DAW 03
Chyum Laika Hpe Kam Mai Ai Kun?
Chyum Laika hta, ga sadi ni, hpaji jaw ga ni law law lawm ai. Dai lam ni hpe nang chye mayu tim, loi gaw htingnut nga na re. Grai dingsa mat sai laika buk kaw na, ga sadi ni hte hpaji jaw ga ni hpe kam mai na kun? Ya aten hte htawm hpang hta lu la na ngwi pyaw ai prat hte seng nna Chyum Laika tsun da ai hpe kam mai na kun? Wan hku law ai masha ni mung dai zawn myit ma ai. Dai lam ni hpe san jep yu na matu nang hpe saw shaga mayu ai.
1. Chyum Laika gaw gaja wa byin wa ai lam ni hpe ka da ai laika buk kun? (sh) sumrai laika buk kun?
Chyum Laika hta lawm ai lam ni gaw tup hkrak “teng man ai ga” ni re ngu nna Chyum Laika hta tsun da ai. (Hpaji 12:10) Gaja wa nga wa ai masha ni a mabyin ni lawm ai. (Luka 1:3; 3:1, 2 hpe hti u.) Labau sara ni hte lamu ga sawk sagawn hpaji du ni gaw, Chyum Laika hta lawm ai nhtoi ni, masha ni, shara ni hte mabyin ni gaw tup hkrak jaw ai ngu nna tsun ai.
2. Chyum Laika gaw prat n dep mat sai laika buk n re ai lam anhte hpa majaw lu tsun ai kun?
Chyum Laika gaw ka wa ai aten hta na pyi grau prat dep ai hpe lam amyu myu hte sakse madun nga ai. Ga shadawn, Chyum Laika hta hpungtang hpaji hte seng ai lam ni hpe madun da ai. Chyum Laika ka ai aten na masha law law gaw dai lam ni hpe n kam ai. Raitim, Chyum Laika hta tsun da ai lam gaw tup hkrak teng man ai hpe ya aten na hpungtang hpaji gaw shagrin ya ai. Chyum Laika gaw kam mai nna, “htani htana a grin nga ai.”—Shakawn 111:8.
3. Htawm hpang hte seng nna Chyum Laika hta tsun da ai lam hpe anhte hpa majaw kam mai ai kun?
Chyum Laika hta, “garai n byin ai amu ni hpe” tau hkrau tsun da ai myihtoi ga a ni lawm ai. (Esaia 46:10) Shaning law law kaw na tau hkrau tsun da ai lam ni gaw teng sha hpring tsup wa ai. Dai ni aten hta byin na mungkan a masa lam hte seng nna mung ahkri ahkrai tsun da ai. Ndai daw hta Chyum Laika myihtoi ga nkau mi hpe hkaja lu na re. Tup hkrak byin wa ai lam gaw mau na zawn re!
Kahtap Hkaja
Hpungtang hpaji gaw Chyum Laika hte gara hku tup hkrak re ai lam hte myit lawm hpa Chyum Laika myihtoi ga ni hpe hkaja yu ga.
4. Hpungtang hpaji gaw Chyum Laika hte tup hkrak re
Moi prat na masha ni gaw, mungkan ga hpe lama ma hpai da ai ngu kam wa ai. VIDEO hpe hpaw.
Lai wa sai shaning 3,500 daram hta ka wa ai Yoba Laika hpe yu yu ga. Yoba 26:7 hpe hti nna, ndai ga san hpe bawngban u.
-
Mungkan ga gaw “hpat wat” hta nga nga ai ngu tsun da ai gaw mauhpa n re i?
Lai wa sai shaning 200 daram du hkra, hka a matut manoi mabyin hpe atsawm n chye na shi ai. Lai wa sai shaning 3,500 daram hta Chyum Laika tsun da ai hpe yu yu ga. Yoba 36:27, 28 hpe hti nna, ndai ga san ni hpe bawngban u:
-
Hka a matut manoi mabyin hte seng nna asan sha tsun da ai gaw hpa majaw myit lawm hpa rai kun?
-
Ya hti mat ai Chyum daw ni gaw Chyum Laika hpe kam ai myit grau nga wa hkra nang hpe karum ya ai kun?
