DI TIRA IQEDSEN neţţaf aṭas n ṣṣifat ifazen n Ṛebbi i ɣ-​iţɛawanen a t-​nissin. Di lemtel, heddṛent-​ed ɣef ṛebɛa n ṣṣifat-​is timeqranin: tazmert, lḥeqq, lekyasa d leḥmala. A d-​nehdeṛ tura ɣef mkul yiwet seg-​sent.

Yahwa yenna i Abṛaham: “Nekk, d Ṛebbi Bab n Tezmert.” (Laṣel n ddunit 17:1) Ulac akk win yesɛan tazmert-​is. Yerna tazmert-​agi ur tesɛi tilisa ur tesɛi taggara. S lqewwa-​s ixleq-​ed igenwan d lqaɛa.

D lmuḥal ad yessexdem Ṛebbi tazmert-​is bla ṛṛzina. M’ara ţ-​issexdam, iḥekkem deg yiman-​is yerna ur ţ-​issexdam ara bla lmeqsud. Asexdem i ţ-​yessexdam icudd s lekmal ɣer lḥeqq-​is, lekyasa-​s d leḥmala-​s.

Yahwa yessexdam tazmert-​is mebla cceḥḥa i nnfeɛ n iqeddacen-​is unṣiḥen. “Allen-​is ţezzint ɣef lqaɛa meṛṛa iwakken a d-​ibeggen tazmert-​is i wid i t-​iḥemmlen s wul ikemlen.” (2 Amezruy 16:9) Ur tebɣiḍ ara aţ-​ţqerrbeḍ ɣer Ṛebbi-​yagi bu tezmert, meɛna yesɛan leḥmala?

“Yahwa iḥemmel lḥeqq.” (Ahellil 37:28) Ixeddem dima ayen yellan d lḥeqq ɛlaḥsab n leqwanen-​is ikemlen.

Ṛebbi yekṛeh lbaṭel. D win “ur nxeddem ara lxilaf ger yemdanen yerna ur nqebbel ara tajɛelt.” (Asmekti 10:17) Yeţxaṣam wid iţqehhiren wiyaḍ yerna yeţɛawan wid ur nezmir ara, gar-​asen tuǧǧal d igujilen. (Tuffɣa 22:22) Ur yeţḥasab ula d yiwen ɣef liǧal n ccetla-​s. “Sidi Ṛebbi ur ixeddem ara lxilaf ger yemdanen. Lameɛna di mkul lǧens, yal amdan i t-​yeţḍuɛun, ixeddmen ayen yellan d lḥeqq, iɛǧeb-​as i Ṛebbi.”​—Lecɣal 10:34, 35.

Lḥeqq n Yahwa yeṛzen s lekmal: ur yeţmal ɣer yiwen yidis wala ɣer wayeḍ. D lmuḥal ad isemmeḥ mebla ssebba yerna d lmuḥal ad yili d win iweɛṛen s waṭas. Iţɛaqab wid ur neţţendemmay ara di cceṛ i xeddmen, meɛna yeţbeggin-​ed ṛṛeḥma ḥninen i wid yeţbeddilen tikli. “Yahwa yesɛa ṛṛeḥma d lemɣiḍa, ẓẓay i reffu yerna yeččuṛ wul-​is d lḥanna. Ur yeţlummu ara i lebda yerna ur yeţţaṭṭaf ara cceḥna i dima. Ur ɣ-​yelḥi ara swakken llan ddnubat-​nneɣ; ur ɣ-​ixelleṣ ara swakken nuklal, ɛlaḥsab n lɣelṭat-​nneɣ.” (Ahellil 103:8-10) Lameɛna mačči d ayagi kan, Ṛebbi iceffu ula ɣef lecɣal i xeddmen iqeddacen-​is s nnṣaḥa yerna yeţǧazi-​ten. Ṛebbi yesɛan lḥeqq am wagi, ur k-​yeţţawi ara aţ-​ţţekleḍ fell-​as?

Yahwa d Lɛinṣer n mkul lekyasa. “Acḥal lqayit, acḥal meqqṛit leɛqel ţ-​ţmusni n Sidi Ṛebbi!” (At Ṛuma 11:33) Lekyasa-​s ur tesɛi ara tilisa yerna ulac ayen uɣur i nezmer a ţ-​nmettel.

Lekyasa n Ṛebbi teţban-​ed ɛinani di txelqit. Win yuran Ahellil wis 104 yenna-​d deg wafir 24: “Acḥal i ketṛen lecɣal-​ik, a Yahwa! Txedmeḍ-​ten meṛṛa s lekyasa.”

Lekyasa n Ṛebbi teţban-​ed diɣen di Tira Iqedsen. Yura Dawed, yiwen ugellid n Isṛayil n zzman aqdim: “Asmekti n Yahwa d win iɣef i nezmer a neţkel, yeţţarra d ukyis win ur nessin ara.” (Ahellil 19:7) Twalaḍ! Tzemreḍ aţ-​ţesfaydiḍ s lekyasa n Ṛebbi ur nesɛi tilisa! D ayen ara txedmeḍ?

