewhem Cawul, dɣa yerra-​t d aqerru ɣef lɛeskeṛ-​is. Lameɛna, imi yerbeḥ Dawed aṭas n lgirrat, annect-​a yessemɣi-​d tismin tisemmamin deg wul n Cawul. Dawed iţţuḥettem ihi ad yerwel neɣ m’ulac ad immet. Acḥal d aseggas Cawul yeţnadi a t-​ineɣ, meɛna Dawed yeqqim d unṣiḥ ɣer ugellid-​is. Yenna deg wul-​is belli d Yahwa Ṛebbi i gerran Cawul d agellid. Ɣer taggara, Cawul immut di lgirra. Cwiṭ n lweqt umbeɛd, Dawed yuɣal d agellid akken i t-​yewɛed Yahwa.

Tura m’akka yuɣal Dawed d agellid, ibɣa ad ibnu lemqam i Yahwa. Acu kan, Yahwa yenna-​yas belli d yiwen seg warraw-​is ara t-​ibnun. Isem-​is Sliman. Lameɛna Ṛebbi iǧuza Dawed. Amek? S leɛqed-​agi ifazen i gexdem yid-​es: si twacult-​is a d-​ffɣen igelliden ara yawin ɣer Zzerriɛa-​nni i gewɛed Ṛebbi di Ɛidin. Amsellek-​agi i gextaṛ Ṛebbi ad yili d Lmasiḥ, yeɛni “Win iţwadehnen.” Yahwa iwɛed belli Lmasiḥ-​agi ad yili d aqerru ɣef yiwet lḥukuma, neɣ Tagelda, ara idumen i dima.

Ul n Dawed yeččuṛ d asteɛṛef, dɣa ijmeɛ-​ed aṭas n sselɛa akk-​d ddheb d lfeṭṭa i lebni n lemqam. S ṛṛuḥ n Ṛebbi, Dawed yura daɣen ayendin n ihellilen. Daɛneţţa, atan wayen i d-​yenna mi qrib ad yemmet: “D ṛṛuḥ n Yahwa i d-​ihedṛen seg-​i, awal-​is ɣef yiles-​iw.”—2 Camwil 23:2.

—Ayagi yers ɣef 1 Camwil; 2 Camwil; 1 Amezruy; Icɛaya 9:7; Matta 21:9; Luqa 1:32; Yuḥenna 7:42.