Ista poi gaw, Chyum Laika hta madung tawn ai poi n re. Dai poi a labau hpe sawk sagawn yu yang, Ista poi a lachyum ajet hpe chye lu na re. Dai poi gaw, amyu shaprat ai hte seng ai moi na htung hking lailen ni hpe madung tawn da ai. Lawu na lam ni hpe maram yu u.

1.   Amying: Laika buk langai (Encyclopædia Britannica) hta ndai hku tsun da ai: “Ista ngu ai Inglik amying a ru npawt hpe atsawm n chye lu ai. Dai amying hpe tsaban 8 kaw na, Anglo-Saxon jau kaba Venerable Bede gaw, Eostre ngu shaga ai Anglo-Sexon ginhtawng nat hpara num a amying kaw nna la da ai re.” Lakap da ai laika nkau mi hta, Babelon amyu shaprat hpara num re ai Ishtar hte bung ai Hponisha amyu shaprat hpara num Astarte hte mung matut mahkai madun da ai.

2.   Prang Tai: Prang tai gaw “Uyawpa hte sinpraw kaang buga kaw na, shut shai ai ginhtawng poi ni a moi na htung lailen kaw nna yu hkrat wa ai myu shaprat lu ai atsam a masat dingsat re.”​​—Encyclopædia Britannica.

3.   Di Ni: Ga Htai Chyum langai (Funk & Wagnalls Standard Dictionary of Folklore, Mythology and Legend) hku nga yang, Ista prang tai kaw na lu la ai ngu sawn la mai ai Ista di ni hpe hkan tam ai gaw, “ma ni ginsup ai ginsup ladat langai sha n re ai. Dai gaw amyu shaprat lu ai atsam htung lailen langai re ai.” Shatsawm da ai Ista di gaw, “ngwi pyaw lam, sut su lam, hkam kaja lam hte makawp maga lam ni hpe mau na daram, jaw ya lu ai” nga nna htung hking nkau na masha ni kam ma ai.​—Traditional Festivals.

4.   Ista hking: “Scandinavian nat hpara shayi shing n rai, Eastre hpara hpe sa nawku ai shaloi palawng nnan n hpun yang, n hkungga ai lam madun ai rai nna, n kaja ai gam maka byin wa shangun ai ngu myit la ma ai.”​—The Giant Book of Superstitions.

5.   Jahpawt Manap Nawku Zuphpawng Ni: Dai nawku zuphpawng ni gaw, “hkrung mahkrung yawng a matu prat nnan galaw ya lu ai atsam nga ai jan hpe hkap tau ai hku nna, shani hte shana aten maren sha re ai ginhtawng ta laman hta galaw ai” moi prat na jan hpe nawku ai ni a htung lailen ni hte matut mahkai nga ai.

 Ista a ru npawt hte seng nna, laika buk langai (The American Book of Days) hta ndai hku tsun da ai: “Tsaban 4 hta, Church ningbaw ni gaw, moi prat na shut shai ai htung lailen ni hpe hkap la wa nna, Hkristan lailen hku galaw kau ma ai.”

 Karai Kasang n ra sharawng ai htung lailen ni hte Karai Kasang hpe n nawku na matu Chyum Laika hta sadi jaw da ai. (Marku 7:6-8) Lahkawng Korinhtu 6:17 hta Yehowa ndai hku tsun da ai: “Shanhte a ka-ang na pru nhtawm, Kaga lak lak rai wa mu, . . . Awu asin re ai hpe hkum hkra mu.” Ista poi gaw shut shai ai poi re ai majaw, Karai Kasang a sharawng awng ai hpe lu mayu ai ni gaw, dai poi hpe koi ra na re.