Lam #1: Tinang jaw yang tinang bai lu na re.

Nang gaw gam jaw gam ya chye ai wa re ai hpe kaga ni sadi hkrup nna, nang hpe mung gam jaw gam ya wa na re. Chyum Laika hta ndai hku tsun da ai:

• “Jaw mu, shing rai jang, nanhte hpe jaw na ma rin dai: . . . nanhte hteng ya ai dang hte, nanhte hpe bai hteng ya na ma rin dai.”​—Luka 6:38.

• “Masha ni hpe jaw mu, shing rai jang Karai Kasang mung nanhte hpe jaw na marin dai.”​—Luka 6:38, Kabu Gara Shiga Chyum Laika.

Lam #2: Kaga ni hpe nang karum ya ai gaw, na hkum nang karum ya nga ai re.

Kaga ni hpe karum ya ai gaw, tinang hkum tinang hkungga lam nga wa shangun nna, gam jaw gam ya ai lam kaw na lu la ai myit dik lam hpe mung lu ai. Chyum Laika hta ndai hku tsun da ai.

• “Hkam sha ai hta jaw ya ai mahtang grau a nga ai.”​—Kasa 20:35.

• “Nang poi galaw daw n yang gaw, matsan mayan ni, jahten labye ni, lagaw hten ai ni hte myi kyaw ai ni hpe shaga la u: shing rai jang gaw, nang a lu na ndai: shanhte nang hpe chyeju htang lu na ma ai n rai.”​—Luka 14:13, 14.

Kaga ni hpe lanu lahku chye ai ramma ni grai law hkra nga ai. Lawu na ga shadawn n kau mi hpe yu yu u.

“Kalang marang ngai TV yu mayu wa ai shaloi, bungli galaw nga ai nu yan wa hpe myit dat ai. Shan bungli kaw na bai wa yang, grai ba nga na re. Dai majaw, ngai rawt nna shat wan ni kashin, ding-ye ye tawn da ai. Nu yan wa gaw kohpi ra ai majaw, kohpi hpe mung shajin tawn da ya ai. Anu nta bai du wa ai shaloi, ‘nta bai du wa yang, myit grai pyaw ai. Nta ting mung san san seng seng rai taw ai. Nu sha grai myitsu nga ai’ ngu nna ngai hpe tsun ai. Nu yan wa hpe dai zawn lama ma galaw ya lu ai majaw ngai mung pyaw ai.”​—Hkesi.

“Nu yan wa gaw, ngai ra mara yawng hpe galaw ya wa ai. Dai majaw, maning hta awa na madaw gram na matu ra wa ai shaloi, gumhpraw hpe ngai shaw jaw ai. Teng nga yang, dai gumhpraw hpe grai na hkra mahkawng wa ai re. Awa chyawm gaw n la ai ngu tsun ai. Raitim, nu yan wa hpe dai hta grau na pyi naw karum ya ging ai. Nu yan wa hpe karum ya lu ai, gam jaw gam ya ai wa langai byin lu ai gaw, ngai hpe grai pyaw shangun ai.”​—Hawli.

Nang chye ai kun? Yehowa Sakse ramma ni gaw, Chyum hpaji jaw bungli hte kaga ni hpe karum ya lu ai majaw grai pyaw nga ma ai. Nkau mi gaw, Chyum Laika sharin ya ai ni grau ra ai kaga mungdan ni de pyi htawt na karum ya ma ai.

“Ngai gaw Amerikan mungdan kaw na re. Chyum Laika sharin ya ai ni grau ra ai Meksiko de htawt nga ai. Nye a matu kalang marang gumhpraw, arung arai ni hte gam jaw gam ya na matau yak ai. Hpa majaw nga yang, ngai gaw n lu su ai. Raitim, nye a aten hte n-gun atsam hpe hkaw tsun magam hta jailang ai hpe arung arai jaw ai hta na grau chyeju dum ma ai hpe ngai chye wa ai.”​—Iban.

Kaga ni hpe karum ya ai kaw na lu ai ngwi pyaw lam hpe lu mayu ai kun? Lawu hta hpaji jaw da ai lam nkau nga ai.

Nta masha ni hpe karum ya lu ai lam ni:

• N shangun yang pyi, nta jasan jaseng lam galaw u. Shat wan ni kashin u. Gawk hpe jasan jaseng u

• Shat shadu u

• Kanu kawa ni hpe chyeju dum ai lam tsun u

• Kahpu kanau ni hpe karum ya u. Shanhte jawng laika galaw ai shaloi karum ya u

Nta masha n re ai ni hpe karum ya lu ai lam ni:

• Machyi taw ai wa kaw laika langai sa u

• Asak kaba sai marai langai ngai a wang hpe jasan jaseng ya mai ai

• Lam amyu myu a majaw nta shinggan n lu pru ai ni hpang de sa chyai mai ai

• Mayak manghkang hkrum nga ai wa hpe kumhpa langai mari ya mai ai

Hpaji jaw ai lam: Tinang nan myit yu u. Ndai bat laman marai langai ngai hpe karum ya na ngu bandung jahkrat u. Lu la ai ngwi pyaw lam a majaw nang grai mau mat na re.

“Kaga ni hpe karum ya ai shaloi, ngwi pyaw lam lu la ai. Akyu rawng ai lama ma hpe galaw lu dat sai ngu hkam sha nna, kaga ni mung dai lailen hpe manu shadan ai hpe mu lu ai. Dai zawn karum ya ai majaw, tinang n shadu da ai ngwi pyaw lam ni lu wa ai. Grai law hkra bai lu ai majaw, ngai karum ya ai gaw hpa pyi naw n rai nga ai ngu hkam sha ai.”​—Elinna.