5. Chyum Laika gaw ahkyak ai mabyin ni hpe tau hkrau tsun da
Esaia 44:27–45:3 hpe hti nna, ndai ga san hpe bawngban u.
-
Babelon garai n hkrat sum shi ai shaning 200 daram kaw nna Chyum Laika hta gara hku ahkri ahkrai tau hkrau tsun da ai kun?
B.C. 539 b hta, Babelon mare hpe Persi hkawhkam Kuru hte shi a hpyen dap gasat awng dang wa ai lam labau hta mu lu ai. Mare hpe makawp maga da ai hkanu hpe hka lam shai hkra galaw kau ai. Hpaw da ai chyinghka hku mare de shang nna, n gasat ra ai sha zing la kau lu ai. Shaning 2,500 jan na sai raitim, dai ni aten du hkra Babelon mare gaw hten run nga ai. Chyum Laika tau hkrau tsun da ai lam hpe yu yu ga.
Esaia 13:19, 20 hpe hti nna, ndai ga san hpe bawngban u:
-
Dai myihtoi ga gara hku hpring tsup wa ai kun?
Dai ni aten na Irat mungdan hta nga ai Babelon mare chyahten
6. Chyum Laika hta tau hkrau tsun da ai lam ni hpe dai ni aten hta mu lu
Dai ni na aten hpe “hpang jahtum na nhtoi ni” ngu nna Chyum Laika hta tsun da ai. (2 Timohti 3:1) Dai aten hte seng nna Chyum Laika tau hkrau tsun da ai hpe yu yu ga.
Mahte 24:6, 7 hpe hti nna, ndai ga san hpe bawngban u:
-
Hpang jahtum nhtoi ni hte seng nna, Chyum Laika hta gara hku tsun da ai kun?
2 Timohti 3:1-5 hpe hti nna, ndai ga san ni hpe bawngban u:
-
Hpang jahtum nhtoi na masha ni a myit jasat hte seng nna, Chyum Laika hta gara hku tsun da ai kun?
-
Gara myit jasat ni hpe nang sadi hkrup ai kun?
Nkau Mi Tsun Ai: “Chyum Laika gaw maumwi laika buk langai daram sha re.”
-
Na a ningmu gaw gara hku? Chyum Laika hpe kam mai ai ngu lu tsun ai gara lam ni nga ai kun?
Kadun Dawk
Labau, hpungtang hpaji hte myihtoi ga yawng gaw Chyum Laika hpe kam mai ai lam madun dan ai.
Bai Maram
-
Chyum Laika gaw gaja wa byin wa ai lam ni hpe ka da ai laika buk kun? (sh) sumrai laika buk kun?
-
Chyum Laika gaw hpungtang hpaji hte tup hkrak re ai gara lam ni nga ai kun?
-
Chyum Laika gaw htawm hpang hte seng nna tau hkrau lu tsun ai ngu nang shadu ai kun? Rai yang hpa majaw dai hku htai ai?
Sawk Sagawn
Chyum Laika hta hpungtang hpaji hte tup hkrak n re ai lam ni lawm ai kun?
“Hpungtang Hpaji Gaw Chyum Laika Hte Tup Hkrak Re Ai Kun?” (Web sumhpa)
“Hpang jahtum nhtoi ni” hte seng nna tsun da ai lam ni gaw hpa ni rai kun?
“Chyum Laika Myihtoi Ga Hpring Tsup Nga Ai Lam 6” (Sin Langchyi, May 1, 2011)
Grik Hkawseng Mungdan hte seng nna, hpring tsup wa ai Chyum Laika myihtoi ga ni hpe hkaja yu u.
Chyum Laika myihtoi ga ni gaw la langai a ningmu hpe gara hku galai shai ya lu ai hpe yu yu u.
“Nye A Matu Gaw Karai Ngu Ai N Nga Ai” (Sin Langchyi No. 5 2017)
You May Also Like
SAN CHYE AI GA SAN NI
Yehowa Sakse Ni Saw Shaga Ai Chyum Laika Hkaja Lamang Ngu Ai Gaw Hpa Rai Kun?
Manu jahpu n jaw ra ai Chyum Laika hkaja ai lamang hpe Yehowa Sakse ni saw shaga ai shaloi, gara Chyum Laika hpe raitim, nang mai lang ai. Na nta masha ni, manang ni, kadai hpe raitim, saw shaga mai ai.
