Jahpan langai hku nga yang, Amerika hta na ramma tsa lam shadang 80 daram gaw akyu hpyi tim, daw mi daram sha shani shagu akyu hpyi ma ai. Shanhte kaw na nkau mi gaw: ‘Akyu hpyi ai gaw myit simsa lam lu na matu sha kun? (sh) kaga lam ni naw nga ai kun?’ ngu ai hpe chye mayu na re.

•  Akyu hpyi ai ngu ai gaw hpa rai?

•  Akyu hpyi ga ni hpe Karai Kasang madat ya ai kun?

•  Hpa lam hte seng nna akyu hpyi mai ai kun?

•  Ramma shada tsun ai lam

Akyu hpyi ai ngu ai gaw, yawng mayawng hpe hpan da ai Hpan Madu hte tsun shaga ai re. Yehowa gaw yawng mayawng hta grau htum ai wa raitim, “shi anhte kadai hte mung tsan nga ai n rai” ngu nna tsun da ai. (Kasa 17:27) De a malai, “Karai Kasang hpang de sit sa wa mu; shaloi shi nanhte hpang de sit wa na” ngu nna tsun da ai.​—Yaku 4:8.

Karai Kasang hte nang gara hku ni htep lu na kun?

• Lam langai gaw akyu hpyi ai hku nna re. Dai lam hku nna Karai Kasang hte nang ga shaga nga ai re.

• Hpang na lam langai gaw Chyum Laika hkaja ai hku nna re. Dai lam hku nna Karai Kasang gaw nang hpe “ga shaga” ai.

Akyu hpyi nna Chyum Laika hkaja ai gaw, Karai Kasang hte nang ga shaga nga ai rai nna, ndai hku galaw ai gaw Karai Kasang hte ngang kang ai hku hkau lam nga na matu nang hpe karum ya na re.

“Tsaw htum ai Karai Yehowa hte ga shaga lu ai gaw, shinggyim masha ni sha, lu la ai kaja htum ahkaw ahkang langai re.”​—Jeremi.

“Nye a hkamsha lam ni hpe akyu hpyi ai hku nna Yehowa hpang de tsun dan ai gaw, shi hte grau ni htep wa shangun ai.”​—Miranda.

Nang Karai Kasang hpe kam nna shi kaw akyu hpyi yang pyi, shi teng sha madat ya nga ai ngu ai hpe hkap la na matu yak chye ai. Raitim Chyum Laika hta Karai Kasang hpe “Akyu hpyi ai ga madat mara ai wa” ngu nna tsun da ai. (Shakawn 65:2) ‘Myit ru myit tsang ai lam ni hpe shi a ntsa kabai mara da’ na matu saw shaga da ai. Hpa majaw kun? “Shi nanhte hpe myit dum ya nga ai majaw” re.—1 Petru 5:7.

Myit yu na lam: Na a hku hkau ai manang ni hte ayan ga shaga na matu aten la ai kun? Karai Kasang hte mung dai zawn sha mai galaw ai. Yehowa a amying hpe shaga nna ayan akyu hpyi u. (Shakawn 86:5-7; 88:9) “N sim n sa akyu hpyi nga” na matu Chyum Laika hta saw shaga da ai.​—1 Htesaloni 5:17.

“Akyu hpyi ai gaw sumsing Kawa hte ga shaga nga ai re ai majaw nye a hkamsha lam ni yawng hpe tsun dan ai.”​—Moise.

“Anu (sh) grau hku hkau ai manang ni hpe nye a hkamsha lam hpe tsun dan ai zawn, Yehowa hpe mung nye a hkamsha lam ni hpe tsun dan ai.”​—Karen.

“Lam shagu hta akyu hpyi nna tawngban ai hte shakawn kungdawn let, nanhte a hpyi mahpyi hpe Karai Kasang kaw shana nga mu” ngu nna Chyum Laika hta tsun da ai.​—Hpilipi 4:6.

Dai gaw na a manghkang ni hte seng nna akyu hpyi mai ai ngu tsun mayu ai kun? Re! “Na a lit Yehowa hta mara da u. Shi nang hpe shadaw na re ai” ngu Chyum Laika hta tsun da ai.​—Shakawn 55:22.

Karai Kasang kaw akyu hpyi ai shaloi, na a manghkang ni sha n-ga, kaga lam ni hpe mung hpyi mai ai. “Karum hpyi na matu sha Yehowa kaw akyu hpyi na nga yang, shi hte kaja ai manang byin lu sana n re. Shi hpe chyeju dum ai lam shawng tsun ging ai ngu ngai hkamsha ai. Shi hpe chyeju dum ging ai lam ni grai law hkra nga ai” ngu ramma num sha Chyantelle tsun ai.

Myit yu na lam: Hpa a matu chyeju dum ai kun? Shani shagu Yehowa hpe chyeju dum ai lam masum hpe tam yu mai na kun?

“Kachyi kajaw sha re ai lam ni, grai tsawm ai nam pan hpe mu ai zawn re ai aten ni hta Yehowa hpe chyeju dum ai lam akyu hpyi mai ai.”​—Anita.

“Nang ra sharawng ai hpan da lam langai ngai (sh) na a myit masin hpe hkra shangun ai Chyum daw langai ngai hpe myit sawn sumru nna Yehowa hpe chyeju dum mai ai.”​—Braiyan.