Ṣṣifa yakk tameqrant n Ṛebbi d leḥmala. Tira Iqedsen qqarent-​aɣ-​d belli “Ṛebbi d leḥmala.” (1 Yuḥenna 4:16) D leḥmala i geţdemmiren yerna i geţwellihen ayen akk i gxeddem.

 Yahwa yesskanay-​aɣ-​d deg waṭas n tɣawsiwin belli iḥemmel-​aɣ. Yeţţak-​aɣ-​d leḥwayeǧ n lɛali. “Neţţa yeţbeggin-​ed iman-​is s lxiṛat i gxeddem: d neţţa i wen-​d-​iţţaken ageffur (lehwa), d neţţa i wen-​d-​iţţaken lɣellat di lweqt-​nsent, d neţţa daɣen i wen-​d-​iţakken tamɛict-​nwen, ula d ulawen-​nwen d neţţa i ten-​issefṛaḥen.” (Lecɣal 14:17) D ṣṣeḥ, “kra n tikci yelhan teţţas-​ed seg igenwan, s ɣuṛ [...] Ṛebbi i d-​ixelqen tafat n igenwan.” (Yeɛqub 1:17) Tira Iqedsen ţ-​ţikci ɣlayen i d-​yekkan sɣur Ṛebbi. S Tira-​yagi, Ṛebbi yesselmad-​aɣ leqwanen-​is akk-​d imenzayen-​is (lumuṛ-​is) yeččuṛen d leḥmala yerna yesselmad-​aɣ tideţ fell-​as. Ɛisa yenna-​d deg yiwet n tẓallit: “D awal-​ik i ţ-​ţideţ.”​—Yuḥenna 17:17.

Ṛebbi iţɛawan-​aɣ diɣen akken a neɣleb uguren-​nneɣ. “Ḍegger taɛkemt-​ik ger ifassen n Yahwa s yiman-​is, neţţa a k-​iɛiwen. D lmuḥal ad yeǧǧ aḥeqqi ad imdeṛkal.” (Ahellil 55:22) Yeţsamaḥ ddnubat-​nneɣ. “Kečč a Yahwa, telhiḍ yerna tweǧdeḍ i ssmaḥ; yeččuṛ wul-​ik d lḥanna ɣer wid ineddhen ɣur-​ek.” (Ahellil 86:5) Yeţţak-​aɣ ula ţ-​ţudert n dayem. “A sen-​yesfeḍ imeṭṭawen, ur teţţili lmut, ur yeţţili leḥzen, ur yeţţili umeǧǧed ur yeţţili lqeṛḥ.” (Aweḥḥi 21:4) Ɣer wacu ara k-​tdemmer leḥmala n Ṛebbi? A t-​tḥemmleḍ ula d keččini?

Ṛebbi yebɣa a t-​nissin mliḥ. Atah wamek i ɣ-​yenha Wawal-​is: “Qeṛṛbet ɣer Sidi Ṛebbi, neţţa a d-​iqeṛṛeb ɣuṛ-​wen.” (Yeɛqub 4:8) Yahwa yessawel-​as i nnbi Abṛaham yellan d unṣiḥ “aḥbib-​iw.” (Icɛaya 41:8) Yebɣa aţ-​ţiliḍ d aḥbib-​is ula d keččini.

Skud teţţissineḍ Ṛebbi, skud aţ-​ţḥusseḍ tqerbeḍ ɣur-​es yerna aţ-​ţafeḍ lfeṛḥ. “D aseɛdi wemdan” iwumi “yella lfeṛḥ-​is di ccariɛa n Yahwa, di ccariɛa-​ines yeqqar s leɛqel am yiḍ am wass.” (Ahellil 1:1, 2) Kemmel ihi taɣuri n Tira Iqedsen. Meyyez ɣef ṣṣifat d lecɣal n Ṛebbi. A s-​tessekneḍ tḥemmleḍ-​t m’ara tessexdameḍ ayen i tḥeffḍeḍ. “Ma nḥemmel Sidi Ṛebbi ilaq a neḥrez lumuṛat-​is; lumuṛat-​is ur ẓẓayit ara.” (1 Yuḥenna 5:3) Am ugellid Dawed, ḍleb ihi i Ṛebbi di tẓallit: “Mel-​iyi iberdan-​ik, a Yahwa! Sɣer-​iyi tizribin-​ik. Sselḥu-​yi di tideţ-​ik.” (Ahellil 25:4, 5) Aţ-​ţwaliḍ belli Ṛebbi d win “ur nebɛid ara ɣef mkul yiwen deg-​nneɣ.”​—Lecɣal 17:27.